المساعد الشخصي الرقمي

مشاهدة النسخة كاملة : شعراء الشايقية


اسامة ابوزيد
02-06-10, 04:15 PM
هي مساحة لجميل الكلام من شعراء الطمبور

ذلك الفن الذي دخل قلوب كل السودانين واثر فيهم

شعرا" تغنى به الاستاذ مصطفى سيد احمد ومحمد وردي

شعرا" لمس دواخلنا ومس وتر حساس فينا


هيا احبتي لنبحر في جميل الكلمة والقصة المنظومة قصيدة وابكتنا
وقصائد العشق والغرام

اسامة ابوزيد
02-06-10, 04:23 PM
قومة من النباه ما ضاقلو قوت الفاه
غير كلمتين فى اليوم إعتادن الحلقوم
من الصباح للنوم يا مـحسنين لله
تبدأ الصباح بالآه ومنك زمن تواه
وتتمسى يا الله من شدة المأساه
ترقد رفقت الشاه حالاً صعب رضاه

جواها صوت مخنوق ما بيسمعوا المخلوق
وبالاً شتيت ممحوق وأنه أسى وخازوق
بحت لسان مريوق ينادى مـعـتـصـمـاه
00 يا محسنين لله 00
حبل المروه الكان ممدود من الجيران
وأعـمـــامـه والخلان بالمطرقة وسندان
يا حليل رجلنا زمان بس فضلو الأشباه

قبال ثلاثة سنين يتمت من الوالدين
ومن بعـــــدو بسنتين راح الكفيل وحنين
خلا لها دمعة عين وخلا لها خمسة أفواه

صبارة قادرة تطيق كل الآلم والضيق
وتغلب نشاف الريق والمصلا والابريق
وقلبـــاً وفى وصـــــديق لا ضل يوم لا تاه

إلا الصغيرونين يتبـــــاكو هم دايرين
فى لحظة وحين مـا بيعوفـوا المن وين
والحــوجة سيفه سنين يقتل رقاب الجاه

سالت دموع أنهار جسر الصمود إنهار
عارفى العدم جبار مر ما بيراعى صغار
إلا الفقر مـو عار بس للوجوه شواه

ضايقى العذاب كم نوع وعارفى السؤال ممنوع
شبعانه فوقو الصوع ورويانه نوح ودموع
الله يجازى الجوع كم كم حنالو جباه

تب يا زمن مـحاق من ضلك الرقـــــاق
يا قاسى يا فراق يا اللى الفرح سراق
حنضل أساق دقاق مـا بيحملنو شفاه

عطش السنين فى الجوف طرد السئم والخوف
فرش دواخلى حـروف روينا بالمعــــــــروف
ولا قلة المصـــــــروف لا الحـــــوجــة تتوطاه

اسامة ابوزيد
02-06-10, 04:25 PM
الواقع المرير .. حاتم الدابي

تاني ما بندسه الخبر نحن قدام واقع مرير
فى البنات زي السوس نقر يا خى دنيا اخر زمن
عوانس فى المجتمع ديل بقن للبنوت عبر
قبلهن كم الات سماح ضاعن واخير ياخدن الحذر
الزواج صح قسمه ونصيب حكمة مما خلقوا البشر
بيهو كم عاشقين ضاقوا مر مؤمنين بيهو قضاء وقدر
اوعه ما تخدعك الوجوه المندية متل الزهر
تبدو مبتسمه فى الصباح وفى الدواخل عدوان وشر
السماح ماهو سماح عيون واقعه متمتعه بالحور
ماهو عود نادى ومستقيم نامي فوق عز وفوق بطر
ما تقول سمحات الشفاه المنديه زى الزهر
ما بتأكدوا ليك الكتوف المردم فوق الشعر
ما تقول سمحات الشفاه الكلامن يهز الوتر
ما بتأكدوا ليك الكتوف المردم فوق الشعر
السماح فى العفة والدين القناعه وغض البصر
دي القناعه وكنز الزمان واحتمال نكبات الدهر
البنات تابعات الهوي مغرمات بالليل والسهر
الغرام بقى بس بي الجيوب والبيوت والطين والمتر
الواحدة تتعلق بالدروس والمراوغة منذ الصغر
تنتظر لن تقضي الدروس وتسهى لمن يفوتها القطر
حتي كان قلتا الامهات العرس سونو متجر
اصبحن للدنيا العبوس وللقروش سعرانات سعر
يا حليل زمن الابهات كانوا غسالين للصقر
الزمام صار عند الحريم صار عديل البيع فى المهر
فات زمان الحن والحنين الفضيلة وعاها اندثر
لا تهم يا اخوي إن سمع قالوا قام شوك للعشر .

اسامة ابوزيد
02-06-10, 04:28 PM
عشان خاطر عيونك
الشاعر: الفاتح اراهيم بشير


عشان خاطر عيونك ديل افارق حلتي وطني
اسافر من بلاد لي بلاد كمل صبري وراح بدني
اضوق المره واتغرب واكون مجبور اشد رحلي
وافوت ناسا حنان طيبين وافوت مرتع صباي واهلي
اشيل الذاد غنيواتن اردد فيها من جهلي
كلام يقول انا الراحل وجاييك بكرة يا املي
جاييك يا غرام الروح لو حتى السنين دار تابة
وجاييك لو سنيني تدور وتدوس امالي انيابة
وجاييك لو يطول الليل ولو يبقى الوطن غابة
جاييك قولي لي كيف انساك وانا السافرتا عشان عينيك
فت درب الوطن والعزة والحله المنورة بيك
فت امي وقليبه الحاني وحاجات تاني خافي عليك
وانت لا تشغل قليبك بيها ما دام الصحاب حوليك
قول لي يا حبيب برجاك لو حتى اغترابك طال
وقل لي ما بخونو هواك وما بسمع كلام عزال
وقول لي غير غرامك انت ريد يشغل قليبي محال
وطمن قلبي يا مريودي باقي الغربه ذاته نضال

اسامة ابوزيد
02-06-10, 04:32 PM
احتـرت كيفـن اوصفـك .. والله يـا قبـلـة غـنـاي
لو كان بحور الكون مـداد بتجـف قبـل مـا تنصفـك

حاولت اكتب ليك واقول واوصف ملامحـك بالشعـر
لكن حروفي تـذوب عديـل قـدام عيونـك تنصهـر
يا عايشة في دمي وغناي يـا ديـدن الـروح والفكـر
خلدت اسمك بي حروف قطرات دماي كانـت حبـر

يا غنوة في وتري الحزين يا ضحكة في الزمن الصعب
يا واحة في عز الهجير يا راحـة مـن بعـد التعـب
يا نسمة هبت في الدغيش عزفت علي وتـر العصـب
يا رحمة من رب العباد مكبوبة فـوق خلـق الله كـب

سافرت في عينيك سنيـن زادي المعـاي ابيـات غنـا
مكتوبة بي دمي الصبـح شـلال مـن الهـم والعنـا
صورت احساسي الدفيـن بـي قافيـة ليـك معنونـة
بتقول بلا كلفة ورتوش يا انتـي يـا المـوت والفنـا

احترت في وصفك انا وحارت معاي كـل الحـروف
مرات بشوفك يا مناي ياقوتـة فـي قلبـي الولـوف
مرات بشوفك ضي امل دبج خطاي رغـم الظـروف
مرات بشوفك جارية نيل امواجو عانقـت الجـروف

عمار صالح
03-06-10, 04:15 PM
هلا هلا
جيتنا في ديارنا ياسمسم
شد حيلك عاد نحنا غنانا كتير وحنين
وفيهو اجمل الحلوين

ابو الشوش
03-06-10, 04:49 PM
الاخ سمسم
لك كل الودوالتحايا
من شوايقيةكوستى ستى
ارمى لى قدام

اسامة ابوزيد
03-06-10, 11:38 PM
الاخ عمار والاخ ابو الشوش

رامين تب لقدام ولن نتراجع ما دام هنالك ابداع وكلمة تحفر في الدواخل

اسامة ابوزيد
03-06-10, 11:39 PM
مادام هي لا راعت شعورك ولا ضميرة هي استحه
انساها والبكا مابيفيد قشقش دموعك وامسحه
***
كلمني شن وداك قبيل تفرد مشاعرك تفضحة
خليتا حي السوق رياض يانعة وزهورة مفتحة
طولت ايدك لي قطوف زهرة وغميصة مسارحة
زي ماهي عاشقي الاغتراب برضو انت عاشق ملمحة
***
صح كت يامسكين زمان دايما تشكرة تمدحة
مابترضى لو كان بالغلط بي كلمة انسان يجرحة
ما قتا فوق كل البنات تسرق محاسنة تشرحة
كانت عواطف انسان ضعيف ساكت جناحي مجنحة
***
انشاء الله منها تتعظ وتكون خطاك تتوشحة
كانت حساباتك غلط في القسمة والضرب اتمحة
اتأنى في جبر الكسور براحة اجمعة واطرحة
واخر شي كان تعرف براك حتى الغرام بقا مصلحة
***
بت حوة يا مظلوم بقت للمال عقولة ملقحة
يا ريت عقول الناس بعد ما تحب تخش المشرحة
يقروا اللي كان مافي القلوب كيف الشرايين تنضحة
ويتراجع النطقو اللسان صح ولا زي ضل الضحة
***
مغرورة ما دارت سكون بلدا شقاوة ودردحة
لا تمشي تنزل بي تحت لا حتا ارضك تنقحة
لابوقة لا موية شراب لا واطة ماها مصلحة
لا شلت للمحرات سطور لا شتلة ماها مصفحة
***
كانت قبيل طمعاني فيك فارس جيوبو متمسحة
دايراك يوم جيت للعرس نار الله في الناس تقدحة
الشيلة بالشنط الكبار مبطوحة راقدي مبطحة
دي الحلي والناس جات تشوف راجين متين تجي تفتحة
كان بالة في شهر العسل طول الزمن ما يبرحة
تسكن معاك في بيت كبير موكيت وحيطو مسلحة
عربيتك الملك الحلال جلد النمر والملفحة
بوتوجاز مولع وديب فريزر واب ريموت والمروحة
***
تسرق مناها قبل يتم كل المشاعر تجرحة
يا جعفر الحياة مدرسة دايما مقررة في الصحة
ممكن نعينك في الدروس لو انت غلبك تشرحة
واعرف بانو اول درس الزول بياكل الملحة

اسامة ابوزيد
04-06-10, 12:21 AM
الزمان بي عذابي حكم
تراني بقوقي ( بغني ) واترنم
اجرو مع الخيال النم
على الامي زدت الم
مضروب من عيونو سهم
دقيت بابو قالي نعم
غلبني معاهو اتكلم
قال بي مطلبك بهتم
قلتلوا ياخي جود وارحم
لو في بيتو يتبسم
عبيرو يفوح بعيد ينشم
طريحة وبيها يتبلم
اظنو على هلاكي عزم
قاسي قليبو ما بيرحم
حديد ما من لحم او دم
مر علي ما سلم
منو وليهو بتظ

اسامة ابوزيد
04-06-10, 12:30 AM
القصص التي يتميز بها شعراء الشايقية كثيرا" ما تؤثر فينا وتدمي قلوبنا وهذه واحدة منها



جمر الصلاق
الـدنـيـا كـان نـص الـنـهـار شـمـس الله فى كـبد السماء
والـنسـمـه نـايـمـى فى الـخـدار خايفى الهجير لا يلثمه
لا قــونـى اطــفـــالاً صــغـار فى حــالـه يـائسه ومألمه
وقـــالــوا لـى بـى كـل انـكـســار الـدنـيـا يـا عم مظلمه
ســألــتـا مــالــكــم يــا ولاد جــرت الــدمــوع متلاطمه

وجــانـى الصغـير بى وشيشو وبى إلفه فى قلبى ارتمى
قـــالـى بـى خـــاطــر حـــزيـن الدنيا صبحت ما بتطاق
امـى وابـوى بـلا سـبـــب يــــا عـمـى اعـلـــنــو للفراق
واخــوانـى خــلــو الـمـدرسـه كـايسين دروب الإرتزاق
ويــامـا كـتــيــر نـاس زيــنــا بــعـانـو من جمر الطلاق
بــادرنـى بـى أحـرج سـؤال يـا عـمـى هوى غلطان منو
احـتـرتـا انـا وحـار بـى الـدلـيـل كـلـمنى بس اعمل شنو
وقــبـال اجـاوبـلو السؤال بادرنى ياعمى هوالغلطان منو
غـلـطـان ابـوى الـمـا قـدر يـفـهـم إحـــســــــاس الصغار
ولا غـلـطــانـه امـى الـمـن زمـن مالـيها هم غير الشجار
ولا الـغـلـط كـان مـشـتــرك يـاعــمـى سـوء فى الإختيار
ولا الــزمــن اصـبـح صـعـب اسـلـوبوا ما بيعرف حوار

يـاعـمـى هـوى غـلـطـان منو عيشتنا صبحت نار فى نار
خـــايـــف يــجــــونــا بـعــد زمـن ويـقـولـو امات للإجار
احــسـن لى امــوت انـا بـس طـفل قبال مـا يتخذوا القرار
مـا بـتــعـرف الـغـلـطـان مـنـو ماالاسره انقسمت خلاص
واحــديــن يــأنــبــو فى ابـوى ويـبـثـوا فى أمـى الحماس
حـــبــوبـه ام قــلــبــا رهــيـف وقـفـت عـلـى خط التماس

غــابــت خــلاص الـمـعـرفـه والـعــقـل امـتـلـكوا النعاس
لازال بــيـحـكـيــلـى الـطـفـل قـال لـى والـمـوقـف رهيب
الـشـئ الـمـحـيــرنى وعـجـيـب وخلانى فى موقف مهيب
خـلـق الله لـيـه يـتـخـاصـموا ماالمولى خلق الكون رحيب
والـشـئ الـبـحـيـر تـشـوف عـدوك تلقاه كان اقرب حبيب
اقــرب مــثـال امـى وابـوى الــريـــــده انـقـلـبـــت نحيب

كـان شـفـتـا لى صـورة الـعـرس والبسمه من جوه القليب
تـحـلـف بـأنـو الـكـون جـمـيـل انـشـوده من سحر المغيب
بـالله مــالــكــم يــا بــشــر حــيــرتــو لــلــطــب والطبيب
الليله شوف بسبب امى وابوى جانا الضياع صنقر قريب
واحـتـجـنـا كـل يـوم الـصـبــاح الـشـكـله من اجل الحليب
خـاصـمـنـا كـل الـمـجـتـمـع حـتى الـلـعـب بنشوفوا عيب
كـل خـوفـنـا مـن أخـطـر سـؤال مشكلتو ما يلقى المجيب

مـالـم اهـلـكـم يـا ولاد صـوتـن بـلا طـيـر شـافـلـو دبـيب
فى شان ده نلعب فى الشمس وننضارا فى الركن القريب
وقــبـال يــأذنـــو لـلـعــصـــر نــتــلـــمّ فى فــــد عنقريب
ونــوم ونـحـلـم بـى زمـن مــا فــيــهــو للأحــزان نصيب

كـان ردى لـيـهــو خــلاص كـفـى قطعتا قلبى انا بالعذاب
نـوع ديـلا قـايـلـيـن العرس زغرودة عن ساعة الخضاب
نـوع ديـلا قـايـلـيـن العرس طــاقــيــه يـلـبـســـه كل شاب
نـوع ديـلا قـايـلـيـن العرس زى نــزهـة فى مدن الضباب
لــو خــتـــوا بــالهـم لـلأرض كــيـفــن بـتـنـتـظر السحاب
يـا دوبــو كـانـوا بـيـعـرفــوا إنــو الـمـولـى ما سدالو باب
ولا حــتـى ابـلـيــس الـلـعـيـن وكـل ولادو عـلـى الخراب

اسامة ابوزيد
04-06-10, 01:03 AM
عشان خاطر عيونك ديل افارق حلتي وطني
اسافر من بلاد لي بلاد كمل صبري وراح بدني
اضوق المره واتغرب واكون مجبور اشد رحلي
وافوت ناسا حنان طيبين وافوت مرتع صباي واهلي
اشيل الذاد غنيواتن اردد فيها من جهلي
كلام يقول انا الراحل وجاييك بكرة يا املي
جاييك يا غرام الروح لو حتى السنين دار تابة
وجاييك لو سنيني تدور وتدوس امالي انيابة
وجاييك لو يطول الليل ولو يبقى الوطن غابة
جاييك قولي لي كيف انساك وانا السافرتا عشان عينيك
فت درب الوطن والعزة والحله المنورة بيك
فت امي وقليبه الحاني وحاجات تاني خافي عليك
وانت لا تشغل قليبك بيها ما دام الصحاب حوليك
قول لي يا حبيب برجاك لو حتى اغترابك طال
وقل لي ما بخونو هواك وما بسمع كلام عزال
وقول لي غير غرامك انت ريد يشغل قليبي محال
وطمن قلبي يا مريودي باقي الغربه ذاته نضال

عادل عثمان
04-06-10, 12:02 PM
يمتاز شعر الشايقيه بالحنين والواقعيه وتصوير الأحداث ببراعه مدهشه ..
سمسم بوستيك حلو شديد وفكره مشلخه شلوخ شوايقه ..

اسامة ابوزيد
04-06-10, 06:38 PM
حظي التعيس
حاتم حسن الدابي
غناء الفنان جعفر السقيد

أنـا مـالى دون الـنـاس مــســوده أيامي
لا ضـو لي نـبـراس فى ظلـمه أحلامي
ليه دون خلايق الله حظي التعيس مسود
يـوم الــفـــرح طـل مــات قــبـل مـا يولد
فـتـحـت للأحــزان وســاعـة الـفرح غمد
اتـغـتــا بـيـهــم أســـاي مـتـوســدة الامى
بـاب الـسـعــد مقـفـول ما أتـلـقـا المفتاح
مات الشعاع مكتول صبح السعد ما لاح
لمتـيـن مـعـاي يا غول يا طارد الأفراح
كـل مـا أتـفــتـح لـي بــاب ألـقـاك قدامي
صــبـحـاً يــشــع قــــدام طــولــت أهاتيبو
شـايـفــاه في أحــلام عـطـــرني بـي طيبو
يـظـهـر لى فـجـأة ظـلام جـارات جلاليبو
يـكـشـحـني بي أوهـام تـحــرمـني نسامي
قــدامي كـل الــنـاس أفــراحـهـا مـا ونت
عايشين سماح أحساس بيهو الطيور غنت
الكـاس يـلاقي الكـاس ذي مـا هـي إتمنت
عـنـدي الأمـاني يـبـاس مـات القبـيل نامي
كـل الـخـطـى الـثـابـتـات تتماشى لى قدام
وأنـا لـو حظـيـت خطـوات بيـردها الهدام
الـبـعــدي عــدى وفـات مـتـوســد الأحلام
وأنـا مـالي لـيـه راجـعـات طوالى أقدامى

اسامة ابوزيد
04-06-10, 06:40 PM
الفاتح ابراهيم بشير

قبــــلة غُنـــاي


احتـرت كيفـن اوصفـك .. والله يـا قبـلـة غـنـاي
لو كان بحور الكون مـداد بتجـف قبـل مـا تنصفـك

حاولت اكتب ليك واقول واوصف ملامحـك بالشعـر
لكن حروفي تـذوب عديـل قـدام عيونـك تنصهـر
يا عايشة في دمي وغناي يـا ديـدن الـروح والفكـر
خلدت اسمك بي حروف قطرات دماي كانـت حبـر

يا غنوة في وتري الحزين يا ضحكة في الزمن الصعب
يا واحة في عز الهجير يا راحـة مـن بعـد التعـب
يا نسمة هبت في الدغيش عزفت علي وتـر العصـب
يا رحمة من رب العباد مكبوبة فـوق خلـق الله كـب

سافرت في عينيك سنيـن زادي المعـاي ابيـات غنـا
مكتوبة بي دمي الصبـح شـلال مـن الهـم والعنـا
صورت احساسي الدفيـن بـي قافيـة ليـك معنونـة
بتقول بلا كلفة ورتوش يا انتـي يـا المـوت والفنـا

احترت في وصفك انا وحارت معاي كـل الحـروف
مرات بشوفك يا مناي ياقوتـة فـي قلبـي الولـوف
مرات بشوفك ضي امل دبج خطاي رغـم الظـروف
مرات بشوفك جارية نيل امواجو عانقـت الجـروف

اسامة ابوزيد
04-06-10, 06:45 PM
أمانة عليك
الشاعر : خالد الباشا


أمانة عليك .. تخت بالك على الجواك .. علي الحلم البنينا بيــــــــــوت
علي السر الدفنّا كــــــــــــــــــــــــــلام .. تحت وجع الليـــــــالي سكوت
أمانة عليك .. قبل ترحل مع الأيام .. تشيل حلو الأماني تفــــــــــــــوت
تدس في بير حواسك ريــــــــد .. سقينا وفـــــــــا و حــمينا يمـــــــوت
و امانة عليك يظل اسمك حروف من نور علي حيط الفؤاد مشخــوت

عهودي معاك أموت واقف .. علي باب الهـــــــــــــــــــوى المفتوح
انا البرحل محـــــــــــل ترحــــــــــل .. غمامة عليكا و ين ما تروح
لأنك إنت في الوجـــــــــــــــــــــدان .. مشكن بين حـــــــنايا الروح
موسمة بيــــك تفاصيلـــــنا .. و مضمدا بي غـــــــــــــــناك جروح
تعيش في ذاتي و الذكــــــــرى .. متـل صـــــــفق الشتــي المحتوت

أمانة عليك ..
أمانة عليك ..

سنين الإلفـــة بيـــــــناتنا .. قمـــــــــــر لــــــــــيلاتك الصـــافي
تفاصيل روعتك جـــــــــــــواك .. منابع إحســــاسك الدافـــي
حواس خليتا يالمحبـــــــــــــوب .. وراك لا فيــــــــــــــنا لامافي
تموت بي شوقـــــــــــك الأفراح .. أمد باللهفة اطـــــــــرافي
مكان ما عشت في الأعماق .. هناك كلك عشق مخـــــــــتوت

اماني وراك مابتنســــــاب .. علي طرف العيون دمــــــــعات
امش و انا بالأماني ارجاك .. سنين عمر الجفا الجايــــــــات
و امانة عليك محل تـــــــنزل .. تمــــد حبل المحبة صــلات
يشع نور الوفا الماليــــــــــك .. تبق ليل الفراق غــــــنوات

و أمانة عليك ..
أمانة عليك ..

تخت بالك علي الجواك .. علي الحلم البنينا بيـــــــــــوت
تخت بالك علي الجواك .. علي الحلم البنينا بيـــــــــــوت

اسامة ابوزيد
04-06-10, 07:08 PM
غنوة العز يابلد

يامروي ياقبلة هواي
اشراق حياتي ومُغرِبا
ياغنوة العز البقت
تفرح دواخلي وتطربا
والله يا ارض الجمال
ارض الرجال
ارواحنا ليك بنوهبا
وجوانا رغم انف المُحال
اسمك حروفو بنكتبا
وبس قولي يا مروي الصمود
ذرًات ترابك نحسبا
يا مروي يا ..
ترهـــاقا يا..
يالماضي و المجد البعيد
ياقلعة في ركن الزمن
كان فيها تاريخنا التليد
ويا وثبة فوق هامة المحن
رسمت خطاوي وطن جديد
ياغنوة في عرس البلد
نقراها للعالم نشيد ..
يالدابي .. يا اسماعيل .. وياحميد ويا حُمَد سعيد
يا مروي يا ..
يا شتلة في ارض الحزن نبتت فرح
ويا مطرة في زمن الجفاف
نزلت بعد ما الغيم نزح
ياصوت بشق قلب السكون
يملا الديار بهجة وفرح
يا الله ليل يا ليلي انا
يا امونة ياساعة العصاري وقوس قزح
ياسر بكاي يا اسباب اساي
يا طب قليبي الانجرح
ما انت يا مروي الكلام
وانت النعام وكتين صدح
شن دار نقول فيك يابلد
ما انتي في قاموس كلامنا المصطلح
يامروي يابت البلد
يا امونة بت الشيخ حمد
ياحوا ياعوض المرق
يا نورة يا مليون سطر
يانغمة جاية من القلوب
ماشة القلوب فوق الطنابير الجسر
يامروي ياطيبة القلوب
يالبركة يا تمر الهبوب
يالعافي ياطولة العمر
والله يا امي الحنون ... ام الوليدات الغبش
فتناكي ما قاصدين نفوت
خربانة دي المبنية قش
فتناكي زي كل الطيور الراحلة في ساعة الدغش
لكن مصير الحي يعود نلقاكي في ايامنا عُش
لكن مصير الحي يعود نلقاكي في ايامنا عُش

اسامة ابوزيد
05-06-10, 09:24 AM
التفــاؤل


عليكم الله يا احباب اتلموا وابقوا قراب
خلونا النعيش أيامنا الموت ياداخلف الباب
الدنيا العبوس غدارة زي راية الفكي الكضاب
تضحك لك تقول جيدلي تتكئ تغرس النشاب
الموت يا صحاب بالجملة اصبح ما بدورو اسباب
والعاقل يعيش ايامو ما دام من تراب لتراب
هسى ان ماتو مننا عشرة تلقاهم 8 شاب
والتاسع يكون وسطاني والعاشر يكون يا داب
اخدوا الحكمة من تربالنا اتوكل رمي التيراب
وعارف ربو ما بينساهو والصابر دعاهو مجاب
علمني الزمن يا خلا درسا ما قريتلو كتاب
انو الدنيا مهما تبقى كلها في سؤال وجواب
اللقى يا رفاق من الله زيو كذلك الانجاب
والحظ ما بتجيبوا القوة والشقى ما بزيلو عتاب
والبكا ما بجيب الرايحة لو جرت الدموع صباب
والأفراح تدور يمشولا والاحزان تجيك بالباب
الدايرة السعادة يكوسها وبينا وبين حزنا حجاب
أولا في زنين الضحكة قمتا في لقى الأحباب
يا اخونا التفاؤل نعمة ديمة يريح الأعصاب
والزول اليكون متشأئم العصفور يشوفو غراب

اسامة ابوزيد
05-06-10, 09:28 AM
انا لو كتلنى الشوق

انا لو كتلني الشوق صدقني ماغلطان
ما انتا خليتني جواب بلا عنوان
تايه مع الايام من باحة لي باحة
شايل هموم الناس وخلق الله مرتاحة
افراحي مقفولة ومالاقي مفتاحه
والشاله زول نسااي من وين تجي الراحة؟
اشواقي يالمحبوب اكبر من الغنوات ولو دار تعرف البي كدي
اسال النجمات
بتقولك المستور وكيفن ملكتا الذات
وكيف انتا في دمي ومستوطن الخلجات
علمني حبك جد كيفن اكون وافي
وكتين يطولبي الليل ويبقى الامان مافي
انا..انت..والاحلام والواقع الجافي بيناتنا اقوى صراع في عشنا الدافي
بس انت ابقى معاي والباقي كلو يهون
اتحمل الالام والخاطر المحزون
باكر طيور الريد تملى الاماسي شجون
في الساعة ديك يازول الدايرو الله بكون
انا لو قتليك بنساك صدقني اكون كضاب
اناكنتا قبلك زول تايه بلا هداي
زي الغمام رحال ماداري وين مرساي
وكتين رايت عينيك وفيهن لقيتو دواي...عادليا عمري الراح حسيت باني شباب
انتا قفلتا باب قلبي ومفتاحو شلتو معاك
خليتني اشوف الكون باهت جمالو بلاك
مشكلتي يالمريود داير اطولو سماك
لكنو ريشي دقاق والجو غيوم وضباب
ريدك بلا ميعاد هبش النسيج الحي
حملني فوق طاقتي اعياني مني ولي
ماقالو في الامثال اخر العلاج الكي والموت دوام واحد وتتعدد الاسباب
القاك معاي ومعاي ..زي لو معاي ياريت ..
زي الحنين والشوق في الغنوة والدوبيت
زي الضفاف والنيل والودعة والسوميت
ما انتا ليا بقيت زي السؤال وجواب
لوقتليك بنساك..في زول بنسى روحو دحين؟
لوحتى كان مشغول لابد يشدو حنين
اصلو العشق غلاب
اصلو الغرام غلاب
مهما ندسو يبين
نقراهو في العينين ظاهر كانو كتاب
لو قتليك بنساك صدقني اكون كضاب
انت البنيت جواي للريدة سور وابواب

بت السر
05-06-10, 10:34 AM
سمسم ...يا راقي تسلم والله
بنجيك برواقة....

بكي
05-06-10, 11:30 AM
سمسم والله ابداع عديك شوايقة جنني شوايقة

محمد عبدالرحمن
05-06-10, 12:00 PM
البتهوى من جوه قلبك تلقاو ابادرك بالجفه اهلا اقوله ليك بلا نفس والبسمه الا مع غيرك تصادفه......
************************************************** **
الموج لما يضارب الشاطي والريح لما تطفي الشمعه المحبوب وكت يجرحنا كان في ضمير يحس او يرعه جرح الريده كان ادعده من ضمن العجايب السبعه......
**************************************************
لاشوفتًاً تبل الشوق ولا ردا اطمن ان شاالله انت تبقه طيب وانا البي كلو هين
*************************************************
اخي سمسم في الشعر الشايقي مايحرك سكون النفس فتجدها في اغلبها قصص واقعيه معاشه يترجمها امثال الشاعر حاتم حسن الدابي واسماعيل حسن لتعيش قصائدهم معنا باصوات مصطفى سيد احمد ومحمد وردي وغيرهم

من كوستي
05-06-10, 04:44 PM
نان ياب صلعة بلا البكاء الكبرا شنوووووووو:o

بت السر
05-06-10, 09:53 PM
محمد الحسن سالم حميد
الفنان : محمـــــد جبارة
نورة
هي .. أقيفن .... نورة فيكن؟
نـــــورة نقـــــــاحة الجروف
نـــــورة حـــــــــلاّبة اللبيني
للصغيرين ........والضيوف
نورة ســـاعة الحــــــر يولع
تنقلب نســـــمة وتطــــــوف
تدي للجيــــــــــــــعان لقيمة
وتدي للعطـــــــــشان جغيمة
والمخلي الحال مصـــــــــنقر
في تقاة الليـــــــــل تنــــــدقر
تدي لي باكــــــر بسيـــــــمة
تكسي للماشــــــــــين عرايا
وفوقــــــها إنقطــــــع هديما
ما عرفتــــن نـــــورة إنتن؟؟
قولن إنتــن شــــن عرفتن؟؟
نورة بت الواطـــــة أخيتــي
نورة اخـــت كل الغـــــــلابة
نورة حاحاية الشقــــــــــاوة
نورة هدّايـــــــــــة الضهابة
الاراضــــي اليــــــــاما أدت
نورة بقــــــــــــت من ترابا
وماشي في الأعماق سحابا
مشتهنها ........ والله جابا
للجنــــــوب طبـــــلاً يهدهد
لي مشــــــــاعر ناس تعابة
وللشـــــــمال طنبور يسكّت
دمعة الميتــــــــــــــين كآبة
ما عرفتــــن نـــــورة إنتن؟؟
قولن إنتــن شــــن عرفتن؟؟
نورة عايزة تقــــــــرأ قالت
فوقا حيطة الدنيـــــــا مالت
ختت الكراس وشـــــــــالت
منجلاً صـــــــالت به جالت
لامن إنجـــــرحت به شالت
للتراب فــــــــوق إيدا كالت
ومرة يوم في الدونكا لدغت
جاء الفقير بالليل حـــواها
ويوم ملاها الهم قطـــــايع
جاء البصير بالنّــار كواها
ونورة ما قدرت تمـــــــانع
تقنع النــــــــاس المـــعاها
ومرة شــــــافت في رؤاها
طيرة تاكل في جنــــــــاها
حيطة تنمغى .......وتفلع
في قـــفا الزول البــــــناها
في جنينة ســـيدي سمعت
تمرة تصـــــــــقع للوراها
الأرض لابـــــــد بترجــــع
للتِعِب فوقــــــــــا ورعاها
شــــافت النيل موجو لاها
الخليـــــــــــــقة بقت إلاها
الشمس طبـــــقت ضحاها
نار عقاب إنســــاب مكسر
فوق تكليـــــــــــات متاهة
وضــــــــــو مــــــــــن الله
رهاب ...............مكتف
في وتيد الليــــــــل معاها
بين حضــر بلدها وخلاها
فسّرت للنــــــــاس رؤاها
وقالوا جنــــت ومو براها
ونورة زادت فوق شـقاها
وصدت الأيـــــــــام تخش
تبني لي عصـــفورة عش
في السواقي تشوف عزاها
لما شوقا يسوي .... وش
تسقي تزرع تسـعى تصنع
للنــــــــهار في الليل تخش
عرفت الشــــــقا والشقاوة
إلا ما عــــــــــــرفت تغش
شايلة طولة البال من الله
ومن أراضــــــــينا الإثارة
وماشي تكدح طول نهارا
وترجى لما الليــــــل يفلل
تسرق ألمي عشان خدارا
عشــــــــــــــــــان صغارا
ولما ترجــــــــع لي ديارا
تنزف أحــــــــلام الفقارى
من عوينـــــــاتا الحيارى
لي غبار الحــــــــال تقش
فوقو للآمـــــــــــال ترش
نورة تقعد صـــاحي تحلم
بي بيوت بي نــور ودش
وبالمحبة تشـــــق دروبا
ولي قلوب الكـــــل تخش
نورة تحــــــلم بي وجود
ما مشـــــــت بينو القيود
أفضل أفضـــــــل بي كتير
بي وطن من غيــر حدود
نورة تحــــــلم بي عوالم
زي رؤى الأطـفال حوالم
لا درادر .. لا عســــــاكر
لا مظـــــــــاليم لا مظالم
نورة...... تحلم ........
ولما تحلم نـــورة ترجف
ولما ترجف نـــورة تحلم
ولما ريح الواقـــــــع المر
لي عشيش أحلاما ينسف
نورة ..... تنزف ........
ولما تنزف بالا يهتــــــف
يوم حا تنصــــــــــــــــف
يوم حا تنصــــــــــــــــف
وتبدأ ..... تحلم ........
ولما تحلم نورة ترجف
ولما ترجف نورة تحلم
صـاحي تحلم
وصاح بتحلم
صــاح بتحلم

اسامة ابوزيد
06-06-10, 03:13 PM
بت السر
بكي
محمد

شكرا" علي المرور والمشاركة

واهديكم القصيدة القادمة

اسامة ابوزيد
06-06-10, 03:14 PM
عفوا حبيب قلبى

كلمات الاستاذ الفاتح ابراهيم بشير
غناء الرائع جعفر السقيد

انا قلبى عشان ينساك دايرلو تانى زمن

عفوا حبيب قلبى ما انت لى وطن

انا قلبى ذنبه شنو عودته انت عليك

علمته يبكى ينوح يوم ما يشوف عينيك

وكتين ملكته خلاص فريتها لجنحيك

خاطبته باستبداد قلت ليه اختار ليك

هو الصبار المسكين راجى اليالى تروق

لا كل لا مل لا عاتب المعشوق

كل القدر قاله ياناس كتلنى الشوق

والضقته فى دنياى ما ضاقه قط مخلوق

انا يا خلائق اه ضقت العذاب اصناف

شلت الليالى سقد تشهد تبارك وقاف

جربت صبر ايوب كانت نهايته جفاف

والصابنى يالمريود بالعين محال ينشاف

لو دار تعرف البى ارجوك مرة تعال

اقعد وعاين بس ما تسال اى سؤال

انا يا حليلى انا اصبح يمنى شمال

جوايا عشرة اشياء خلت حياتى محال

حظى التعيس الشوم الغيرة والعزال

ليل الضياع والخوف والحيرة والاهمال

انك تملى معاى و بيناتنا كم اميال

احساسى انى بسيط واحلامى واقفه جبال

صبر اً صبرتو عليك ذكرنى سيدنا بلال

حتى ان سكت انا تتكلم الاطلال

وآخر المطاف بالليل سافرت باستعجال

لا طلت بلح الشام ولا ضقت راحة البال

برضك تقول لى اصبر اتحمل المكتوب

واتعوض الله خلاص انسانى يالمحبوب

خلتنى ذى عصفور هبت عليه هبوب

فنتله عشه شمال شالت صغاره جنوب

اسامة ابوزيد
06-06-10, 03:17 PM
وصيـــة أم


فشان للعافي تمشي تجينا راجع تشوفنا آخيري وتنشل كل واقــع
*********
أوع تنسي إنك مزارع ود مزارع وزمنك كلو فوق التمرة طالــــع
نحذر فيك من لعب الشوارع وتجري علي البحر في العــوم تسارع
أبوك وكت رحل خلاك شافع سهرت عليك شقيت فضلت أتابــع
أدس في الدمعة فشان أديك دافع وكلو فشان أشوفك وإنت ناقع
وصيتك بي قليلتك تبقي قانع وصيتك تفشـــي جارك مافي مانــع
وصيتك تمشي دغري عفيف ويانع وعلي الله الباقي ماهو شغل مصانع
*********
علمتّك تبقي متل القمرة ساطع وعلمتّك تبقي دبلان لونو ناصع
وعلمتّك من زمان تمشـــي الجوامع وعلمتّك تبقي زول رغاّم
وعلمتّك تبقي راس ماتبقي تابع وعلمتّك كيف تغربل بالمسامع
وتقيف عند السؤال السيدو طامع وجوابك ليهو تدي تلات طوابع
علمتّك في الكلام ما تبقي لازع وعلمتّك ما تكون أشتر تقاطـع
وكمان تبقالى مرجع للمراجع وتخلى الناس تقول علم الله واسـع
علمتّك طول حياتك تبقي بارع وعلمتّك بالشعر أربــع مقاطــع
الزول صيدو ساعة يبقي ناجح يشم راحة أيدو يعتر في الأصابع
علمتّك تحاكى القمرة ساجع وعلمتّك حين ينازعوك كيــف تنــازع
علمتّك كيف تشيل الهم تصارع وتمد حيلك مع المســاح تضــارع
علمتّك تبقي متل الزهرة فاقع وعلمتّك تبقي زى الفضة لامع
وأشوفك دخرى تتلقي الصواقع تتر البت بتين ما جات تلاطع
علمتّك ما تفشي الناس تخادع وعلمتّك كيف تكون متل ألمى فاقـع
محل ما تمشي شكرك تلقي راتع يقولوا عليك مواصل ماك ضالــع
علمتّك تبقي زولا لي الله خاشع وتكون قدامي في كل المواقـــع
وتبقي بحر مسور للحوجة جامع ومتل شمس الصباح عاد وأنت طالــع

اسامة ابوزيد
06-06-10, 03:19 PM
مسافرة خلاس
مسافره خلاسْ !

ونحنَ الدوبنا

يا دوبْ جينا

شايلينْ فى العُيونْ أمطارْ

وجايينْ

من ليالى الشوقْ

ودايرِنكْ تكونى نهارْ

وجيناكْ

قُلنا نبقى سَوا

ونكون للحبْ أهلْ وديارْ

وجيناكْ

شانْ تكونْ ريدتنا

للعُشَاقْ وطنْ ومزارْ

عشَانْ الدنيا

تبقى حديقه

من أطفالْ .. ومنْ أطيارْ

تقومى تسافرى !

شِنْ يَبْقَالنَا

مِنْ بَعْدِكْ

وشِنْ يَبْقَالنَا من أشعارْ !

-2-

مسافره خلاسْ !

ولكينْ كيفْ

مُنو البِكرِمْ

مَعَايا الضيفْ

مُنو البِرْكِزْ

معاىْ فى الحاره

فوق القيفْ

مُنو البتحدى فى تَالاَيا

بردَ الليلْ

وحرَ الصيفْ

مُنو السَّوانى

أبقى جميلْ

بَعَدْ ما كتَ زىَّ الطيفْ

بحبِكْ

أيوه يا حليوه

لأنكْ لىْ دُعاشْ وخريفْ

لأنكْ

لىْ وَطنْ جايى

من التاريخْ ... بحدَّ السيفْ

اسامة ابوزيد
09-06-10, 11:52 AM
الفاتح ابراهيم بشبر
ودحمد احمد

زول في وضوحو بلا الشمس ود حمد احمد يارفاق
من شب قام درفون صغير سوالو جو الناس عرش
يا هو الركيزة الفي الفريق زول حوبة شقيش ما يمش
تلقاهو قدام الرجال حاشاهو كلمتو ما بتطش
من شب قام زولا قنوع ما زك يوم درب القرش
وما شالو حق زول بالغلط وما بيرضي سمعتو تنهبش

في ليلة كان راقد حزين وسارح في الزمن الوحش
كيفن بعد كان حالو زين والسوق مفرهد ومنتعش
مرت عليهو سنين عجاف خلت ضماير الناس تطش
بس فجأة سمع الباب يدق ويا الله قام من الفرش
بي سرو قال إن شاء الله خير واطرافو كلها ترتعش
فتح البوابة بلا نفس وقدامو كان ود الفتح

قال ليهو ادخل قالو لا انا حالي ما داير شرح
قال ليهو جيت والعشم سايقني يا اب رايا سمح
وقفت قصاد بيتي الظروف حلفت يمين ما تزح
البيت معاهو المدرسة خلني بي ايدي ازح
والنخلة هادي قدر تشيل ياخدوهو قبال يصطبح
قال ليهو بس نقع البنوك سلفية والحال ينصلح
قلبة وقلبتين يا رفيق وبعدين نشيل نحن الربح

يا إمة نقع الفتل ما الدنيا اصلو فرندقس
يوم انت طاير في السماء ويوم تحبو في جمر الفلس
بس قوي قلبك يا رفيق ونضمك يكون عجوة محس
من بعدو كان درت النجوم تلقاها في شهقة نفس

قبال كمان تصحى الشمس مشى للخزين ود العوض
قال ليهو إلا تمشي معاي اولادي ديك اكلو القرض

اتماسكو الاتنين سوا ودحمد احمد داير يطير
مرات يجك ومرات يخب ومرات تحسبو زي عزير
بس فجاء في لمح البصر لقى نفسو قدام المدير
نفذلهم كل الشروط وفيهم شرط قاسي وعسير

كان الشرط إيه الضمان ما البنك منهجو برمكي
صاحبنا قام رهن الارض الشاربة من دمو الزكي
مداهو معنى الانتماء والضحكة في الزمن البكي
ذرات ترابة تقولو لا والدنيا غرقت في البكى
وين تاني تلقالك حضن ياويك وكتين تشتكي
مين السواي البفهمك يا حمد احمد غير حكي

انا ياني امك يا جناي من قمت زي تمر الفكي
يومو اليشيل فوقك تعب لا بد فوق انا تتكي
لا بد ترجع لي صاد لو حتى في اخر العمر
ربيت اعمامك وابوك وما احتاجو لاعند القبر
يا ابني لا ترهني هو يا ابني عضي الصبر

ود حمد احمد بي اختصار خلط البيصلح بالبضر
ما همو ايه باكر يكون ما طالا حقق للغرض
شال القريشات وانطلق وفي جيبو شيك سمو السند
مبسوط ويضحك منشي وصاحبك يخوجل في البلد
اولادو دايرين يابا جيب صاحبنا يدي بلا عدد
البت تجيهو المدرسة صاحبنا يدي بلا عدد
الحاجة همها توب سمح صاحبنا يدي بلا عدد

لامن شهور الجن مضن لقى نفسو مخنوق بالمسد
الشيكا باقي وقيتا جا اقصاهو لا يوم الاحد
ودحمد احمد انضرب بقى يجري زي القنقرد
مرات يفوتك في السلام مرات يسوى بكى وحرد

بس فجاة صاحبك اختفى همل عقابتو وشرد
ما راعي احساس الورا وما راعي لى البت والولد
ولي زوجتو الممكن تضيع في زحمة الزمن النكد

اسامة ابوزيد
09-06-10, 11:53 AM
الفرح الحزين


يا قلبي الحزين وين تمشي ليه كل الدروب مقفولة
كيفن زول يصل للجامعة يرجع تاني لي سنة أولى
ياما كتار حليلهم ضاعوا في زحمة دروب مجهولا
يزرعو في النوايا الطيبة كان ثمرة ضياع محصولا
الواحد يريد النجمة ما بيقبل يشوفو افولا
تلقى وسط ظروفو يشابي عشمان انو بكرة يطولا
مسكين كان يخادع نفسو بي سحب الخريف وهطولا
متعشم يقول المسرة يوم باكر يدقو طبولا
مسكين ياحليلو اتناسى نكبات الزمان وفصولا
واتناسى انو نحن غلابا احلامنا العراض مطبولا
من زمن القراية شراي ما بشوف غير سيوف مسلولا
كل ما اقول وصل لي مرسى القى احزاني شادى خيولا
قاسي الزي يقلى الداريو نقاي يعرف المصقولا
اول ما يقول ديك لي كل خلق الله بكرة يجولا
عايش فد سؤال جواي ليه لحظات فرحنا عجولا
وايام الحزن تندب زي السلحافية مهولا
اختلطت على ايامي قدامي الهموم مسدولا
ممشكلتي العلي ومالبي ما هو مرض دوا وكبسولا
اه اه اه اه اه اه اه
اه من دنيتي واقدارا اه من جحيما وهولا
شينا الزي بلقى الدايرو منو الدمعة ما مقبولا
لكن يا رفاق بالدغري كلمات بي صراحة بقولا
انا كان جنيت او ودرت تبقى ظروفي هي المسئولة

من كوستي
09-06-10, 07:26 PM
نحن عرفنا كيفن لكن اظن السؤال موجة لشنابليون وسمسة وكشة وبكى :o

اسامة ابوزيد
10-06-10, 09:32 AM
بلة شوقي يوم أنا وإنتي ناوين السفر
الدنيا كان ساعة مغيب والواطة فيها عقاب مطر

يوم شلتي إحساسك نبيل
وأنا شلت في قلبي القدر
ابكي ومعاي يجري ويسيل
دمعك على خدك وتر
يا .. قسوة الدنيا التشيل
من روعة الليل القمر

يا سر حياتي الدنيا ليل
اتذكري البقعة البحر
قاعدين على شاطي الغرام
نجدع على الموية الحجر
ترسم دواير ألمي المصير
وقدراً رضينا عشان قدر
نبكي وعلى العتمة المسير
شوق والحزن ماليني صر

وبعدك قدر ما مر يوم
يبقالي بس باكر تجي
أقعد براي انا والنجوم
يملاني صمت الليل شجي
امسك ولاد أهلي الصغار
وفيك يبقى طول الليل حجي


كانت سميحي وسُط سماح ...
كانت قمر ..
كانت نسيمي مع الرياح
مغسولة بي موية بحر
لامن يشع نور الصباح
أنا والصغار فوقك حجي
ونقعد نغني الليلي راح .. الليلي راح
الليلي راح .. وباكر يجينا وما تجي

اسامة ابوزيد
10-06-10, 09:36 AM
مشتاقين يا بت واطاتنا
يا قمراتنا ..
وضل نخلاتنا
وأبيار حني ،،
مشتاقين واشواقك مرتق
وحس الطير في الساقي الصني ،،
مشتاقين وهوايا يلولح
في التمرات
والريح بتغنى ،،
مشتاقين واليوم إتراوح
والإيديين في القيف تتلاوح
ياأفراح شيلينى وفنى ،،
لعب الكاك في كير إحساسك
ها لمحبوب وين طلوح مني ؟
يا اشواق ركيني احبك جوه حنين رفقاتي وسني
ويا اجراس خصمتك بالله في صناية الذكرى ترني ..
***
ومشتاقين يابت واطاتنا
مشتاقين والكون الواسع جوه عيونك
اصلو عيونك
من يوم فتك ما فاتني
كل الدنيا بشوفك فيها ..
في قمراتنا العاد تطفيها ..
في حيشانا الطيبى كأني ..
إتوسدت حنينك دافي
لا أحزان لا دمعات ما في
زى ما تقولي شجيرة حني
وفي إيديك الريح حتني
زرزور جني .. وداير اغني
إنتي إقترحي غناوي اللهفه وكل الشوق الفيني يثني ،،

ومشتاقين يلاك نغني .. يا جلابا وياجلابا
يااا جلابا غناوي الإلفه في ضلماتنا التبقى نجوم
ونتحداك ( ياحمت ديره ) .. ومن عداك ؟.. والحجي تقوم
ونتوطاك ياشوك الساقي وفي سقاية الدنيا نعوم
ويا الله ياااا الله
يا الله شتلات افراحنا في واطات احزانا تقوم
وفرحانين يابت واطاتنا
بين ضحكاتنا وضي قمراتنا نبدأ نرص ،،
ونبدأ نقص ،،
من ديكت السالف ولا ها ليوم
وريحة المحلب فوق يا احمد
فاطني السمحي ولول النوم
متقالدين في حضن اماتنا ومندفين بي حن ابدوم
***
ومشتاقين يا بت واطاتنا
واحكي لي يا بت واطاتنا
واحكي لي ..
احكي لي من وإنتي بتبكي
نص الليل جاهراك الشمعه
احكي لي ..
احكي لي وانا قمت مسافر
إتعديت بيوضه النقعه
احكي لي ..
احكى لي وانا لسه مسافر
لا طبيت لا ناوي الرجعة
لا لميت في ضحك الفاقه
ولا إتيقنت عليك يالدمعة
ومشتاقين آه مشتاقين
مشاقين يا بت واطاتـــــــــــــــنا

اسامة ابوزيد
12-06-10, 01:35 PM
رســـالة أم







بكتب ليك بي قلــم الكوبيــا
ودمع الكوبيـا البلّ تيابهــا
وبالي عليك مشغول طوالي
ماسك الباب راجياك فيّ
ولا تجيها بشارتــــك فجـــأة
بعد ما طالت غيبتــك فتــــــرة
أمك وارثة حنانها وراثة
وما بتوصف حالـــها الفيهو
وكل صبــاح نتوقــع جيتــــك
يكون معلومك بعد الليلة
خوفها عليك من جور الدنيا
رسالـة أم مابتقــرأ وتكتــب
من عينيها يسيل ويصبصب
وفي أفكارها نشوف ونقلــب
تزفلهــــا خيراً منك يطـــرب
جيــة الغائــب المتــلك تعجــب
وفؤادها عليك مقطوع ومصلّب
وشوقهـــا الفائض ونارو تهبهب
وبي عافيتك وبيك تهضــــرب
ما عايـــزاك في الغربــة تقنــب
ومن الزمن البقي متقلب
وباقــــي جــدك محتاجلـــك
وجنيــات الحوبة وعمك وخالـك
منتظريـــن فــوق نــار جيتـــك
يلا اتحـــرك ومـا تتنصـــل
وفوق هوليقتك أعرض وبشر
إيديك معتــاده على كشكوشهــا
دا إنت الدخري المـــن شبيـــت
وعارف حدك وحد ناطورك
أمسك الدفتر من مبداهو
حوبتــك جــات قول بســـم الله
المحــرات راجيــك بــي بقــروا
بقــرة المســرة نجاحهــا عليــك
قالــت ليــك حفيرهــا مســرب
والحبّـــان والجــار متشـــب
كان في الصبـــح أو بعد المغـــرب
قــوم بـي واجبـك شمّــر وتلّــب
وســط الدكــة الفيــها مكــدب
هش الطيــر قبــال ما يخــــرب
ما بترتــــاح لو حتـــى مـــوتب
وحافـــظ الحصـــة خبير ومـجرب
وكتين تبقـــى بــراك وضّــرب
وفتـــح عينــك وكــون متــوثب
هيــلا هوب كيـف يلا نكضـبّ
وتاني الخيـــر راجنـــــو يتســــب

اسامة ابوزيد
12-06-10, 01:37 PM
سندباد فى بلاد السجم والرماد
إلى الشقى .. جَنَا الشقى .. المصطفى جَنَا سعيد ،


-1-

ملعون أبو الغُربه

وملعون أبو عِلانْ ،

القالْ تهاجر .. يجيكْ

شِيتاً كتيرْ . . بلحيلْ

شِيتاً يجيكْ بالوَعَا ..

وشيتاً يجيكْ بالليلْ

ناساً يجوكْ طاشينْ

وواحدين يجوك ْ نازلينْ

من السَما العشرينْ ،

زىّ الخِدرْ .. داجينْ

شايلين كلامَ الكتابْ

وشايلين كتابَ الكلامْ ،

وشايلينْ . . كمان شايلين

كلّ السَمحْ .. والزينْ ،

-2-

سمِعْ كلام السَفِيهْ

وقُمتَ دَجيتَ

ومشيتْ وراكْ يا سرابْ

ناماً .. أنا حِفيتَ ،

كُلْ ما أدور أرتاحْ ..

أشم دُعاشَكْ قريبْ

وأتابعَ السِكة ،

يا سكة آخرِك وين

يا سكه وين الوصول

داير لى ضلا زين

وزول يقول لى الزين

يقعد حداى يكب الجبنه .. فنجانين

وأقول كفاى .. ويقول .. تدفنى .. تانى .. اتنين

يا حليل ضلول الضحا

ويا حليل بيوت الطين

ويا حليلن الطيبين

العندهم حقك .. حتى ولكان ملين

-3-

يا حليلْ نسايم الليلْ

فى مقرن النيلين

وحليوة الحلوينْ

عينيها براقين

شايلين خريف وشتا

وصابين علينا . . حنينْ

-4-

يا حليلْ أهلنا الكتار

والمو أهَل . . وكتار

يجوك وكت الفرح

ويجوك ساعة الترح

وبينن ساعة الترح

وبينن اللتنين

يجوك خفاف وسراع

ويقولو ليكا .. سلام

ويجيك معاهم سلام

-5-

يا حليلْ كَبوبنا وعَجاجنا

ويا حليل سجمنا ورمادنا

وزعلنا دون أسباب

وفرحنا دون أسباب

وبُكانا دون أسباب

يا حليلو هُه الما غابْ

راقد تقول تمساح

حارس العقاب بالناب

راقد تقول محدود

فى الدنيا . . من غير حد

طيب . . وزين . . وفقير

وغروره فايت الحد

يا اخوانا – بالله

قولو لى كيف الزول

يقدر يخون بلده

مهما تكون بلده

تعبانه . . فايته الحد ،

من كوستي
12-06-10, 05:14 PM
والله ياسمسة حقت قلم الكوبيا دى بكتنى لمن قلبتا شايقى قويييييية ياخ



قلبى علي ولدى وقلب ولدى علي الحجر

اسامة ابوزيد
13-06-10, 10:14 AM
والله ياسمسة حقت قلم الكوبيا دى بكتنى لمن قلبتا شايقى قويييييية ياخ



قلبى علي ولدى وقلب ولدى علي الحجر

يا من كوستي البكاء برييييييح شديد

اسامة ابوزيد
13-06-10, 10:15 AM
كلمات المبدع شاعرنا الحاج محمد سرالختم
غناء الفنان طارق العوض

حُـــبي الـفـقـدتو بعد وَفا عَكَّر لي جَوِي بعد صِفا
وصِـبـحـــــــت ســعــــــــــــــــادتي مـــن المُحال
جَمري القديم ما كان كَفى موقِد يَلهـلِب وما انطفا
جَـــــــــات تــــــانـي هَـبــَتـــــو ريـــــــــــح منال
ريـــدنـا الزمان مالو اختفى مالا المودة بِقَت جَفا
ريــــدًا انـــت عــــارفــــــــــــــو حُـــلـــو وحَلال
الـبـِت دي وين كت شايفا أو مَرَّة واحده مَصَادِفا
يــا صــــــح تـــقـــــــــــــولـو سـمـعـنـــــــــا قال
رُوحي المـَشَـحتَفة عارِفا مالا السِّيرة بِقَت تَخَوِفا
شـــــــــــن دار يـــكــــــــون سـبــبـا غير الجمال
مـسـكــيـني فـاقِـدي عَـواطِـفـا عَشمِاني فيك تَوالفِا
راجــــــــــــاك تـَجُـــــــــــــــــــــودلها بالوِصَال
قلبي العليل كايس الشِّفا لو شِلـتو في حُضنَك دِفَا
كــان بـالــــســـعـــــــادة عِـــمـيــــــــــــري طال
قَدَمِي العليك سَاسَق حِفا هو بَراهو حَالتو يَوَصِفا
يـَغـــــــــــــنِي الـبـيــشـــوفــــــــــــو عن السؤال
غــالـبــــــني حــالتي أصنِّفا وِشِّي وقَفَايا بِقَن قَفَا
وبـقـى جِـــــســــمــــــي دايـــــــــــمــا في انتحال

اسامة ابوزيد
13-06-10, 10:17 AM
وفـــــــــــــــــــاء

وفاء ليه بتملي المويه انت حـرام عليكـي تشيلـي
ماكان حقو تملي الباقة شان هي عليكي فاضية تقيلي
انت الزيك ما بخدمو ضمه إلا بس الظروف عزيلـي
والضيف إن جاء للشايقية رابع يوم وقعتو طويلـي
وما برضاكي تمرقي بره بعض الناس نفسو رزيلـي
راجنك تمرقي يشوفو كيف ايـد الله فيكـي جميلـي
قالوا المويه من ايديك دوو يشفي الرويحتو عليلـي
لوبلقالي منها شربة في السنة مرة تشفـي غليلـي
عودك حكمة السواهو زودو فوق ندايـدو خصيلـي
ضيعو وسوه لي خوفي ينعقد أوعي تنسـي تميلـي
وحيلك كلو في عينيك والأيـد مـا خلـق لهاحيلـي
أيديـك تتعبـه الهبابـه والعيـن متعيبالـه قبيلـي
جاتني أمس العشيب لبيه تشكي من الزعل تشكيلـي
قالت انت شلتي جمالنا خليتـي لنـا حاجـه قليلـي
ليه يدوكي بي ماعونو شان زي ماك دايـرة تكيلـي
وعارفك من زمان يا عيني اصلك نا بتعوسي عديلي
تكشفي حالي للدايرنو ما برضيك شئ غير بهديلـي
الشئ قبل لساني يقولو حالا دمعـة دمعـة تسيلـي
لو ما انت شن وراني عينـا ناعسـه والا كحيلـي

بكي
13-06-10, 11:34 AM
واصل ياابصلعةوعليك الله لو سمحتا اغنية ماساتي
نهديها لي حبيبنا وقريبنا الشنبلي

اسامة ابوزيد
13-06-10, 12:02 PM
الزول دا مشى غسل شواكيشو بموية زمزم وتاني ما بياخد شاكوش

عرس طواااااااااالي

اسامة ابوزيد
13-06-10, 12:08 PM
تشرحى حالك الجواك

شنو العندك عشان اديك من الجواى

كفاى اسكب عليك دمع الاسى وابكى

وكفاى رحله عمر جنبك توسخى فى بياض قلبى

وانا المجبور اشيل ذنبك براى

براى انضم سبحة الشوق

تنوم انتى وانا الصلاى

اساسق فى دروب الريد وانتى المابتشيلى خطاك

ولا هان يوم تعدى خطاى

واسفاى واسفاى زمان كان العشم باكر

باكر كفتك تتقل ترجح كفة الميزان

وباكر جا

وانتى مطففه وظالمه

ليكى تكيلى بى مكيال

وتدينى حبيبه حب وشوق كُضب

بقر مافى الهديه حبال

مابيقنعنى ظلمك لى ولا ليك عندى طولة بال

ولابتنفع كليماتك ولادمعة العيون السال

ولابتشفع غنيواتك ترانيم الندم موال

خلاص جفت مواعينى

بقت بيكى القلوب غربال

فلا اسفاً على القمره على الضو الكتب احلام

ولا اسفاً على الواطه وكت رسمت خطى الاقدام

بفتح صفحتك بيضاء وعليكى الف سلام

عليكى عليكى الف سلام

اسامة ابوزيد
14-06-10, 09:07 AM
حبيبتي مدينة من الطرب

سيد أحمد الحردلو

:::::::::::::

-1-
لم أَعْدُ افهمْ شيئاً في السياسة
و أنا مثلُك ما عادتْ تُسليني السياسة
فَدَعينا من تعاساتِ السياسة
و تعالَي نتسلي
فَوْقَ شَطِ النيل
هَلْ يُوجد في الدنيا جمالٌ مثلُ هذا !
أُنظري وجهِك -و النيلَ- و تُوتي
هَلْ تُري في الكَون سودانٌ كهذا!
فلماذا لم أُشَاهدْ كُلَّ هذا الحِسن مِنْ قَبْلُّ
لماذا!؟
-2--
أُنظري وجهَك في الماء-
كما الحُلم رَقيقاً و جَميلاً
و أنظري كَيف أثارت
نظرةٌ منك النخيلا
فَتَجَاري وَ تَبَاري...
قبلّْ أنْ يغفو قليلا،
-3-
حدثيني عنك
من أي بلادِ الحبِ
و الحُلم أتيتت!
و لماذا وهبَ اللهُ
جميعَ الحُسن في الدنيا إليكِ
و لماذا حِين تَمشِين
يسيرُ الغيمُ و الغيثُ عليك
و يجيئُ الناسُ مَكْرُوبين
ينسون لديك!
حديثيتي أنتِ ،
مَنْ أنتِ ،
و مِنْ أينَ أتيتِ!؟
-4-
هل هَشَابٌ أنتِ ...
أم هل أَبنوسْ
أم أَرَاك أنتِ...
أم أنتِ نخيلُ!
فلماذا كلُّ شئٍ
فيك حلوٌ و جميلْ
و لماذا أنتِ...
حلمٌ مستَحيلْ!
حديثيني
يا إبنةَ النيلْ النبيلْ ،
-5-
... حبيبتي مدينةٌ من الطَربِ
فالوجه سيمفونية
و الثغرْ عنقودٌ من العِنَبْ
و الصدرُ جنتان من رَُطَبْ
و الخصرُ زوبعةٌ من اللَهَبْ...
كلُّ حبيبتي حلوٌ ...فلا عَجَبْ!
-6-
لا تنظري للوقت- يا عزيزيتي-
فالوقتُ في مدينتي حَطَبْ
-7-
لم أَعُدْ أفهمْ شيئاً في السياسة
إنها شئ من الرجسِ
و بعض من تَعَاسة!
فدعيها و تعالي
نشربُ القهوة
في مقهي علي النيلِ جميلِ
و أجلسي في الركنِ
حتي أَتَملي وجهكِ
المنضُوم من لونِ الأصيلِ
إن في عينيك آلاف التصَاويرِ
و آلاف حكاياتِ الرحيلِ
و المطاراتِ التي غادرتُها
و المطاراتِ التي عدتُ إليها...
من رحيلي
فأرشفي القهوة بالثغر الذي يرشُفُني ،
و أتركَيني في رحيلي!
-8-
... مَنْ مِنّا سيدفعُ الحسابْ !
أنتِ بلا عَمَلْ
و أناَ بلا عَمًلْ
فمَنَ مِنّا سيدفعُ الحِسابْ!
جيبي غَدا مثل خَلاءِ أُمدرمانَ
من سنين...
و ليس في جيبي سوي تُرابْ
و حِفنة من طينْ
فَمَنْ منّا سيدفع الحساب!
-9-
لا تنظري للوقت - يا عزيزتي -
فالوقتُ في مدينَتي تُراب!
-10-
إني أُريدُ أنْ أقولَ
أنني أحبُ فيك
الصمت و الفضَولا
و أنني أُحب فيكِ
الرفضَ و القُبُولاَ
و إنني مذ جئتني
أصبحتُ بين الناسِ...
للهوي رسُولا
و أنني أَودُ أن أَشْكُرَ...
يا حبيبتي جمالَك الجزيلا
و أنني أَودُ
أن أظلّ شاعراً
و أن تَظلي شِعْرَه الجَميلا

اسامة ابوزيد
14-06-10, 09:11 AM
بقيت ماك نار شتانا القــُر
ولاك ضل حرنا القلاي
فقدناك يوم عوجة الحي
ويوم سكلب قلبنا احّي
ويوم نزل الدمع جراي
****
فقدناك يا البتلحق وين
فقدناك يا المغيبك شين
فقدناك يا الجنا الغناي
****
ليالي طويلي ماك باين
ولاك صاين عهود شوقنا وعهود الحب
هبوب ساكت تعدي كلام مواعيد لقيتك كُضُب
وانا الراجيك يوسف وين اتاريك في بطون الجُب
قفاك اديتو للاحلام
حبيبك سبتو للايام
وتــُب فوقو اشتياقك تــُب

****
منو القساك علي ناسك
علي قعر الحياة وراسك
بياض نيتك منو الودر
منو القصر مدى احساسك
منو الغشاك بالدنيا وسكن جواك وسواسك

***
مداين روعتك عامرات
وجناين حبك الوارفات
تبجن فيها بي فاسك
منو القساك علي ناسك؟؟؟

اسامة ابوزيد
14-06-10, 04:49 PM
مسدار المطيرق
الحردلو – عبدالله احمد ابوسن
********
أصل المسدر أن الحردلو كان معجب بفتاة اسمها الروضة بت
السرة وكان له ميعاد معها لشرب القهوة فحضرت لموعده
ولكنها وجدته نائماً فأخذت عصاه (المطيرق) وعادت بها
ادراجها واخفتها لكى تثبت حقيقةحضورها .

فخرج هذا فى إطار التداول الشعرى العادى الى اشبه
بالمسرحيات الشعرية فى صورها المعروفة حيث تتضمن
عناصر الحكى والسرد فى الإطار الشعرى وهناك تشبيهات
فريدة وبليغة .
********
يبتدر الحردلو :
ذكــرتـى بـالـبــنـــات لا عــن مـصوع فاحت
ضــايـــق غـلــبــهـــن مـن شـيـنـــتــن بتاحت
جــدع ودعــتـن بــالـلــيــم عـلــى مـا طـاحت
هـبـــرت كـفــتـى وعـقـب الـمـطـيـرق راحت
فقال له عبدالله مداعباً :
أصـبـحــت الـمـطـيــرق فـى نعـيـم وسروره
وات الـنـــوم عـبــدتـو وما قريت لك صوره
سـاعـتــيــن إن صـبـر كـت تحظى بالبتدوره
ســعــدك إن رقــد مـا بـجــبـر الــمـكـسـوره
الحردلو :
ســرفــة عـيــنـى داك الـلــيـــله مــاهــا مريه
أصـبـــح حـــالتى مـثــــل الــدخــلـو الظبطيه
أتــرجــــــاك يـــــا ابــو الـــتــــايــه اول سيه
مـا اتــواخــد اكـون فـى حـالـة غـيـر مرضية
عبدالله :
مـســـامـح يــا ابــو يــوســـف ولــو فـى مـيه
نـعــــمــــن لـلـــدغـــس بـتـــمـــســح الـقـافيه
إن بـقــى لـلـمــطـيــرق شـيـلـه جاب لـو حكيه
مـى مـســـروقــة لـكـن فــيـهــا حـكـمـة خفيه
الحاردلو :
بـعــرفــك وكـت تـقـوم فـى حجازه واجواديـه
تـبــذل فـيـــهـــا جـهــدك بـى صــفـــاوة نـيـه
مـعــلـــوم تـصــلـح الـبـطحــانى والـشـكــريـه
لـكــن الـمــطـيــرق مـا بـتــجــى غـيـــر ديـه
عبدالله :
شـيـلـتـهــا فـى الـحــقـيــقــة مـثـبـتــابــا الجــيه
خــوف مـســـك الـضـهــر والـلـوم مـع الكلــيه
بـى أســـبــاب الـمـطـيــــرق لا تـشـــيــلـك ديه
أنــا مــلـــزوم بــهــا وعـقــب الـضــمــانه على
الحاردلو :
مــطــرقـى مـن بـشـــم مـــرداء مـن الـغصان
ونـونــايــا كـتـيـــر جـــادعـــاه عـلـى الـجديان
ســراق الـمــطــيـــــرق فيـهـــو نــوع رسيان
مـو مـتـل سـراق حمارة المسمى اخوك حسان
عبدالله :
شــرف الــمــطــيـــرق سـيــتــهــا زى الـــزان
دا كــلـــو الـــســـــبــــب بـريــبــة الــعــنــقـان
والــمـــنـــاهــا هــا الــســرقــة ام حــديـثـاً بان
كـــان تــتــنـى فـــوقــــهــــا نـكــتــــر الأوزان
( أنس ... وصمت )
ويدخل عدلان ود على
جــيــب قـــاف الـمــطـيـرق خــلـنــا الـنـتـسـلى
نـتـجــادعــبــو فـى مـجــلـس أخـــوك عـبـدالله
اضـحــك وانـبــســط خــل فـاطــرك الـلـنــحل
مـى مـســروقـه اصـلـهـا عـنــد بـرنـجـى الحله
الحردلو :
طــول بـــالـــعـــســيــن قــــانـص بــــدور كلبى
مــا لــقــيــت مـســـتـحــق نــمــى ونــوادر قلبى
دحــيــن يـا راضـيـه كـان فـد يـوم معاى تنسلبى
هــاك يــا ســمـحـة زى مـا تــدورى منى اطلبى
عبدالله :
مـن حـســـس أم رشـوم الـحـار بـقــول وآ غلبى
مـمــا لـقـيــت لـى وجـيـعــاً يعرف الحاصل بى
شـمــبـــانـيـــهــا مــو بـــرانـى خــافــس قــلـبى

اسامة ابوزيد
14-06-10, 04:51 PM
تبكى

كف الدموع لا تبكى ارجوك يا جميل
ربك يهون كل قاسى عليك لو كان مستحيل
ياخى الدموع انا بكرهن لو سالو من طرفا كحيل
ما برضى وحياتك قسم فد دمعة فوق خدك تسيل
ياخى انت حقك تبتسم تضحك تملى نهار وليل
شان انت ماك شبه الدموع تبكى انت شن بيسو ديل
ماانت ناجح فى الجمال والناس محبتة ليك قليل
والحكمة ناجح من زمان يوم اتولدت بلا مثيل
ليك انت واهلك والمعاك لو درت بالاردب تكيل
ادوك سبيب اسود طوال سود على ليلى الطويل
فك الرباط بى صفحة سال شوف عينى قرب للكفيل
وادوك عيون فيهن رموش رامالى ضلها للمقيل
صيفها وشتاها محل تقيف تلقاها برضو رمت ضليل
وادوك قوام من خيذران لو داعبو الهباب يميل
فيك عبير شميتو فاح مسخ على ريحة الفتيل
اما الضمير قرب يروح بالجوع قضاك بقيت نحيل
وادوك قديم خطوة حمام وحلان وفى التاتاى عطيل
فوق البلاط بين الفصول دايرلو صاج وترس تقيل
الامتحان لو قلتى حار ما تنسى ربك بيك كفيل
ما انت ذاتك حار وهن من حرك ادوهن قليل
من اهلنا جيتك صاغ سليم كيف ترضى انى اصد عليل
ياخى العزيز بالروح بيفدو وانا راضى منك بالقليل
ضحكك براهو كتير على ليك منى عليهو شكر جزيل
واقع وراك ما تقولى ابيت والناس يقولو عليك بخيل
طلبى الوحيد بس تبتسم تطرح وشيك متل قبيل
فيك جلا ربنا ذو الجلال انا شفتو فيك جل الجليل
لو ما الكمال لله وحدة انا كنت بقول كامل اصيل

اسامة ابوزيد
15-06-10, 02:15 PM
سافرى خطوه عديلي توصلي بالسلامه

وعيني منها شيلي افراحا ومناما
ودعها الليلي منك بي ابتسامه
تبقا ذكري طويلي لايوم القيامه
من هناك قوليلي حصل بالسلامه
نذري ماهو بليلي فوقي عجل كرامه
ابقي شجره ظليلي زي ضل القمامه
فيها يبقا مقيلي روحي تجم عضاما
عارفك انتي فضيلي بت اهل الشهامه
دار ابوكي مهيلي يغشوها العشامه
هادي راسي تقيلي بانقيش كلامه
وفمشها مهيلي خطوه قديم حمامه

اسامة ابوزيد
15-06-10, 02:17 PM
انت وين والناس بتسال ... الحبيب مو جاي باكر !!
والوطن من غير عيونك .. لاهو طيب ولاهو عامر
واي زول في الحلي فاقدك .. والعيون تبكي وتساهر
الضليل حتة مقيلك .. الفناجين والبنابر
الحيط جير ا المغبش .. ختة ايدك فيهو ظاهر
وظاهر اكتر فوق كتوفنا.. يوم مقالدنا ومسافر
انت وين يازول فقدتك .. ياقمر ليلنا وضياهو
ياغنانا الكان بردد .. في فضا الايام صداهو
اشتهـيناك والله شاهد . وشوقنا واصل منتهاهو
من رحلت وراكا راحل.. قلبي في عتمة هواهو
عنك العابرين وينشد .. هسة كيفن والمعاهو
يبقو كيف يا الله زييّ .. وزي عيوني المشتهاهو!
مرة واحدة حلمت بيكا .. جيت وبالاحضان تسالم
ياكا ذاتك بي صفاتك جيتا طيب وجيتنا سالم
همبريب الحلي جاها .. وهبهبت تاني النسايم
كنت وين والشوق كتلنا .. قاسي قلبك ضُمة ظالم
انت روحنا ونور عيوننا وانت كُلنا والله عالم
اما عني وسر هوايا .. ليلي والشوق و الاماني
ابكي لامن روحي تمرق .. واحردك وواهواكا تاني
واستريح في الذكري واطري .. هجرتك كانت عشاني
وريدك العلمني اطلع .. قمة الحب والتفاني

عمار صالح
15-06-10, 02:38 PM
سمسم لوتكرمت وجبته لينا غُنا النعام ادم وود كرم الله والخال ودجباره
تكون ماقصرته وديل عندهم اجمل المفردات والاغاني الرايعه ومعاهم صديق احمد

اسامة ابوزيد
15-06-10, 02:40 PM
بس كدا يا السلام عليكم

حااااااضر .. عندي شوايقة معاي وبلقط ليك منهم شوية شوية

عمار صالح
15-06-10, 03:05 PM
بس كدا يا السلام عليكم

حااااااضر .. عندي شوايقة معاي وبلقط ليك منهم شوية شوية

تســــــــــــلم ياقمــــــــــــــــرنا
راجيك

اسامة ابوزيد
15-06-10, 03:27 PM
ما ترجاني

انا عندي مشوار مهم جدا" والله

امشي وتعال بكرة

اسامة ابوزيد
15-06-10, 03:55 PM
الفرح الحزين وين تمشي ليه كل الدروب مقفولة
كيفن زول يصل للجامعة يرجع تاني لي سنة أولى
ياما كتار حليلهم ضاعوا في زحمة دروب مجهولا
يزرعو في النوايا الطيبة كان ثمرة ضياع محصولا
الواحد يريد النجمة ما بيقبل يشوفو افولا
تلقى وسط ظروفو يشابي عشمان انو بكرة يطولا
مسكين كان يخادع نفسو بي سحب الخريف وهطولا
متعشم يقول المسرة يوم باكر يدقو طبولا
مسكين ياحليلو اتناسى نكبات الزمان وفصولا
واتناسى انو نحن غلابا احلامنا العراض مطبولا
من زمن القراية شراي ما بشوف غير سيوف مسلولا
كل ما اقول وصل لي مرسى القى احزاني شادى خيولا
قاسي الزي يقلى الداريو نقاي يعرف المصقولا
اول ما يقول ديك لي كل خلق الله بكرة يجولا
عايش فد سؤال جواي ليه لحظات فرحنا عجولا
وايام الحزن تندب زي السلحافية مهولا
اختلطت على ايامي قدامي الهموم مسدولا
ممشكلتي العلي ومالبي ما هو مرض دوا وكبسولا
اه اه اه اه اه اه اه
اه من دنيتي واقدارا اه من جحيما وهولا
شينا الزي بلقى الدايرو منو الدمعة ما مقبولا
لكن يا رفاق بالدغري كلمات بي صراحة بقولا
انا كان جنيت او ودرت تبقى ظروفي هي المسئولة

اسامة ابوزيد
16-06-10, 02:00 PM
مشورة
________________________________________
يا خلا دلوني الطريق قايدني بيكم مشورة
عاشق يهد ليل فوق نهار أسعد عيون أسهرة
***
زولاً متيم من زمان كم شاب طالب المشترى
لكنو ماعرف الوصول واقدامة ثابتات في الترى
تابع دريب زولا حنين في دربو كم ساسك جرى
وغلبو اصطياد قمريتو حد مادودرى
***
الله على زولاً هلك في عتبة قدامو ووراه
يتباكو كل ماذكروا مدرسة ولا قالو مذاكرة
انت الأماني الفي القليب آمنا بيك يا جوهرة
لمتين رجوعك للقرير صبحت بلاك مكدرة
***
انا زولي ضاوي وجيهو زي القمرة نايري مدورة
والعود نداوتو الخيدران والقامة زي المسطرة
خلقي وعيونو مكحلات يوم بي كحل ماجرجرة
مافيش شبيهو بلا المحيط في كل مداها ومحورة
***
حزمة سبيب للعاشقين مردوم مدفق بي ورة
أما الشفاه لهجن عسل كلمات يقطر سكرة
أما القوام قايم يداب موجو زي نهر أدبرة
بشتني خلى الناس تقول مجنون دا قبالو وبرة

اسامة ابوزيد
16-06-10, 02:02 PM
مرام الطفلة البريئة التي اغتصبتها الذئالب البشرية
في اول ايام عيد الفطر المبارك
قال فيها الشاعر الكبير حاتم حسن الدابي هذه القصيدة:-

*******
مرام مرقت على الجيران
ومرن ديل كم ساعات
غابت نجمة الضيفان
واكتست الارض ظلمات
مرام ما جات…!!
حكاية كان وياما كان
حكاية تشيب الولدان
حيرت الانس والجان
وبرهنت انو ما في امان
رجع وأد الطفولة زمان
زمن عبدة(هبل)و(اللات)
بعد لبست جديد في جديد
مرام مرقت تبارك العيد
وقفت سمعتنا نشيد
حلاوة موبايلا الفي الايد
مع التسريحة والباندات
اتاريهو الغدر منصوب
مسطر ومافي منو هروب
برغم رضانا بالمكتوب
ده غدر ما وراهو سكات
بدون إنزار..بدون اسباب
مرام غدروها جمب الباب
مرام هجمت عليها ذئاب
طباعم من شريعة الغاب
ملاكاً حولوهو رفات
قلوب لا رحمة لاإحسان
مدبجة بي صفات شيطان
وظهرت قدرة الرحمن
محل اسنانها هو الاثبات
دريبها على الارض منقوش
سريرها من العصر مفروش
معالمو باقية وسط الحوش
ملابس الروضة واللبسات
بعد شمس العصاري تغيب
مرام كانت تودي تجيب
عندها بسكويت وحليب
في تلاجتن راقدات
وحيدة اخوانا والوالدين
عليها يخافو متمنين
تتعلم تتم الدين
وليها يوزعوا الشربات
*******
يا صاحباتها وينها مرام
سماح يادوبو فرهد قام
عمير ما تم خمسة اعوام
ملازماها البراءة سمات
عيال الروضة ياسمحين
لمن جيتو متماسكين
ما شفتوها راحت وين
مرام سرقت منام العين
مرام حرقت حشا الامات
وليه بتقول مرام ما جات
*******
مرام كلما وجيها يلوح
تبق جوانا احساسات
مرام بقت القلب والروح
سحابة تخدر البلدات
مرام غصة حلق مجروح
تقوقيها القميريات
مرام صفحة كتاب مفتوح
يقروه الطلبة والطالبات
مرام عصفور يئن مجروح
ما شفعها الدمعات
مرام جزء من (محمد) و(نوح)
و(تبارك) و(عم) و(النازعات)
مرام شربت محاية ولوح
وفي ساعة المغيب بخرات
مرام دعاء للجميع مسموح
بعد ما تكمل الصلوات
مرام حاتظل سؤال مطروح
جوه بيوتنا والطرقات
مرام حاتظل سؤال مطروح
وسط اولادنا في الجامعات
مرام حاتظل سؤال مطروح
موجه للشباب بالذات
وليه بدت السماحة تروح
إرث اجدادنا والعادات
*******
اخيرا داير اجيز القول
منو المسؤول..؟؟!!
تقول دي ثقافة البتر
ولا سيف العولمة المجهول
الدجتل مع المحمول
افلام فاضحة والمسكول
عموماً…….
بيوتنا في فك غول
مخيف اسموا الفضائيات
ومرام ما جات..!!

اسامة ابوزيد
17-06-10, 10:18 AM
معذرة.. لو معاك منى الكلام حـــــره .. معليش الخطاب كاتباهــــــو مضطرة
حـــــــــــرام والله مننـــا إنت تتبرا .. خمسة سنين تفوت تجى فيها فد مرة
وراك أنا كم شقيت وعشت فى مرة .. وتعبـــت مع البطان الهم للعيون غرة
بيخاف الغرق الغاص ورا درة .. قالو أدب الصغار والعقــــدة من خدرة
حليلى أنا الزمن ضى فاطرى ما انفر .. وخمسة سنين غياب مابتحملن حرة
أنا الحاضنة العذاب وآمالى محتضرة.. وإنت الفى النعيم ما خات حساب بكرة
مسكينة التقول فى الإغتراب سترة .. وتتناسى القروش فى يوم تكون ضرة
حليل زمنك وكت عايشنا بالأُجــرة .. يا ريــــت لا عرفـــــــت ولا مرق برة
**********

الكاتما فى جواى كتير متملك الجوف والعصـب.... وما كت دايرة أقولو ليـك لكن لسان الحال غلـب

ما بنسى يـوم ودعتـنا وسافـرت فى غـرة رجـب. ...خلـيت وراك الـدار حـزين يتباكـا والدمع انسكـب

أعذرنى والله العظيـم لو ما الضـرورة أنا ما كـتب.... وأنا خايفـة فى بعـدك يكون الضاع هو ضعف المكتسـب

اليومـة داك ناس البلـــد هنونى شايقيــــــى وعرب.... قالو لى مبروك خير وجاك يكتب سلامــــتو الإغــترب

قالو لى دوب نجم السعد طلاكى من بعـــــد إحتجــب.... يا دوبا بالك يستريح وتنسى العـــــــذابات والتعــــب

فضّلت أحسب فى الشهور قاعدالى فوق نيران لهــب.... صابرة وحريصة على العيال لا بيقو للريح فى المهـب

سديت خانتك مــن مشيت قايمـابو واجبــــى كأم وأب....والأســــرة يضنيها المسير .. وتتهاوى لو ما فيها رب

والله ما بنــــكر جميلك برضـــــــــو لينا ثناك وجب.... موكب هداياك ما انقطع .. كان سترة فى الزمـن الصعب

لابسين وماكلين والنعيم كايلنا فى يوم ما نضب .....وعايشين معيشــــــــــــة المترفين .. طولنا والطبع إتخرب

البيت مفرش بالحرير ومليانة إيدى بالدهب.... لكن خسارة على محل .. عاش سيدو خمســــــــــة سنين عزب

الشى المهم ما قلتو ليك وليهو إنت ما ظنيت حسب.... كبرو الصغيرونين خلاص .. خايفالم الطبــــــــــع الكعب

وصولوها مرحلة الخطر .. والأمن ما زال مستتب.... وانا كتّ قادراهم زمان لكـــــــــــــن بعد كبــــــرو اتغلب

حصلنى قبل الجد يفوت .. دوبنهم فوق العتب.... قبال نحصـــــــــــــــد الخير ندم .. ومابيجدى كان لمت وعتب

خايفالم الطيش فى الدروس .. ومابرضى لو واحد رسب.... خوفنى المتعبنى الكبيـــــــــر بعدين يمرقو بلا أدب

وريتك الحاصل على لا فيهو ثورة ولا غضب ....شان الحديث مايبقى نى .. والواحــــــــــــــــــة يكتنفا الجدب

أنا قلبى مازال لسة حى .. ونجمو الملاهج ماغرب..... وآخر كلامى ترد على .. لا أبقة بكـــــــــــــرة أنا السبب


ما كنت دايــــرة اقولو ليك .. لكن لسان الحال غلب ..

اسامة ابوزيد
17-06-10, 10:19 AM
معروف من قديم انو الجمال نسبي
وللموجب دوام لابد من سلبي
لكن نتفق رسمي وكمان شعبي
الطمبور علاج لكل مرض عصبي
سبحان الاله خالق العباد ربي
سوا قدح حراز دكا راصي العربي
مكسي جلد بقر ومطلي وتقول دهبي
وفوقو تلات عصي واقفات بلا شعبي
وخمسه سلوك حنان موزونه بالنسبي
لو رنة تزوب ترقص جبال كجبي
البركل يمر يتحول العقبي
لو ما كت بخاف والناس تشيل كضبي
كت بقول يرن وتتحل لوكربي
اندح الوئام بين الخلق يدبي
والبوسني الجريح يستئمن الصربي
بالطمبور دوام يتلاشي كل سلبي
وينشرا الفرح من كايا لا اوربي

اسامة ابوزيد
17-06-10, 10:23 AM
ســـافـر
الفاتح ابراهيم بشير
جعفر السقيد

عليك الله سافرعليك الله شيل الأمانى معاك
وشـوف البـيـبـكى عـلـيـك أو حتى يترجاك
أنا تـعـبـتـا خـلاص مـن جـورك انـت على
تـزعـل بـدون اسـبـاب ومن تانى ترجع لى
خلـيـك مـعـاى واضـح لا يـبـقـى قـولـك نى
يـا انـت ابـقـى مـعـاى يـا انـتـى مـالـيك بى
رغـم الـحـصـل والـكـان ياما صبرتا علـيك
كـان الـعـشـم جـواى تـصـدق معاى عينـيك
لكـن غـرورك فــاض كـتـل الـبـراءة الـفيك
خـلاك تـقـول مـجـبـور أنـا بكره برجع ليك
اوعـك تـظـن فـى يـوم أنـا قلبى برض الذل
او يـسـتـكـيـن هـيـمـان ويـرجاك عند الضل
انـت الـفـتـحـت الـبـاب وقـت للخصام ادخل
وانـت الـزرعـتـا الـشـوك وقلعت شجر الفل
أنـا فـى النهـاية إنسان مرهف رقيق حساس
ودايـر اعـيـش فى امان واصافى كل الناس
لكـن إذا جـاء الـريـد فـوق الـكـرامـه وداس
مـجـبـور اقـول الـقــول الـقـالــوا بـوفـراس
فى شعـروا قـالـوا كلام مدهش جميل يسبى
لا تـمــلـك الـحـسـنـاء مـهـمـا تـكـون قـلـبـى
أنـا بــرضى زيـو كـمـان أعـلنت لى حربى
وعـايـش قـلـيـبـى بـقـول يـا اخوانا آيه ذنبى
والله يــا الـمـريــود خـلـيـتـنـى فـيـك محتـار
مـرات بـشـوفـك نـور مـــرات بـحـسـك نار
مـرسـالـى وكـتـيـن جـاك قـابـلـتـو بـاستهتار
ومـا تـنـسـي أى حـديـث دائـمـاً بدايتو شرار
يـا قـلـبـى اصـبـر اصلـو الظروف قاصداك
مـعـلـيـش إذا جـاء الـلـيـل وخيم على دنياك
عـذراً إذا الأحـــلام اكــبـر مــــــن الإدراك
وعـفـواً اذا حـبـيــت زول مـاعــــرف معنا

اسامة ابوزيد
17-06-10, 10:30 PM
اليتيم كلمات : الحاج محمد سرالختم
قلبى المن حنانو بيسقى مالو من الحنان محروم
واصبح زى يتم فاقد امو من اول سبوع مفطوم
الناس بالحظوظ تتهنى مالى انا حظى عاثر وشوم
والزول مابيفوتا قسمتو لازم نرضى بالمقسوم
دنياى مالا جايرى عليا فيها مصيرى ما مفهوم
اصلها لو تدوم لى سيدا كانت للقبلنا تدوم
جيت لاهلى الكبار داير اشكى قلت بينصرو المظلوم
قالولى قبل ما احكى غلطان كلت حد اللوم
بس كان قصدى افرح مره لو كان فى العمر فد يوم
اسعد بى لقاك واتهنى ارقد اضوق حلاوة النوم
الهم لى زرع تيرابو جوه قليبى دايرو يقوم
فعلا قام ودلى فروعو شالت وحتت الخروم
واديا المخرف داجى ما ظلت سماهو غيوم
والصيد البيردو عشيى طفشو من حدا البعشوم
روضى الدابو فتح زهرو مالو بقت طراوتو سموم
طول لابيشوف طير جنى والا فراشه فوقو تحوم
اسكت ياقلب لا تبكى تكشف سرك المكتوم
الفات لو بجيبو بكاكا ما كان لى سكاتنا لزوم
عوم وقت اصلك اتبلبلت والاتبلا اخيرلو يعوم
عوم وقت انت عارف ال الله زارعا فى الحجر بتقوم

اسامة ابوزيد
17-06-10, 11:16 PM
شجرة النص

تحتك يا شجرة النص
خط واضح يقسم الحلي نص بالنص
فوق يابس تحت رويان
محل اتفرقن الايام سنين راحن وسنين نلقاها لا قدام
شريط بيلف .. يسجل في خواطرو الكان
هناك احمد قعد يحسب سنينو الراحو منو زمان
وكت جاهل وكت طالب وكت بقرأ
آ احمد وكت بكتب علي لوح الخشب
آيات من القرآن
وكت برضع من الدنيا معاني التقوي والإيمان
يقوم بعد الصبح .. احمد .. صباح الخير
لعلك زين .. عشان العين بخور تيمان
وكان يادوب بدأ المشوار .. عليك يا سكة الدنيا الملاني احزان
يشيل خرتايتو في كتفو .. كرارسيو .. واحاسيسو
وعقاب حرفو ..
عشان يفطر من العوان
واسع يا شجرة النص .. تحتك أحمد الإنسان
يحسب في سنين عمرو ويراجع في حياتو زمان
حمارتو الغبشة والساقي جداول الموية والحيضان
تمر الروكة يا احمد قسمة النصبه والتدان
حق الناس حرام يا احمد وأخيرلك بتاكلك النيران
حقوق الجار تشوفا يا احمد والله موصي بالجيران
ويقوم احمد علي الله
ويسكن في رحاب لله وبيوت الله الملاني إيمان
يحب الجار .. يموت في الطار ونار الخلوه والحيران
أحمد يعشق الواطه .. واحمد يزرع الواطه .. واحمد شتله في الواطه
يشرب هو جناينو أقران
يقوم احمد فرع أخضر مخدر بالفرح رويان
مفرهد وشايل الأشواق يقالد أمو بي تحنان
يغطيك الله يا احمد .. ينجيك الله يا ولدي
عشان احمد بلا اخوان
فرع واحد مفرع من شجرة الحن ضلو بيرمي للجيران
وأحمد اسه بتذكر ويحسب في سنين عمرو
ويتذكر ليالي زمان ومنو القام في البلد قدرو
ومنو العرس ليالي العيد ومنو المات في الشتا وحضرو
وكت بلعب شليل وينو وكت برمو العضم يجرو
وكت بينوم مع حسان ويتاقو عليهم الديوان
وابوه يقوم فجر عجلان .. مع الآذان
يصحيهم عشان يقرو ..
وكت بيشيل غناوي الشوق دموع جواه منحبسه
يصل عند الجرف يسمع من التمر الطوال همسه
وكت بطرح وكت بجمع وكت بقسم علي خمسه
وكت بلعب مع العوان كاك الجدعة واللمسه
ويعوم أحمد بحار الذكري والماضي .. وهناك لا شاطئ لا مرسي
ويكبر احمد الشافع بعد وروه كيف يكبر
بعد ربوه بالايمان بعد قاللو احمد هوي
لا تسرق ولا تسكر ..
الا احمد يقوم يرحل .. يفوت يرحل .. يزور العاصمة والبندر
يتوه في زحمة الخرطوم تعجبو حلاوة المظهر
عرف القاعة والنيلين وكيف بعد الصبح يسهر
يغيب أحمد سنين وسنين وما عارفنو أحمد وين ؟
حليل أحمد ..
خلاص يا الحاجي إتغير ..!
خلاص يا يابا داير أقوم ابوه يقوللو .. وين احمد ؟
خلاص انا يا جنايا كبرّ وكيف بتسيبا ام أحمد
وكت تمرق تلاتة أيام تابا وراك عديل تحرد
وكيف بتسيبا يا ولدي تعيش في الغربة تتوحد
وقدر العندنا آ أحمد نعيشبها لا بنمد الليد
ولا بننزله لا بنشحد ..
إلا أحمد مصر يرحل .. رابط رايو واتعند
تنادي الحلي يا أحمد شباب الحلي يا أحمد
بنات الحلي يا .. وولاد الحلي يا ..
امو تقوللو يا أحمد ابوه ينادي يا أحمد
واحمداغرتو الإسفار
باع امو وابوه خلاص .. حلاوة العيش وطيبة الدار
وسافر لي بلاد بره وكان تمن الأهل دولار
ويرجع للبلد تاني ..
بعد سوه الدهب كيمان
ويسأل يا خلايق وين
وينو أبوي ؟؟
حليلو أبوك يا غافل خلاص اتغطي بالنسيان
ليهو الرحمة يا أحمد وليك عزانا السلوان
وينا الحاجة أم أحمد ؟؟
حليل الحاجة يا مسكين عمت ما سكنها الجيران
وتسيل دمعات عيون احمد ويحس بالوحدة والحرمان
تمن الغربة يا مسكين ياهو الحسرة والأحزان
أبوكا يموت وما تحضر .. أمك تعمي ما تحضر
عيش باقي العمر ندمان
ضم الحسرة والآهات
حنس دفتر الشيكات
خلي يجيب عيون أمك
خلي يجيب أبوك المات
يقايض الفرحة بالأحزان
وحليل أحمد
احمد هسه ما احمد .. ازولاً مقلبو الشيطان
يعيش ويموت علي الذكري .. يروح بالدنيا لي بكره
يموت ويعيش بلا أسرة .. بلا أخوان
حليل أحمد وكت جاهل .. وكت طالب
وكت بقرأ ..
آ أحمد وكت بكتب علي لوح الخشب ..
آيات من القرآن

اسامة ابوزيد
17-06-10, 11:17 PM
طول الليل مانمت بفكر .. فيك والنيل وأنين الساقي
وجدول شوقنا الطالع منك .. ودالق فينا حنينو وساقي ..
****
طول الليل بيناتك راحل .. لامليت لاقلبك ضاق ..
إتكلمت معاك عن بكرة .. واتونسنا كتييير ودقاااق ..
وكان الليل من جوة عيونك .. دالق حنو علي العشاق ..
إتمنيت ماتشرق شمسو ..
ويفضل دفئو .. حنو وهمسو .. ويفضل ضي إشراقك باق ..
ولامن شمس اليوم التاني ..إنتي أماني ..إتجزرتي وطي الأعماق ..
وإستوطنتي مداخل قلبي .. ومهما طال في دربك دربي ..
الأشـــــــــــــــــواق ياها الأشـــــــــــــــــــــــواق ...
****
طول الليل الفات بالذات ..كنتي معايا وكنا رهااااف ..
شلنا غناوي اللهفة مشينا .. وحمنا الدنيا أرياف أرياف ..
إتواعدنا تحت تمرايا ..إنتي معايا .. صورتك واااضحة ومابتنشاف
إتعانقنا عناقا حااار .. إتواثقنا من الأطراف ..
وإتعاهدنا عقاب أيامنا .. تبقي عليا وأبقى عليكي .. آلأف آلاف ..
****
طول الليل وعيونك تنده .. يا أحضان ضميني عليك ..
وفيض الشوق المني مدفق .. طالع مني وداخل ليك ..
يملا بيوت الدنيا أماني ويظهر سرو علي عينيك ...
****
طول اليل يابت نتناجا .. والعينين فايضه ورقراقه ..
ميتي قلوب بي شوق عينيكي .. وميتي عيونك بي أشواقا

اسامة ابوزيد
18-06-10, 10:40 PM
يا حبيبي انا افتقدتك

انت عارف روحي غيرك لا بتموت لا تبقي حية
يا حبيبي انا افتقدتك لما طال الشوق عليا

يا حليلي انا كنت قايلك من زمان مهتمي بي
في الحزن تحزن معايا ويوم اغيب تسال عليا

باختصار انا كنت دايرك تبقي اقرب مني ليا
انت تاريك بي مشاعرك مستقر فوق الثريا

الصباح الفي عيونك باعني لي مر الاسية
سابني بين شطانو هايم جاري لا عند العشية

انا لاني قادر اقول كفاية لا ني راضي اكون ضحية
المصيبة انا كان بكيت ول جنيت هيه هيه

الليل ... كل مصيبتي هويت عيونك في زمن ظالم شوية
يكره الحب والتفاني ويعشق الجفاء والرزية

الطيور وكتين تغني الزهور تصبح ندية
الا عاد كيفن تغني وعينها فوق عين الحدية

الليل ... افتقدتك وانت عارف زي يقضي الليل سجية
مستعد ما عندو مانع انو يهدي الروح تحية

لا بهادن لا بسامح لا ببيع ابدا قضية
لو تمر الدنيا فوقو ارتكب مليون جنية

افتقدتك يا مناي يا سعد روحي الشقية
لما فاضت بي همومي والامور لاجت عليا
افتقدتك يا نصيري العزول عاصب عيني
افتقدتك يا صباحي الظلام ضامي العشية
افتقدتك الف مرة لما شمتوا اصحابي فيا

شفت كيف انا افتقدتك قدرة الالم العتية
انت ماك جايب خبيري وما بتفكر تبقي جية

حتي يوم لاقيت صحابك منك اتوقع تحية
الا وا خيبة رجايا ويا حلات الحسرة بيا

اسامة ابوزيد
18-06-10, 10:41 PM
محمد جيب الله كدكي في لوحة جميلة جدا قلما يفطن لها شاعر أو تستوقفه

لما تكمل الرقصة
وتقلب توبها فوق راسها وتقول كدي تجري تندسى
أشيل طمبوري أباريها وأنقرش أباري كرعيها
ومعاي القمرة تاريها تصفق ودايرالا فرصة
وتقول كدي تجري تندسى
اتوه في طاسة وشيها وأدور بي طرفي أغتيها
في حال عين زول ما تجيها .. متين من كف ليها رسى
وتقول كدي تجري تندسى
بتتكسر من قواما متل ما بتكسر كلاما
تعوم وتحاكي الحمامة نفس القدلة والدقسة
وتقول كدي تجري تندسى
تقلب الدنيا بي حالا وتخلي الدارة ملالة
سماحتن نان يا جمالا وقت تاخد ترسى ترسى
وتقول كدي تجري تندسى
دموع البت بلا الفرصة تصحي مدرس الحصة
من عينو تطير النعسة وتعال شوفلك جنس جرسة
وتقول كدي تجري تندسى
فوقا تلبش اللبسة وجمالا خمسة من خمسة
خدودا بلا الحرير ملسة وهي ما بتستحمل اللمسة
وتقول كدي تجري تندسى
غناي ليها بلا مدسة غنا زولا ضارباه فلسة
يا العزب أب ليلا أمسي كدي اتحرك يا دي العرسة

اسامة ابوزيد
18-06-10, 10:43 PM
ودي برضو قصيدة لشاعرنا الرائع كدكي..





حاج حمد إحمد فى العمل .. زولا بضربو بو المثل
من الله خلقو وقام معا سلوكتو ... ما ضاق السفر
طول عمرو فى البرود يزح ويقعد يداير فى البقر
وزمن السقط يعملهن كر من فلق ورف الشجر
لكين وليدو الكان زمان تعبان عليهو
ويقرى فيهو واديتو ليهو بلا المطر
دقس المدينى واشتغل دى اربع سنين فوقن شهر
راقد قفا وقاطع الخبر ومن عندو قلالة آب تصل
وخل أمو قالبى الواطة ملى تسوى
زول ورهيف دحين داير القفر
مرات يقولها ياولية اصبرى ما خاب من صبر
ومرات يقولها يبقى راقد موجعو شى
كان وردى ولا وجع ظهر
ومرات يقولها يبقى راح بارا الهواميق والسهر
بس غايتو قلبى على جناى وقلب جناى علي حجر
ومن ميسو دبا على كريمى وخش توووووف ركب القطر
لابسلو مركوبا نصيييييح وحاقبلو شنطة الت طفيح
لملم هدومو من الحبل شكاها فيها كسر كسر
وسداها بى كسرة جريدتا ناشفى عارضا زى كشر
وقالك كدى اتحكر قعد حكيرة جد
وجر من حرفو المتمر زين كمان قلم فطر
وقطارو ... توت توت توووووت كو نتل
دفق المى تب ما خلا جر
واتفكى ماشى مشى الرماد بقى فى القضيب يشكى العجل
وصوت السلك دا يسوى ززززن والدغفلى وقلبى انقطع
حاج حمد احمد قضى يومين فوق الحطب مانام شخر
ينوم بى وين ؟؟ دا قطر كريمي .. المي ملان لا عينو ديمي
وكتين يجى التمر ؟؟ مكمود كمد
والمنقة وكتين تستوى تلقاها للوكاي زرد
كترة كلف قايل شنو
وابا ما يشيلنا ود منو
عفشا جبال والدنيي حر جرا حمد احمد عرقو تر
وكتين يجى الكمسارى مار تلقاهو بالنطيت فتر
وتلقى الشكل ... لكين قبل يصل الكجر
الناس تعود للقرقراب وتلقى اللكل سوا والشراب
غايتو كدى وكدى فى القطر
حاج حمداحمد قضا يومين خير وشر
ولمالو فى ولدا بيعرف ولدو فى حقو انستر
وراهو درسو معا بعض
والليلى جيرى جوار بعض
ويوم التلاتا من الصباح
اتفكو من قطر المرض
وداهو لى بيت ولدو داك البي هناك بلاخبر
وخلاهو روح جاى ينوم .. فعلا غمد
وتلاتا دقت بى هناك انكان وقف حيلو انسند
وناس المكاتب لى ورا .. تب مافى زولا انكرم
وكان ولدو عاد من جملتن
للسوق غشا وشال الرزم .. ودافس ركب باصن يئن لامن وصل
شايلو اكياسا غلاد توستا وعنب باسطة وعسل
شيتن كتير بالحيل يأكل كم نفر
ويقدل عليك يالله كو للباب دفر
ولقى ابوهو قدامو اتهجم
وقبال يسالمو وقف سعل
إي ؟؟ ابوي ؟؟؟؟
ياب ما معقول الجابك شنو ؟؟؟
ياولد تنقطع ريحتك
يعنى مستغرب اكنو بلاخبر جيت
وفتحتك للباب لقيتنى انا جوا فى البيت
ما دام ياب ضراع كم اجازى قضيت شن بسوى
ترانى قمت معاك طبيت
وقمت ساكت لى الله سهلى الطريق وفى القطر لمانى ولدا ليك رفيق
اقيف اسمعني روق .. قالى قارى معاك كلية الحقوق وبيتو منك جبدا ساكن قبلي فوق
عندى قلبا عليك كيفن حنين ومااااااااااااب تعرفو بلا تسويلك بطينين
تبكى امك زاتا كانت جاي لكين
بيتنا ماب يتفات وخيانك صغيرين
وماشفتا غناها ليك البى الجرانين
الشى نضما كلو يهرد فى المصارين
مرة بيهو تنونى ومرة تحصنك زين
وتقرى ايت الكرسى ومرة معاها يس
ياولد ... اتقونن شوى اوعك من الدين
هسع الخميتو جبتو دا كلو من وين
لاتبقى خدمتك فى الدلاقين المهم فى البنك وفرلك ملالين
جيت اسوقك للعرس لاتقولى ملحوق باقى امك ديك هناك مقلى قلى بالشوق
لابتين تقعد هنى وراسك دا مطلوق
المحل بندر كمان عيشتك من السوق

اسامة ابوزيد
18-06-10, 10:44 PM
دارنا الولوف



من شوقي لى دارنا الولوف أنا قلبي كاتلاه الحفوف
والله حاكماني الظروف
داراً جميل فاق الوصوف زي جنة أم قطوف
طنبور ونقارة ودفوف والعرضة بالخيل والسيوف
في دارنا مرق البيت عطوف مهما يكون شايل سقوف
عارف الزمن وكان منّو خوف ياحليلنا كل الحي ضيوف
متمني ثاني أرجع وأشوف شفعّنا فوق البيت صفوف
في النيل يترترو في القحوف منظراً يخلي الزول مشغوف
أنزل هناك أقول وأطوف من فتني لاناس أبنعوف
ألقي الحنان في حزمي طوف وزينة القدم مليان حروف
ساعة تكون خدرة الجروف وحميدة تلعب بالحروف
في البوغة تساوي الكتوف والناس تشير بى أبي الكفوف
محظوظة بت عبد الرؤوف جابت عريساً ماهو فوق
متل الأسد مرفوع أنوف في طوبة من أجداد وصوف
داير حضور عبد الرؤوف وحبوبة تحرّق في الضلوف
الزول يشم لامن يسوف ويرجع بعد عميان يشوف
أمشى ألقي بت عبد الرؤوف جاها العريس الماهو فوق
متل الأسد مرفوع أنوف في طوبة فوق الحوبة صوف

السمريه
18-06-10, 11:55 PM
ياسلام عليك ياسلام شنو الاوتار الحساسه دا والله روعه والحديث سوف يكون عذب لي عوده ياسمسم

بكي
19-06-10, 05:10 PM
سمسم راجينك ياحبيبنا

اسامة ابوزيد
19-06-10, 06:16 PM
السمرية انتو اهل الشي ذاتو فعودي

بكي اها جيتك داير شنو يا شين

السمريه
19-06-10, 08:15 PM
عزي ابوك يا الرايقه حاكيلنا الوزازين
الرقيبه قزازه زي البانه في اللين
ما الزبيب ؟ما الخوخ؟وما الرمان مع التين ؟
في زهور خديك محتاره البساتين
ناس فلانه وديل ساكت عناوين اليبارنك ينجنك من العين
العيون كشافه والفاطر بلا الصين مالي كان جنيت ؟
كم لله مجانين
عزي ابوك
الشاعر :حاتم حسن الدابي

السمريه
19-06-10, 08:35 PM
ديل دكتورات مو لعب جابن الدكتوراه في الطب
امتحانين مهما صعب منهن خاف ود الكلب
ديل سميحات ذي الشلب والقليب في صديرن لعب
النسائم وكتين تهب من جليدن ينشم طيب
الكتيف مهدول بالسبيب اصفي لونن مما قريب
الضمير محذوق منسلب احجبن يا صاحب الحجب
ديل عنب تكا الشخاليب مسهن للمرضان يطيب
ديل مريضن ابا ما يطيب في النجم يرعي العنقريب
نظرتن لو تقذف لهيب تحرق امريكا وتل ابيب
ديل طويرات جني في حبيب والبسيمات شخب الحليب
مسخن عجوه ود خطيب حاشا ما اتعلمن الكذب
النغيم ذي العندليب شوفتن تفرح للكئيب
دكتورات
للشاعر :حاتم حسن الدابي

اسامة ابوزيد
20-06-10, 07:54 AM
ما قصرتي تب يا السمرية وهاك الطمبور دا




الشاعر: الفاتح إبراهيم بشير


الطمبور صديقنا وعزنا وملجانا

وكتين السنين تفتح بوابة أحزانا

مما قمنا نسمع فيهو لا ملينا لا ملانا

زي إبل الرحيل شايلي السٌقا وعطشانه

أوتارو الحنيني تملِّي عايشي معانا

في الريف والحضر ومحل ما تمشي خطانا

الله لو بشيشي تداعبو إيد فنانة

تتراقص جميع الدنيا بي أركانا

لو قلبك حجر وغنانا شايفو رطانه

أول ما يرن تلقاك طربتا معانا

إحساسك يذوب قامتك تميل طربانه

زي مرّ النسيم وكتين يداعب البانه

الطمبور سماحتو القمرة مالي سمانا

الليل والسكون والرملة كالمرجانه

نتلملم نكون في شلة زاهية الوانا

نضحك ننبسط لما الصباح يلقانا

وفي رواية اخرى معروف من قديم

انو الجمال نسبي وللموجب دوام لابد من سلبي

لكن نتفق رسمي وكمان شعبي

الطمبور علاج لكل مرض عصبي

سبحان رب العباد ربي

خلا قدح حراز دبكر أصيل عربي

ومكسي جلد بقر يلصف تقول دهبي

فوقو تلات عصي واقفات بلا شعبي

وخمسه سلوك سونان موزوني بالنسبي

لو رنت تذوب ترقص جبال كجبي

والبركل يمور يتحول العقبي

ولو ما كت بخاف والناس تشيل كضبي

كنت بقول يرن تنحلا لوكربي

وأنداح الوئام بين الخلق يدبي

والبوسني الجريح يستأمن الصربي

وينشر الفرح من راجا لاوربي

اسامة ابوزيد
20-06-10, 08:00 AM
يابلدى ياحبوب

عشانك بكاك الريح

عشانك فؤادي جريح

عشانك أنا مقتول

وبموت معاك مقتول

عشانك يا حزن نبيل

عشانك يا حلم جميل

عشانك يا بلد

يا نيل

يا ليل

يا سمح يا زين

يا بلدي يا حبوب

أبو جلابية وتوب

سروال ومركوب

وجبة وسديري

وسيف سكين

يا سمح يا زين

يا وجه مليان غنا

مليان عشق وحنين

يا بنت يادوب

شايلين تخا وفي رخا

شايلين بنات وبنين

يا سمح يا زين

يا آهة يا نمة

يا مدحة يا عمة

يا واحة في الصحراء

يا خصلة يا قمرة

يا بشارة يا بكرة

يا سمح يا زين

يا غابة قمحية

مشرورة فوق البلود

زي الصباحية

يا مزرعة باباي

غضبة الهبباي

يا نخلة مسقية

من ريق دبيشية

يا مقطعين دوباي

نازلين على الدنيا

أشواق وحنية

ياسمح يا زين

يا ليل ليل وليلية

يا نيل ونيلية

يا مرمي تحت الشمس

للقيلة ضلية

يا سحنة نوبية

يا كلمة عربية

يا وشمة زنجية

اسامة ابوزيد
20-06-10, 08:06 AM
مرثية كدكي لأمه


نبكى بالدمعة الحزينة عليك يا أمـي الحنينة
رحـت تاركة الحزن فينا مين بلاك يشفـق علينا
يُمَة ليكى الفضـل كلو نحن في حضنك ربينـا
كم سهرتي ليالي فوقنا كان بكينا تسكــتينا
نسمع احلي حكاوي منك كنت بيها تونسيــنا
عن عيونك لو بعدنا كنت حـالاً تفقدينــا
ياحبيبة روحنا كنـت إنت اكثر أم رحـيمـة
من بحـورك شلنـا طيبـة نيـة زي نيتك سليمــة
كناّ ساعة الحـر نشوفـك فوقنا اجمل واحلي غيمة
يمة تاني بعـد رحيــلك السنين ماليها قـيمــة
لا لا ما بننسـاك يمــة زي حنانك مافـي تاني
كنت مرشدة ديمة لينا بيكي حققنا الأمـــاني
بسمتك في قلوبنا خالدة كل حي في الدنيا فـاني
والصباح ماطـلّ جانا الاّ ذكراك في لسانــي
الليلة طعم الدنيا حنضل ضلمت من انت غبتــي
زادنا بعد الدمعة آهة لما سبتينـا ورحلتـــي
وشلت فرح البيت معاك ياما شلتي وياما شلتـي
مافي غيـــر الصبـر يمـــه ألـف رحمة عليـك أنتــي

اسامة ابوزيد
21-06-10, 09:01 AM
يا الله وين خاتم الـمنى
في رمشة العـيـن الأبـت بالـشـوق تـنـوم القاك هـنا
ارقـد عـلي حضـنـك انوم تملاني ريـد املاك غـنا
مـا انتـي يا بحر الشـعـاع الشمـسـو غـابـت مــن سنه
لـسع بيغـسل قلـبي نـور يشـرقـني يـا ضي الـهـنـا
يـا الـقـمره ويــن السـنسـنه لا حــتي فـي طـرق
الــشـعـاع المن زمـان فـوقـك بـنا
هي اقـلـبي الصـفحه الـعلي الـسماء مـن هـناك مادام هنا
زولي البدي الدنيـا نـور ضلـم رحيلـوا الامكنـه
***
تراهو زي ما الطيف يمر الليل يمر اليوم يمر والعام يمر
وانـا فـي الـدريـب الفـتـا بيـهـو ألــم اتــر قـدمـك واصـر
ارجـي المسافريـن وانشـدن هـوي فـي المـدن مـا شفـتـوا
زول شـايل بـشاشات الــفجر ؟
مـزج الصباحات بالمغيـب لون خــدودوا مــن العـصر
وآه يـا بـيـوت لا دقــه بــاب لا فــات حيطنا العنكبوت
***
وانا لسه راقد في الرصيف
راجيك تقيف قدامي قبال ما اموت
دنيا من بعدك يباس ينشرا فــي الـوديـان سكوت
يا الله يوم كدي بالنهار فرح المواسم نفرعوا
صوت القطارت من بعيد فوق الفلنكات نسمعوا
اشواقنا والناس الزمان وكل المسافرين يرجعوا
المح حبيبي انا من بعيد يهجم قليبي ويقطعوا
حزن السنين الفينا ساد انا وانتي سوا سوا نقلعوا

اسامة ابوزيد
21-06-10, 03:16 PM
خالي كان صاحب عزيمة * * * والولد خال قالوا ديمة
بطرا شمارتو القديمة * * * و ماشي لي حش الكريمي
مدي كان أخواتوا قيمي * * * في المطر يلحق حكيمي
وضالي ما مرقت نجيمي * * * يجينا يجري نعل سليمي ؟
في الوتد حتى التميمي * * * منو ماخدي صور عظيمي
ماب يدور جوع البهيمي * * * و البت الفاسخي الصريمي
البنسي قديموا تاه * * * ماب اتوه أنا عن قديمي

كوكا
21-06-10, 03:33 PM
مبــالغة ... كلام سمح بالحيل

زيدنا :D

اسامة ابوزيد
21-06-10, 03:40 PM
لك المزيد يا كوكا لو ربنا مد في العمر

ولو رحنا الله ريحنا منها ومن التعب فيها

سامية الصديق
21-06-10, 08:41 PM
حسن الدابي
يا محبوبة

يا محبوبة ما بنساكى
ارحمى حالى انا الحيران ودايماً باكى
الخلانى ليل ونهار اجرو غناكى
لو وضعو القمر قدامى ما بيسواكى
العبََادى فرََ فريرو ايه لسناكى ؟
حكمة الله دعجا وكاحلات عيناكى
ديسك ليل بهيم منو الكتيفات شاكى
صدر جوز قنابلو انا منهن فى حواكى
جدية صيد درع ما زاولك شراََكى
بلدك صى بعيد واديكى سارحة براكى
القلب العليل الراهنا بين يداكى
قلتى تداوى من علاتو وينو دواكى ؟
ريدك ليهو لو خليتى ما خلاكى
لا ترتيلو زيدى عذابو يتحداكى
ناوى تزيدى فى تعذيبو ولا كفاكى
المى انا ما مهم بس قصدى احوزو رضاكى
يصبح يومى عيد كل ما عيونى تراكى
بس انا ذنبى ايه من دمى تروى ظماكى

اسامة ابوزيد
22-06-10, 09:00 AM
عفوا حبيب قلبي
الشاعر الفاتح ابراهيم بشير

انا قلبى عشان ينساك دايرلو تانى زمن

عفوا حبيب قلبى ما انت لى وطن
***********
انا قلبى ذنبه شنو عودته انت عليك

علمته يبكى ينوح يوم ما يشوف عينيك

وكتين ملكته خلاص فريتها لجنحيك

خاطبته باستبداد قلت ليه اختار ليك
**********

هو الصبار المسكين راجى اليالى تروق

لا كل لا مل لا عاتب المعشوق

كل القدر قاله ياناس كتلنى الشوق

والضقته فى دنياى ما ضاقه قط مخلوق
********
انا يا خلائق اه ضقت العذاب اصناف

شلت الليالى سقد تشهد تبارك وقاف

جربت صبر ايوب كانت نهايته جفاف

والصابنى يالمريود بالعين محال ينشاف
*************
لو دار تعرف البى ارجوك مرة تعال

اقعد وعاين بس ما تسال اى سؤال

انا يا حليلى انا اصبح يمنى شمال

جوايا عشرة اشياء خلت حياتى محال

حظى التعيس الشوم الغيرة والعزال

ليل الضياع والخوف والحيرة والاهمال

انك تملى معاى و بيناتنا كم اميال

احساسى انى بسيط واحلامى واقفه جبال

صبر اً صبرتو عليك ذكرنى سيدنا بلال

حتى ان سكت انا تتكلم الاطلال

وآخر المطاف بالليل سافرت باستعجال

لا طلت بلح الشام ولا ضقت راحة البال

*******
برضك تقول لى اصبر اتحمل المكتوب

واتعوض الله خلاص انسانى يالمحبوب

خلتنى ذى عصفور هبت عليه هبوب

فنتله عشه شمال شالت صغاره جنوب
ـــــــــــــــ

اسامة ابوزيد
22-06-10, 09:05 AM
الريد الخرافي



إهداء إلى الشاعر محمد سعيد دفع الله

الخوة تقول بقت مافي
آمُحمد ليش بقيت جافي
بعد ماكنت زول وافي
وتناضم الطير بالقوافي
وقمت ضربت الفيافي
وحرمت الناس من عوافي
حليل زمن الزمن صافي
وأيامنا مع قوز قرافي
حقيقة مجمّع ثقافي
وحليب في ضرع أمو دافي
بحر شوق بلامرافي
ولساني ناروا ميوبسي شافي
إبر ذي طعن الأشافي
دهـ شيتاً غلب المطافئ
كدي أقعد عِدْ من زفافي
وراجع المضي ماهو خافي
حجاب الله وعلي العافي
صلاة النبي مُدة كافي
سعيد انشاء الله إنت عافي
وسعيد بي حُسْن الضيافي
ومنُ ضمن العمل الاضافي
مواصل الريد الخرافي




النية زاملة سيدها
أم سر حليلة حاج نُصر
أبواتهم الاتنين أشقا
ولا سعين و راضعين شُطر
بيقولو وكتين عرسها
أكبر عليه عُفر وقفر
لكن فى شان بت عمه بس
مجبور عليها وعرسها
وزول غيره ما بيجى بالجبُر
مرق تلاتاشر سنه
قاعدين وماجابو الجنا
وبيقو غايتو يجرو هنا وهناك
للفُقرا خايفين العقر
مرات مشيهم بالحمير
مرات مشيهم بالكدر
ياشيخنا امسك دا البياض
يومن نجيب جنا ليك نذر
جمبك نجيبه نزينه
ونديك شوالين تمر
مع انه معروف الجنا
شئ قسمة فى إيد ربنا
الشوق وحسن النيه بس
نساهم إنه دا شيتاً كفر
وكتين خلااس عدمو الصبر
قالتلو عرس يبقى تلقالك وليد
ينفعنا بعدين فى الكُبر
وفعلا مشى وعرس بنية شيخ بدر
وفى غفلة والايام تمر
ام سر بقت من عنقريب مفروش فرش
لى عنقريب قاطع البرش
كرعينا ماتن وواقعه فى الدُراب قرش
تاريها حامل ودا الوحم
شايفاه ذاتها كُتر وكُتر
وبالليل وكت تمرق على الجيران تطل
تقلها تقدل وبالعصا
والشال كمان من فوق راسها طيرةً فقر
وبت شيخ بدر
كانت معاها حنين منين واخر شُكر
شالت وشيها بلا سبب وعيونا انقلبن حُمر
الغيره جاتا وجاها ضُر
خلاها زى الفى الجمر
طوالى تتمدد تنوم
ضل الصباح يكمل تشيل ضل العصر
أم سر مبيضا نيتها
وما قصرت فى خدمتا
مسكينه شايلا كريشتا
كم سوت الشاى والاكل
وقامت محصلا حاج نصر
اندلى باقى مع الفجر
قراع تحت وعرقان يخر
وطوريته هبرت فوق كراعه
واخدت شويه من الضفر
والدم نزل ساكت يشر
من عبه يمرق فى السعوط
مهجموما جات ام سر تجوط
عين السواد ياخيرى كُر
صابحت ليك زولاً فقر
كدى غسل إيدك ديل وهاك
وتبت ضمة الريق قفاك
ودخلن عيونك فى جُحر
والشاى دا ذاتو خلاص قرص
ماشفت كيف بقى عرقه مُر
وساعة فطر
وكب وشرب وأدشى باااااع
قالتلو زين يايابا زين عافيه واجر
شالت مواعينا ومشت
الجدول القراع رماها وكوركت
الحقنى يا دا .. الحقنى يا دا
وجيب لى سعفاةً خُدر
وحصلنى بالبيت من قبل
وداية الفريق بت أبكر
أنا دابى لى سبعه شهور
و ود سبعه قالو طويل عُمر
أنا داير الد " يا الله لى يا الله لى "
الليله ياسابلة الستر
وداها لى بيتها وجرى
وفى إيده جاب الدايه جاء
ومع رمية الضل قريب وكت الضهر
قج الزغاريد فى البلد
والجارى يجرى على نصر
ياحاج نصر
جيب البشاره بلا نكد
مبروك عليك جابت ولد
يتربى فى عزك بخيت
انشاء الله زى ليلة القدر
انشاء الله حضرت الاسم ؟
قال بى فرح وقرب يطير
بلحيل على حضرته خير
طبعاً إسم جدى الكبير
فى موقعة كورتى وصبير
اول شهيد كان بابكر

اسامة ابوزيد
22-06-10, 09:06 AM
يابة أسمعني





أقيف أسمعني روّق يا يابا واقعلك
لا تزعل عليّ سامحني من فضلك
عارفك زول حنين والطيبة ياها أصلك
دحين داير رضاك أنا غير رضاك بهلــك
بجرب حظــي أهاجـــر وحالا أرجعلك
كدى إندلى مع الصباح وأقعد تحت شتلك
وضرب جاى وجاى موضوعي بي مهلك
نحن صرفنا زاد بقي أعلي من دخلــك
وأنا ما عندي زاد في الدنيا غير عقلــك
أنت قمر منير والناس تحــوم حولـك
شامــخ في عفافــك ما في زول وصلــك
من تبيت لقيتك جارى فـوق رحمــك
لقيتك ليك مكانتك في البلد وإسمك
لقيتـك مجتهــد يوماتـي في شقلــك
لقيتك نجدة لي الفي اللجة يندهلــك
لقيتك سيف سنين مابيهزمك كزلك
لقيتك ضو نهـار في هيبّتـك وشكلــك
أديتنا الكتيـــر والله مـن عمــرك
وداير أشق طريقــي برايــة من أجلـك
ودايــر بالعمـــل كالعـــادة أثبتلك
في درب النجاح ولدك غيور متلك
حنانك أبوى نابع كلو من صدرك
وكن أكون شنو أنا يا يابة من قبلك
يانى جنــاك حبيبـــك ما بخالــف أمــــرك

اسامة ابوزيد
24-06-10, 10:10 AM
عم الزين ... ( الفاتح ابراهيم )
عم الزين
يوم الناس قالولك لا لا
واترجوك ماتفوت الدار
ضرب بي كلامن عرض الحائط
وشلت شنيطتك بي اصرار
قلت بسافر يعني بسافر
كل الناس بتقوم وتسافر
فعلا قمت ومشيت رايك
واتصرفت بدون ماتشاور
جيت البندر بي امالك
الا لقيت الوضع مغاير
خاب الامل الجيت عشانو
وقمت تلوم في الزمن الجاير
===========
كنت هناك بالجد متريح
فوق واطتك طالع ونازل
تاكل وتشرب من نخلاتك
وتصرف وتنفق من غير طايل
آخر اليوم لي بيتك ترجع
لا في مدافره لافي مشاكل
لابتقيف في بص شماعه
دمك فاير وعرقك سايل
لانشال ينشل ماهيتك
لاكمساري معالك متثاقل
لابتأشر للملاكي
سوقني معاك ياعم ان واصل
تحرج نفسك انت بتعرف
انو الطيبه انصارا قلائل
==========
انو تعوم عكس التيار
انت براك البدري اخترت
ليه ياقلبي تنوح تتبكى
وتندب حظك ليل ونهار
===========
لمن قمت وجيت البندر
كنت بظن الحال اتصلح
كنت بتحلم بي مستقبل
فيهو ابواب الخير تتفتح
الا لقيت الواقع امرّ
وزينا ناس تعبانه وتكدح
ناسا عايشه معيشة راقيه
بي تلفونا بتخسر وتربح
وناسا عايشه علي الماهيه
من يوم خمسه الجيب اتقمح
وناسا عايشه على خلق الله
يوما شحده ويوما تلفح
غايتو الحاله معادله صعبه
كأنو الناس قاعدين في مسرح
===========
عتدي سؤال بالجد حيرني
ونشف ريقي وراهو نشاف
ليل ونهار شاغل تفكيري
لما بقيت انا منو اخاف
حال الزول القالو موظف
وراتبو الشهري شوية الاف
لو عديت مصروفو الشهري
اكيد تلقاهو اضعاف اضعاف
===========
حلو معاي المسأله دي
وساعدوا معاي العم الزين
زول محمول وعندو اطفال
عشان ماياكلو يجيب من وين
يسرق ينهب يشحد
ولا كمان يغرق في الدين
عندو محمد واحمد وساره
وخمسه اطفال فوقم تومين
لازم يقرو وياكلو كويس
لازمن يلبسو لبسا زين
قولو معاي يسوي شنو
عشان مايعيشو يجيب من وين
===========
عم الزين يعلمبو الباري
ديمه عليهو الجوف محروق
كان في الماضي ركازة الحله
وياهو البربط للمطلوق
هسه وين ياحليلو التايه
ودر واصبح جنو كلام
يصرف عربي مبالغ فيهو
وناس الحي سمو النضام
مرات يضحك لمن تشفق
ومرات يبكي بكا الايتام
عندو عباره تملي يقولا
اوعك تحسبا بالارقام
تتعب نفسك في تضريبا
وآخر حاجه تجيك اوهام
===========
بعد الشفتو براك ياقلبي
اخير لك ترجع منك وليك
خلي وظيفة المكتب طايره
لا لا قسم مالايقه عليك
عود من تاني وازرع ارضك
دي مابتخدر الابايديك
عزة نفسك في واطتك
جنب نخلاتك وبين والديك

اسامة ابوزيد
24-06-10, 10:13 AM
لا تساوم !
سيد أحمد الحردلو

:::::::::::::::

لا تساومْ
بين مظلوم وظالمْ
لا تساومْ
حين يأتي الثأر يجتاح المظالمْ
لا تساومْ
بين أمر الله في العدل
وهاتيك المزاعمْ
لا تساوم
أيها المذبوح في الوطن المسالمْ
إنهم صبوا عليك الزيت والنارَ..
وخلَّوك جماجمْ
لا تساوم
بين رب الناس -
يا وطني - وأرباب المغانم!

اسامة ابوزيد
26-06-10, 01:15 AM
عشان خاطر عيونك - الفاتح اراهيم بشير

عشان خاطر عيونك ديل افارق حلتي وطني
اسافر من بلاد لي بلاد كمل صبري وراح بدني
اضوق المره واتغرب واكون مجبور اشد رحلي
وافوت ناسا حنان طيبين وافوت مرتع صباي واهلي
اشيل الذاد غنيواتن اردد فيها من جهلي
كلام يقول انا الراحل وجاييك بكرة يا املي
جاييك يا غرام الروح لو حتى السنين دار تابة
وجاييك لو سنيني تدور وتدوس امالي انيابة
وجاييك لو يطول الليل ولو يبقى الوطن غابة
جاييك قولي لي كيف انساك وانا السافرتا عشان عينيك
فت درب الوطن والعزة والحله المنورة بيك
فت امي وقليبه الحاني وحاجات تاني خافي عليك
وانت لا تشغل قليبك بيها ما دام الصحاب حوليك
قول لي يا حبيب برجاك لو حتى اغترابك طال
وقل لي ما بخونو هواك وما بسمع كلام عزال
وقول لي غير غرامك انت ريد يشغل قليبي محال
وطمن قلبي يا مريودي باقي الغربه ذاته نضال

اسامة ابوزيد
26-06-10, 01:17 AM
يوم والبلد

يوم والبلد مندسي في جوف الليالي الدافي حن
والريح تجيب حس البطان حجي ويصن
وأنا لا هويت
لا بيكي للنار إتكويت ..لا حتى فاكرك ذاتي أظن
نمت وحلم ..
بالغيمة والبراق يشيل
والنيم يميل ..
والطير يوج ..
والضوء يفج ..
في عتمة الليل الطويل
ومن تالا إحساسنا الجميل ملفوح حسيس طمبور يرن
زي ماتقولي كدي البلد ..
شلال من الأفراح طمح ..
طقت مواويل الحباب .. القرقراب ألمي وقدح
زي عيد وما عيد الوكت ..
مليون شراع للريح فتح ..
وأنا وإنتي وسط الناس صغار
سن الحمار ..
أمسك طريف عمري وأفن ..
يابت عيونك بالكلام ..
مالياها كانت ضحكتك ..
تجري ويجري هواي وراك .. لوايدي تلفح طرحتك
وآه يالضحك .. !!!
وكتين يرك زرزور برائتي علي تفاصيل لمحتك
لا البرتكان ...!!!
لا كنت حاسبك بت كمان ..
لا حتى عارف شنهن !!!
وآآآ بختي والأيام سماح ..
والليل سريع عقبو الصباح
في روعة البلد العصير
وانا وإنتي لسه قدر قدير ..
لا همي أيه باكر يكون ..
لا عارفي إنتي شني الجراح !!!
نتجارى وينو شليل وراح ..
نتدسه في كوم التبن ..
يا شافعي والناس في البلد
والضحكة رابطاهم ربط
سمحين بطان وسط الُبكان في لمة الضحى بي تحت
نلعب نلم باقي الحصى ..
(يايمه ) هاك شوفي البخت
وآآآآ بختك إنتي وكت بعد ..
ختت بياضو شلن شلن ..
ياحليلي أنا الشلتك حنين
طول المسافات مانسيت
لمتنا عن شق الصباح
ونومتنا متقالدين نبيت
وين ياتميرتي الكت بفن
أشواقي في خاطر السبيط
وتجدعلي شوقا ملان سلام
باللهفة صر يملاني حن ..
والليل يطول ..
تاريني في جوف المنامات ماهو صح
لا إنتي لسه الشافعي ديك
لا قلبي عدمان الجرح
ظهرت ملامح الفرقة فيك
وإتشوه الزمن السمح ..
وفتح عيوني قصاد صباح تتباكا في ساعة شروقو الدنيا بالميلاد تئن

اسامة ابوزيد
26-06-10, 01:18 AM
شاي الصباح وسؤال

حماد قام بدري سأل امي
قبّال الشاي والناس نايمين
قال ليها آيمه الناس بي كم؟
قالتلو الناس!! الناس غالين
***
قال ليها الزول لو دار يتباع في السوق
او كان تموين بيكون بي كم
قالتلو آآآود قول بسم الله
انتَ صِبِح محموم الليلي !!
ده كلام الجن والجان والجنبو الما طيبين
قوم صلي صلاتك واسأل الله ان شاءالله يعين
قال ليها آآيمة امبارح كان
في البيت الفاتح في الدكان
انسان معروض والناس قاعدين
قالتلو انسان زيي وزيك والناس شايفين؟
قال ليها ايمة بنية حلاتا
وكمان من ناسنا الغلبانين
جات شاقي الشارع ..العصر امبارح
والريحة تقول زرعو الياسمين
لابساله قميص زي برنامج التلفزيون الكان في السهرة
فوق للركبة وبلا ايدين ... وبتنادي الناس .. ياناس ياناس يامحتاجين
قالتلو تقول ياناس ياناس والناس سامعين ؟؟
قالليها ايمة بلا اصوات وبيناتم كان سمساري العين
قالتلو آآاود طب وين اخوانا ووينو بلدنا ووينو الدين؟؟
قالليها اخوانا ...كانو سكاري وطوالي اايمة هم سكرانين
والدين آآيمة هناك في الجامع ... بره الجامع مابسووا الدين
حماد كان عمرو يكون كمطاشر .. والوالدة تكون الكم وخمسين
شوف فرق العمر الكان بيناتم ... وبيناتم كان كم زول عايشين ..
كم زول مبيوع كم زول اتباع وكم دلالين ..وقبال ماتقول الوالدة كلام ..
قالليها آيمة شايك فار
قالتلو آآآود الشاي ملحوق دي انا كاتلي النار ..
قول لي كيفن مابسوو الدين !!
قال ليها اااايمة البت يايمة لو دار تتباع بس تقلع توبا وتشق الشارع ..
تقابل واحد حافظ السوق وعارف الحاصل .. وبي نظرة صغيرة وغمزة عين ..
تصبح حق الولد البت وتصبح هي المجنونة وهو العاقل ..
عرفتي آآيمة الزول بي كم
الزول بي شرفو .. بالشرف الغلي المامبيوع ..
عشان آآيمة ..بي اييد القدرة الزول مصنوع
قالتلو آآود سرحت معاك والبهم انطًلق وهسع برضع في النعجات
قالليها آآيمة الشاي بي كم ؟قالتلو الشاي بي كم تمرات
والسكر وين ؟؟
قالتلو خلاس !!كملت حديثك وجيت تتحدث في الممنوع والممنوعات!!
احشي خشيمك واشرب شايك بي تمرات
وقوم اندلي وازرع شرفك وشرف اخوانك وخدر فوق الطين قمحات
وازرع شرفك وشرف اخوانك وخدر فوق الطين قمحات

اسامة ابوزيد
28-06-10, 03:03 PM
إيديا فوق إيديك

ايديّا فوق ايديك نبنيهو اجمل بيت
تبقيلى فيهو ضراى وانا ابقى راس الخيت
منك اعرف الصاح بيناتنا يبقى صراح
لا نعرف الآلآم لا يوم نقول يا ريت
ايديا فوق ايديك نبنيه طوف فوق طوف
بيت الأساس اخلاص بي ريد ووّد مسقوف
يصبح هواهو هواى نسماتو احلى حروف
فيهو الأسره هيام شباكو لينا ولوف
يطرد كلام الناس شبح الضياع والخوف
ايديّا فوق ايديك نتقاود الأتنين
مانحن من سنتين قاومنا أقسى ظروف
صارت خطاى وخطاك فى نص طريق مرصوف
ماشين مع الأيام والزاد منى واحلام
قاصدين بلاد الريد وطريقه ما معروف
ايديا فوق ايديك نلحق قوافل الشوق الراحله من جواى
نبنيهو اجمل بيت ترتاحى فيهو معاى
لامن نهايتى خلاص لامن أصل مثواى
بحر الشعاع

الدنيا صح فراقه لكن القلوب يا الدنيا مداكي الامان
وعـشم المسافرين الرجوع ولو ماكدي
ماكان في زول فات المكان
وانا لي حـبيب يــوم دار يـسـيـب قال لي
قـريب برجع عشان نبني البيوت
نرسم خطوط الضو علي طول الـمكان

اسامة ابوزيد
28-06-10, 03:12 PM
الايـام مالن مـاهـن فـى الآلآم داقـالى اوتاد
الايام كاتـفانى حزيـن وسـوجرن الاشواق باصفاد
كـندكن الأحلام بـالحـسـرة ويبسـن الوديان فى المسرى
ولو بتعـدل الخطوة والـعـتـرة مـا اتراوحت وجيتك صاد
مـا حـبـيـت عـيـنك بـالصدفة ومـا لاقـيـتك دون ميعاد
اتـلاقـينا صـباح الدنيا وشلتك منيه واتجنستك فى الميلاد
اتحـسـسـتك حـب بـاـفطره وعـشـتـك فكره وشلتك زاد
ومـن شـقـيـت طريـق اشواقنا ولامن جيت من عندك صاد
ويـوم مـا جيت من عنـدك راجع كلى مواجع ونوح وسهاد
اتوكـيـتك حزن دامــس بـين خـلجات الـقـلـب الراد
واتـلفـته عـشان الـقاك فـرحـة زول بـي زولـوا العاد
وانا ماشى مبارى دريب الرجعه محطه محطه لقـيته رماد
حتة كنا وحـتة كان الــشوق وقاد
الاطـفال احـسـاس الوحده الآمال مـنشره سواد
لا لاقــيـت اطـفـال بــيـغــنوا لا اتـنيـن قاعدين يتمنوا
وادى الخـير مرابوا جـراد يـا احـلام الـقـلب الراد
واتـذكرتا انـا لـيالى الهجعه وخيال الشوق مشدوده شداد
غـيـبـتك كـان اسـبـاب وسـفـر الـطـيـف فى العـتمه جهاد
يـاما مـشـيـت فـوق دربـك اسـعى طول الليل شقيتلى بلاد
كم كـبـيـت فـوق دربـك دمـعـه واسـتـنـيـت طيفك ما عاد
واه يا زول اهـديـتو حـيـاه اهـديـتو عـيون ومروه وزاد
اه يا زول اهــديـتـو بـيـوت اديـتـو خيـوط شعرى الوقاد
لـو فـاضـل فـيـك مــن ريدى رماد
اطرحـلى وشـيك انا دايـر اجـيك لـيه بـابـك ساد
لـيه الأحزان لــيـه الآهـات والدمـعـة حــصاد

اسامة ابوزيد
30-06-10, 04:08 PM
شعاع الحلم

بحبك وكانت القمره
بتكتب بى الشعاع احلام
وكان لسه العشق شافع
وكان كل الحكايه كلام
مشيتى معاى محل المطره طول العام
محل مارقدت الانغام
وقت ما انشرت الاحلام رزاز وغمام ونلعب وكانت الواطه
تكندك فى وشى الايام وكان قبل الشرك ناطا
قبل تتغبر الاقدام الاقيك والقلوب بيضا
صباحات الله والنسام يخربش فى خدود الشوق يسجل فى حضورنا هيام
واغنيك والحكايه كلام
احبك وكبرت الايام وكبرت غنوتك فينى
وكبرت انا على جهل الاغانى بكر
الوليك بى مشاعرى النوم ملك ليكى الليالى حكر
وملكتينى وسكنتينى وزرعتينى
واسفاى على طول المسافه ستر
جفت الّمى من جواى
اقالدك ياسموم الصيّ
اتحتيت صفق يابس
واسفاى قطعتينى
قبل تنجض مشاعرى ونى
انضريت وشالنى هواك بعيد ياحلوه شتتنى
كبرت وكبرت الايام وكبرت حسرتك فينى
واتلميتى من جواك بعدما اتبلبلت عينى
بقيت بكاى
مرقتى على تنادينى
بقيت دروي ملمات العشق اطرش
نجضت بعد حريق جواى
واسع جايه بى الماضى
تشرحى حالك الجواك
شنو العندك عشان اديك من الجواى
كفاى اسكب عليك دمع الاسى وابكى
وكفاى رحله عمر جنبك توسخى فى بياض قلبى
وانا المجبور اشيل ذنبك براى
براى انضم سبحة الشوق
تنوم انتى وانا الصلاى
اساسق فى دروب الريد وانتى المابتشيلى خطاك
ولا هان يوم تعدى خطاى
واسفاى واسفاى زمان كان العشم باكر
باكر كفتك تتقل ترجح كفة الميزان
وباكر جا
وانتى مطففه وظالمه
ليكى تكيلى بى مكيال
وتدينى حبيبه حب وشوق كُضب
بقر مافى الهديه حبال
مابيقنعنى ظلمك لى ولا ليك عندى طولة بال
ولابتنفع كليماتك ولادمعة العيون السال
ولابتشفع غنيواتك ترانيم الندم موال
خلاص جفت مواعينى
بقت بيكى القلوب غربال
فلا اسفاً على القمره على الضو الكتب احلام
ولا اسفاً على الواطه وكت رسمت خطى الاقدام
بفتح صفحتك بيضاء وعليكى الف سلام
عليكى عليكى الف سلام

اسامة ابوزيد
01-07-10, 09:00 AM
طبـل العـز

طبل العــز ضرب يالســرة قومى خلاص
والجنيات هديك فى الساحة ختو الساس
والبنـــوت زغــريـــدن تجيــب الطــــاش
والخـيـل عركسـن والدنـيا بـوق ونحـاس
الـســودان خــلاص يالســرة قـام دواس
شـــد سواعـدوا تانــى وشيـد المتـراس

طـبل العز ضـرب والخيل تسـابق الخيل
مـن اخـــر الجــنوب لعـطــبرة وتوتـيـل
ياشدر الهشـاب قـوم نمشى بـحر النـيل
ويالوز القطــن قـوم تانـى نـور وشيـل
وارقص يانخـيل فـوق السـواقى ومـيل
السودان خلاص دايـر السـمح وعـديل
كسـر قـيده تانــى وقـــام همـيم بلحــيل
طبـل العــز ضـرب حى عليـك ياكفـاح
والاذان نـــده حــى علـيــك ياصــباح
شايـل النـور ومالى بالاغـانى الساح
والظالم وقـع يالســرة داوى جــراح
والشـــارع هجــد مابســوى الـتــاح
خلى الناس تنوم بعد الشقى وترتـاح

بكي
01-07-10, 09:28 AM
ياسلام نجي نقراهو بي مزاج

اسامة ابوزيد
01-07-10, 09:36 AM
طبعا تاني الا يوم السبت مش؟؟؟

عمار صالح
01-07-10, 12:54 PM
تقــــــــــــــــول من نور هي مخلوقه

وربنا شال من احلي صفات ردم فوقــــــــــــــــــــــــــا


زينــــــــــــــوبه

اسامة ابوزيد
06-07-10, 09:19 AM
يا زول صلاتك بالنبي
سيد أحمد الحاردلو

:::::::::::::::::
1
يا زول صلاتك بالنبي
واسمع كلامي
ان ما نفع ادو البحر
والبحر مليان بالكلام الما نفع
اسمع اخو ي
دايرين بدون تطويل ولف
انو الحجيوه ديك تقيف
حجوة منو الككتول
والكاتل منو
رايك شنو
2
عايزين نوفق اي تار
رايك شنو ؟
عايزين نوقف اي شئ
شعل البيوت خلاها نار
ونكفف الدمعات سوا
ونبقي سوا
ونبني ... وعمر في الديار
ونخلي كل الدار ,.... خدار
رايك شنو .؟
3
ايوة حصل
ماتو كتار
كتّلنا ... كتلونا ... كتار
انصار ... وشوعيين ... كتار
اولاد حلوين .. ماتو النار
واولاد ملانين .... بالخدار
واولاد تقول شمس النهار
فى الجيهتين ... وقعو كتار
هذا حصل ،
4
مين اللي صاح
مين الغلت
مين سيدنا في هذا البلد
مين عندو تلتين في البلد
مين اللي بادي بالغلت
ده كلام كتير ... ماليهو حد
وكلام غلت ..
رياك شنو ؟
5
انو الحصل ما قد حصل
والدنيا لازم تمش
والسودان اهل
لازم نصل
للوالطه .. ديكا الخدره
لا بد ... ان نصل
والحلوه منتظره انو .. والخير والامل
رايك شنو ؟
6
رايك شنو ؟
ننسي ونبطل اي تار
نقوم .. نطفئ اي نار
ونخلي بحر النيل يسيل
من دون سدود
حرا ... جميل
ونخلي تاني الحب يسود
من دون حدود
حرا ... جميل
رايك شنو ؟
7
يا زول صلاتك بالنبي
وجهة نظر
والزول نظر
وكلك نظر
,, وهذا الكلام
ان ما نفع
ادو البحر
والبحر مليان بالكلام الما نفع
رايك شنو ؟

اسامة ابوزيد
11-07-10, 10:32 AM
جيتيني كيف ؟
.

احلف يمين .. انك ولا متل البشر
وانك بشر ...
وانك حواس
تنزل علي قلبي اليباس ..
كشحة رزاز ونقط مطر ...
تاقيت عليك باب العيون
سديت ممرات النظر
فتشت كل الجاني شوق ..
مريت عليهو قدر قدر ..
جيتيني كيف ؟؟
جيتيني كيف ؟.. ومافيا باب متكول قصادك وما اتكشر
وانا من زمان الليل طويل
قفلت أبواب الهوى وسلمت مفتاحا البحر ...
جيتيني كيف ؟؟؟
جيتيني كيفن والعمر
عديت محطاتو وعبر
شقيت فيافي الأمنيات ..
هداني احساسي وفتر
ما كنت قايلو بجيبني ليك
درب المحبين (الوكر)
تفضح عيوني هوايا ليك
يمرق احاسيسي الوتر ...!
غيرك منو البملانا شوق
يقلب نسايم ليلناحر !
يدخل علينا متييين يريد
يمرق .. قليبنا يجرو جر
عذبني ريدك ما براي ..
اولاد بلدنا وناسنا صر
يانور عيونا وكت يتوه .. في الرملة والليل والقمر
يافيض مشاعرنا الطمح .. ماخلّ في عالمنا بر ..
زيك شويين مااا كتار .. في الدنيا انتي نفر .. نفر

اسامة ابوزيد
11-07-10, 10:33 AM
دمعة في عينيك مسافر

أي زول بردو قدر غتا وكل زول همو قدر قروشــــو
انت شقيان ياحبيبــــــي وغيرو رزقك مابتحوشــــــــو
بعدك البيت ليل مضلم وفوقنا منطلقات وحوشـــــــو
ومن فراقك يالحبيـــب الحزن فارش بروشـــــــــــــو
الدروب الكان تقالـــد بالفرح لمسات خطاكـــــــــــا
تسـأل المارين عليكـا زولي مالو قعد هناكـــــــــــــا

مالقلوب شايلاكا فيها واي زول بينات رموشــــــــو
ياحبيبي كدي انت فكر كيف في زول بيــفوت ولادو
والله ماشقالو حلقــــا جف من قلــــــة رمـــــــــــادو
كان هني اوكان هناكا الله مايــــــــاهن بـــــــــــــلادو
وانت بس سو العليكا ازرعو واحصـــــــــــد عيوشو
يارفيق السكة اعرف مافي قرشا جابلو فرحـــــــــة

السعد شوفة عيونك والصتمليباحات تبقى سمحـــة
الضحك يملاني عافـي والهموم بالجملة يمحــــــــــــى
ويكفي ياضو الشمـــــيشي بس اشوفك لمـــــــــا اصحـــى
وتبقى ضلي وضل ولادك وتبقى باب البيت وحوشــــــــو

ياسمح ادفن جوازك وادفن الهــــــــــــم بالامانــــــي
العمر فاضل شويي خلي جنبـــــــــــك يبدا تانــــــي
نزرع الحب في ولادنا ويتملي البيت بالاغانـــــــــــــي
مالنا مال الجاي باكر ومالنا مال سايبنا تانـــــــــــــي
ودمعة في عينيك مسافر اغلى من دهبي ونقوشـــــــــــو

اسامة ابوزيد
12-07-10, 08:58 AM
-1-

كُتْ قايل صحيحْ الهجرة تِرياق للجراحاتْ

ورَاح أرتاح من أحْزانى القديماتْ ،

وقُمْ طشيتَ فى دُنياتْ .. بعيداتْ

برايا جريحْ

أكاتل الريحْ

وأكوس فوق التخاياتْ ،

وأغلب الشوقْ .. ،

وأقول أصبُر خلاس فِضْلن شِوياتْ

عشان ترتاح من أوجاع حُبَك الفاتْ ،

وكم مرات

أحِنْ للارضِ .. والناس الحليوينْ

وادَفْدِف فوق بُلود الغيرْ مِطيراتْ ،

وكم مراتْ ،

... أوَاصلَ الهجرة فى الذاتْ ،

... ورُحتَ بعيدْ

وضيَّعتَ المسافاتْ

وضيّعتَ العناوين والجواباتْ ،

وقُتَ خلاسْ

خلاس الماضِى قد ماتْ ،

وودعتَ الجراحاتْ

-2-

.. ومرت بيّا زى شوبتينْ

وزىْ شِيتاً حميمْ .. ودفينْ

يجيكْ وكتَ الوجع .. والشينْ

يجيكْ زىَّ العديل ... والزينْ

حضرنى شعورْ

شعورْ بحضورْ

حُضور محضورْ

وسادِى الدنيا .. جايى عليّا .. زفة نورْ

.. واتلَفَتَ .. بى هجمة فرحْ .. مسحورْ

وجُوه النورْ

بَشُوفِك نورْ

شَلَح تَالاىْ

تقول مَقطعْ من الدوباىْ

بِفتش ليهو .. لى غناىْ ،

أتاريكْ .. كُتِ دِيمه معاىْ

مهاجرة .. وفى الضُلوع .. جُواىْ ،

اسامة ابوزيد
12-07-10, 08:59 AM
أتاريكْ .. رُحتِ قبلى هناكْ

وشلتِ معاكى كل الفاتْ ،

-4-

لِقيتِك واقفه فى كل المطاراتْ

ومتظرانى بالشوق والبسماتْ

وايدِك راعشة بِتقول لىْ .. سلاماتْ ،

لقيتك فى محطات القطاراتْ

والتُلوج نازلات على وِشيشك وصاباتْ ،

وإنتِ تحاحى بالتوبْ .. الدِميعاتْ

-5-

أتاريكْ رُحتِ قبلى هناكْ

وشلتِ معاكى .. كل الفاتْ ،

-6-

لِقيتِك فى الشوارع والمطوراتْ

وجارية معايا مرات للضُلولاتْ

وواقفه معايا مرات فى الشموساتْ ،

وقاعدة معايا فى قهواية مراتْ

وتحكى لىْ حكاياتْ ،

وأشوف عينيكى ضاواتْ

كما أُمبارحْ ...

ومليانات محناتْ ،

-7-

أتاريكْ رحتِ قبلى هناكْ .

وشلتِ معاكى .. كل الفاتْ

تَّصاويرنا

وغناوينا

وفريحاتنا .. ومشاويرنا ،

وحاجاتنا الصغيرونات

والخليتَه تذكاراتْ

ورايا هناكْ

لِقيتَه معاىْ

بِتمشى معاى

وتقعد جَنْبى تتكلمْ

تعيد ليا جميعَ الفاتْ ،

-8-

أتاريكْ .. رُحتِ قبلى هناكْ

وشلتِ معاكى .. كل الفاتْ ،

-9-

وكُتْ قايل .. صَحيح الهجرة بتداوى

ولقيتَ الهجرة .. بتكاوى ،

وتَفتِحْ لينا ماَضينا

وتخلينا

مساجينُو ،

وكُلْ مادُرنا نَهرُبْ مِنوُ ...

نَلقانا ... مساجينوُ ،

-10-

أتاريكْ . . رُحتِ قبلى هناكْ

وشلتِ معاكى . . كُلَّ الفاتْ.

هل عندنا مليون ميل ..
أو يزيد..
هل عندنا عشرون نهراً
أو يزيد..
هل عندنا إرث
تجذّر في القديم
وفي الجديد
هل عندنا..
مجد الغناء ..
وعندنا مجد القصيد ؟
هل عندنا
قمح وبترول
وعصر من حديد ..!
هل عندنا شعب..
كريم النفس
جبار .. عنيد
... ونموت مسغبة وجوعاً
يا لنا ..
وطن فريد ..
!

اسامة ابوزيد
12-07-10, 09:00 AM
دريفونه

وصغيرُونه

وحليوُونه ،


تقول ليمونه ..

مَسْقِيه بدموع الناسْ ،


تقول حِنه

مشتته فوق إيدين حلوينْ

فى بهجة عرس سودانى ،


تقول نَمّه

يا دوب تِتْلمه

تِتْلَمه

شِوَىْ

فى شوَىْ

شويفعونه

لِذيذونه ،

تقول وَجَعَ الطِنيبراتْ

فى ذاتْ . . مِن ليلْ

بِتنقرشْ

على القِيزان . . غناوياتْ ،


-3-

دِقَيْقُونه

تقول رميه سُؤال . . يا دوبْ

ومن خَشْماً صَغَيرُون .. دوبْ

وما عِرف الكلامْ . . يا دوبْ ،


-4-

شويفعونه ،

تقول مويةَ المحاية . .

تقولْ ،

تداوى الزولْ ،

بِسيماتَه .. تقول نُقَاطْ

شِوىْ

فى شِوىْ

يِسَوِن طَاطْ ،

عِويناتَه

تقول هَمْبُولْ

وللبنوتْ . . وَجَعْ مسلولْ ،


-5-

طِعَيْمُونَه

تقول سُكرْ ،

وإن نضمتْ ..

نَضِم سُكرْ ،

وإنْ ضِحكتْ ..

ضِحِكْ سُكرْ ..

تعادى الزولْ

تخليه ..

يكون سُكرْ ،

دِريفونه

وصغيرونه

وحليوونه ،


ولسه يا دوبْ ...

ولكين ووبْ ..

من الشافعة . . . الشِويفعونه

اسامة ابوزيد
12-07-10, 09:02 AM
سيد البلاد

سَاعةَ الطياره

يا دوبَكْ تقوم

وتِنْتَكي فوقْ بُري

أو بحري ...

وتحومْ

فوق المزارعْ

والمصانعْ

أو تكورِك في سَمَا الخرطومْ عُمُومْ

وقبْلِ ما تَسْتعْدِلَ السِكه

تقومْ في راسَكْ العَكَه

ويكوركَ الشوقْ

وينده يا وطنْ

باسمَكْ

وتاريخَكْ

وعنوانَ السَكَنْ!


يا وطنْ

يا مَالي أيامنا

ومالينا شَجَنْ

مَالَكْ

وكتْ نَمرُقْ

نشوفَكْ يا وَطنْ

مَالي المكانْ

مالي الزمَانْ

مالي البدَنْ

مَالَكْ

مسولتْ بينا

في كُلَّ المدنْ

مَالَكْ

مساسِقْ بينا

في الدنيا العَبُوسْ

ملعونْ

أبو الفقر

اللي خَلانَا نكوسْ

في بحورَ الحزنِ

عن صُرة

فلوسْ

ملعونْ أبو الفقرِ

اللي خَلانا نعوسْ

في بلادْ عالمْ مجوسْ!


يا وَطنْ

يا مَالي أيامنا

ومالينا شَجَنْ

نحن بنكوسَكْ في الخليجْ

وفي المحيطْ

وفي بلادْ كُلَّ العَجَمْ

نحنَ بنكوسَكْ

شانْ نعود ليكْ

بالتعاريفْ

والمصاريفْ

شَانْ تقومْ

تَقدِلْ

كما كانْ .. يا وَطنْ

وتوري هذي الدنيا

إنَكْ .. أيْ نَعَمْ

سِيدْ في العبادْ

سِيدْ في الفَهمْ !


ساعة الطياره

يا دوبَكْ تقومْ

يَعرفْ الزولْ

ايه يكونْ

من دونْ وَطنْ

ويَفْهَمْ الزولْ

إنو هذي الدنيا

من دونَ الهُمومْ

ومعاها كَتَاحَة سَمُومْ

ودُعاشْ بَعيدْ

ومطرْ رُعُودُه مُكَرْكِرَه

ومُجَرْجرَه

شيتاً جديدْ

في يومْ من ايام الوطنْ

ما بتسوى شيْ

وإنو أجملْ شيْ يكونْ

إنَكْ تكونْ

موجودْ

ومفقودْ

وانتَ ماليهُ

ومالِيكَ الوطنْ

حتى ولوْ كانْ

في جيوبكْ مَافي شيْ!

ما برضُو يكفيكْ

إنو في جيبكْ

وفي قلبَكْ وَطنْ

سِيدْ في البلادْ

سِيدْ في العبادْ

سِيدْ في الفهمْ !

اسامة ابوزيد
13-07-10, 07:43 AM
مسادير الحردلو ...وحرف الياء..
حرف الياء

اللهيج النى

زينب فى البنات مى داب سماحة الزى
شن تشبه بلا اللدتو أمو ودى
فيها تلت خصالا ما حواهن حى
الصبا والجمال عقب اللهيج النى


أبى يبقالى فوق غيرك اجيب بوباى
لا شفناك ولا خبرنا بيك حجاى
القاف السبق والدايرو من أوجاى
كل أل قتو فى وصفك أراه دون جاى

شوق زينب

بعد سبعين سنة وبيض سبيب عينى
ما بحسب بساهر من طوارق الغى
شوق زينب ترى خلانى منى ولى
أشكى على الغصون لى من يعرف ألبى

قل حياى

ما بتشوفنى هسع كيف بقيت مى اياى
يوما تب اغيب ويوم اطش بى خلاى
فرق النية بلحيل قل على حياى
فيها شبه خلق بريبة الباسياى

عجز الشعر

أبى يبقالى فوق غيرك اجيب بوباى
لا شفناك ولا خبرنا بيك حجاى
القاف السبق والدايرو من أوجاى
كل أل قتو فى وصفك أراه دون جاى

أبو حمودي
14-07-10, 09:52 AM
سـت الجــمال

حاتم حسن الدابي


قدر الله ما ادى الجـــمال اداكــــى لامــــن قتى بس
حد حواء ما جابت سماح مايسوى من حسـنك قبـــس
عاجبنى وصفك يـــــــالفلو الامـــاتو سر حنبو التبــس
وقفن وراء وقـدام غفـــــر خايـــفات وداساتنـــــو دس
يتلفتــن ويشرفن كــان ذل فى القدلة صياد قــنـــص
طلعة وشيك ذى الصباح الدابو خته وشال نــفــس
شـع وبهـر كشف الظلام لا صر لا فى يـوم عبٍٍٍـتس
الحكمة بين صبحا شرق وليلا مـن الظلمــات دمـس
لا تعــاقبن لا تفــــارقن لا ازدواج بينن حدث
عندك خديد تفاح عديل لا ايد تطولو ولا اتلمس
و الرشمة فيهو كما الفراش القبل الزهرة وهمس
اهواكى انا واهوى الرحيق المـــن ثناياكـــى انبعث
وفى فاهو ريق يحرق حريق مسخ طعيمو عجو المحس
عندك عيون تقسى وتهون قطعت رميشاتن مجس
فيهن سوا علة ودواء وصفات الحاظن زاتو مس
عودك لدن وكتين يميل يشبه فريع البان رخس
كان جه النسيم ما بستقيم يرقص معاهو ويتعدل لو كان كرس

أبو حمودي
14-07-10, 10:00 AM
( أمـــــونة )

صلاح البوج

اسع ياتو فيهم يا خلق الله عاد أوعاد يات مصير لى وللولاد
تبدا أمونة رحلة ماكان فى الحساب باراها الزمن شبعها فى العذاب
من يوم سافر أحمد قاصد الجنوب باكية أمونة فرقة هزت للقلوب
زوجها ابو الولاد الخاتى العيوب مفقود من سنة واعلنوا للحداد
وتمر السنه بى فوق السنه تمو اربع سنين مرت محزونة
فكرو فى الكفيل وبيناتن جنا ومحل الأبو بقى عم الولاد
عقدولو الأهل سولو المتبع من مرت الأخو الفات ما رجع
تنداس المشاعر أو قول اقتنع لازم الناس تضحى شان لبنى وعماد
ويتم العقد بينات الدموع لا فرحاً كتير لا ضوت شموع
عجلات الزمن ما بتقبل رجوع وما بتمشى الحياة زى ما الزول اراد
سنتين بالكتير كان جابو الولد والحزن القبيل جواهم برد
سمو على الفقيد الراجل الصمد شان حفظ الإسم وتأكيد للوداد
وما كان فى الحساب الزمن العنيد ينسج فى الخيوط من زمن بعيد
فى يوماً عصيب وما فى البال أكيد من أول جديد اتكال الرماد
فى لحظة سكون عماها الديار حس الباب نقر قايله أمونة جار
تاريهو الفقيد كان فى الإنتظار مفقود الجنوب يرجع تانى صاد
كان صدمة قاسية فوق الإحتمال خلتا بين جحيم واقع ام خيال
إختل العقل وكان آخر سؤال أسع ياتو فيهم يا خلق الله عاد
أو عاد يات مصير لىّ وللولاد ؟؟؟

اسامة ابوزيد
14-07-10, 01:24 PM
قوز ود ضياب

قوز ودضياب يالليل ترى بى شياهو
بهما بطرد فرحان ودعاجبو خلاهو
زولا فى أم قدود المولى كان اداهو
يقعد عندهن يترك لهن ماواهو


قالت واحدة منهن

واحدة منهن قالت ولوفنا تراهو
قلت ليهن نعم محسوبكن اياهو
الصبا والجمال الدايرو ها اللبراهو
ترى هدا الهرد قلبو وقسمها وكلاهو
شهادة مجرب

بت ناس فاطنه زينب فيها عنقا باهى
شن تشبه برا الفى النالة غريد ساهى
حلفوا الضاقو ليمك فوق كتاب الله
أحلى نفيسها مالا الزعفران والشاهى


القلب المقصوص

يارب يا إلهى ألبى الجمال خصاها
شبريق الملاين شوفو كيف رصاها
سلطان الغرام بالتيه على عصاها
شنبانيها ريشة قلبى طب قصاها


كرباج النصر

جمال أمات خدود قط ما انذكر لى براها
بكرة إن شال قدمنا الكريم نصباها
فى بوش العصير كية الشباب خالفاها
كرباج النصر بتورو فوق ندداها


عتر وما سمى

ود اللدرع أل بين ود فهيد ومساهى
فى شورتين تحت حزاز وريدو الباهى
ما شفت أم نعيم الكنت بيها بلاهى
دابى عتر دحين ما قلت بسم الله

اسامة ابوزيد
14-07-10, 01:25 PM
متواصلين مع الحردلو ومسدار اخر...

الشم خوَّخت بردن ليالي الحرّة
والبراق برق من مِنّه جاب القِرّة
شوف عيني الصقيّر بجناحه كَفَتْ الفِرّة
تلقاها أم خدود الليلة مَرَقَتْ بَرّة
***
تعرف لي مشاهيد الرُّقاد والفَرّة
فلاّخ المَصَبْ بيهِنْ تبين تتورى
فوق حيا فوق محل من الصعيد مُنجرّة
شاحد الله الكريم ما تلقى فيه مضرّة
***
أبْ عرّاق فَتَقْ قَرْنُه المِبادِرْ شَرّّة
والباشندي عمت مهششيب الدِّرة
من النقرة كُل حين فوق عليو منصرّة
ها الأيام محاريها القليعة أمْ غُرّة
***
قدمت من هنا وبي ضانها سمْعَتْ كرّة
فوق كرتوت شخيتيراً تخيِّن خَرَّ
قلاتو الوهاط بي لشغة قبله محرّة
يا باسط النّعم تسقيها في ها المرّة
***
بت المن قَرين مَرَقَنْ على الجبّالْ
في بيّه وبَلوس ما برجن الوبَّالْ
صفرن درعتن تتدلى للبهلالْ
وبيضةْ شاش قرابيبن تريع البالْ
***
مرقن يا مجيب لي جملة السُّعَّالْ
شاحدك تجمعن من مطبق الحلاّل
ما ينقص حساب الدرج لو بي عجال
ونحن نجيب لهن في كل يوم منوال
***
من بيلا الصباح إسَّرْبَقَنْ همّال
والدوف فوق حقايبهن كترته جمال
الخور العطيش بلداً عزاز ورمال
ومدروك ما هو من حرّ النهار بكمال
***
عَقَبَنْ وَدْ دَعُول يجرن شفاقه عدال
ختمن مقرح الحربة الجبالها طوال
قلت أمّات قرود وردنّه بالقبَّال
خَلْقَنْ كيف برمولْهِن دمير حبّال ؟!

اسامة ابوزيد
15-07-10, 09:41 AM
نواصل مع مسادير الحردلو وحرف النون..
نسينا اهلنا

الزول السمح يوم الخميس واعدنا
فى ديم كسلا إن سافرنا منو ابعدنا
يا عبد الامين ما شفتو كيف واددنا
ترى هادا المنسينا العقاب وبلدنا

معاوية كشة
15-07-10, 09:43 AM
الليله الخميس يامان

عندك لقاء عاطفى فوق السحاب

اوعك تزوغ

اسامة ابوزيد
15-07-10, 09:46 AM
لقاء شنو يا فردة

اسامة ابوزيد
15-07-10, 09:48 AM
ومسدار اخر من مسادير الحردلو وحرف الميم ابقوا معنا...
***************
حرف الميم
القلب المطفطف

خلانى البريق داك البلوح قدامى
بصدد متل جفر الجمال الرامى
طفطيف قلبى عادنى وزاد خيال احلامى
عقبان طول اللسنات على لوامى

صبوة العابد
ترى شفناها بت بت المعرز عومو
الحاويها فى السالكات مندر كومو
على المتشببات سوقك بعيد فى سومو
شوفتك تبدل الحارت صلاتو وصومو

أيام مضت

كم شويم لهن وكتا عدال ايامى
شيخ اللتبراوى وفيهو ماشى كلامى
بالغبى والبيان ما بطلها الغنامى
دى قسيت على ناسا كبار ومسامى
بنات العام

الضو ال بشوفو بدا لى يا قدام
برقا لاح بعيد ولا فريقها بت هجام
انا واياها كان بيناتنا ماشى كلام
اقنع بيها اصلا من بنات ها العام


طعام من حنظل

جفر الجمال حاكيتو ها الايام
من زولا بدلنى وصابنى منو غرام
الخلانى انوح بعد السقد ما نام
الهور والحناضل ستو لى طعام

أحلى من المسك

طاقة التاجر الجابها المسافر الشامى
فى سوق الحراج دلالى فيك ما بسامى
مسيكة أل كت قبل فوق بلغة العوامى
عرق التاية افرق منو لى الشمامى


قل نومى

من ديفة ال بغادرن درت الكرامى
اللحم انسلب رابن على عضامى
التاية ام شليخ حسرورها قل منامى
فيها مكملات خلق الجدى البعامى

معاوية كشة
15-07-10, 09:48 AM
نواصل مع مسادير الحردلو وحرف النون..
نسينا اهلنا

الزول السمح يوم الخميس واعدنا


!!!!!!!!!!!!!!!!!!!!!!!!!

اسامة ابوزيد
15-07-10, 09:49 AM
ايواااااااا


بس للاسف الميعاد طرشق علي الرغم من روعة الجو

اسامة ابوزيد
19-07-10, 07:44 AM
فى امات البنات حايدانى ولدت نيلة
وساقا دقوصب عقب القناية عديلة
انا واياها كان بيناتن ا جارية خليلة
اقنع بيها من غى العرب والعيلة

جمر الحسار

بشكى عليك " يااللوس " صديق الخلة
ماقال لى بت نور خاتمة العرب والحلة
كان خلتنى فوق جمر الحسار إتقلى
شوفتك تبدل الصابق الرغيبة وصلى

رجع الكلام

ود الفونج حديثك فى امات عقيدات لولى
واقع بف دحين رجع الكلام لى قولى
أم ريقا متل عناب جنينة المعقولة بسى
قالت لى رجب ما جيتا شن سيتولى

اسامة ابوزيد
19-07-10, 07:46 AM
ديفة اليازمان وردن قبل كلكول
جفلن بى صقيع وكتين بدا لن زول
ما بمسك جيدهن خيل ولا زهمول
هبرت كفتى وساكت قعدت فى سهول


درجات من الجمال

فى يوم الجمع بلحيل رطبها عوالى
ما خده النورة فوق الصفصفو الغربالى
إن ثبتت سيادتك للشباب اجمالى
تحكابها الدول لا عن سراية الوالى

ضراعة عاشق

أمرك نفديهو وفى الحكم ما تبالى
مكيون سلمك رتبة مدير طوالى
بضرع تملى ولى الخلقنى سؤالى
من شأن أم قرين ما ينقطع ميصالى

الدمع المنهل

أجاب الحاردلو قائلا معلما الشاعر كيف يقول الشعر:
البارح طريت ليمك هوية ليل
مسافتك يا أم رشيم لى ابعدت بلحيل
أل خلى صبيت عينى جلبا سيل

ضوق الكمعه


آمنة سوت

جات آمنة سوت مسخ علينا الجيل
طبلت قيدها كع فى العاصى والعنتيل
الشرباتة شتت والعواصى تسيل
مى داب ود رهد مدروك مجر النيل

اسامة ابوزيد
19-07-10, 07:49 AM
(( منام عشان حبيبي ))


-1-

أُمبارحْ

بى قِليلْ

وكت الليلْ

فَلْفَلْ . . بلحيلْ

. . شُفتَ منامْ

-خير إنْ شَا الله

- خيرْ

شُفتِكْ لا بسة بياضْ . . فى بياضْ

والدنيا دِى . . فوقِك . . زى العاجْ ،

فوق راسِك . . تاجْ

وسيف مسلولْ

والحِنه تزغرتْ فوق ايديكْ

وحريرة

ونور بيضوى عليكْ . .

- خيرْ ان شَا الله ،

- خيرْ

شُفتِك قاعدة . . تقول فوق عرشْ

والعالم كُلو . . بقول .. لبيكْ ،

-2-

وجَنْبِك ميه بتْ فرحانه

- خيرْ إنْ شا الله

- خيرْ

وناسْ

وزحامْ

وكلامْ

وسلامْ

وغناوى . . ونور

وحكاوى . . تدورْ

وشُفتَ كمانْ

واحد فرحانْ

قاعد جَنبْك

- خيرْ انْ شا الله

- خيرْ

أقول زى لا بسْ

نورْ فى نورْ

وبعاين ليكْ . . زى المسحورْ

-خيرْ إنْ شا الله

-خيرْ

وجنبو جماعه ،

كُتَارْ بلحيلْ

نازلين فى الداره ،

تقول الخيلْ

والليل شبالْ ،

والليل تُمْ . . تُمْ

والليل دلوكه ،

غناها . . نَضِمْ .

والليلْ . . يا ليلْ

مجنون . . بلحيلْ .

-3-

خيرْ إنْ شَا الله ،

خيرْ إن شَا الله

- خيرْ

اسامة ابوزيد
20-07-10, 08:40 AM
حكم الشاعر

يوم بوش العصير مرقت عليهو أمونه
خلت جيلو كلو تقول كياييل شونه
الناس أل بماثلوك على هنونه
مخسوفين عقل ما عندهن موزونه

دموع النافلة

بت ألبى سرب قناصى ما نشاهن
مرقت من كلاب ألبى الشرع وشاهن
من سرق إيدى جيزان الدموع بشاهن
رقدن فى الشلوخ لا النافلة ما قشاهن

اسامة ابوزيد
20-07-10, 08:43 AM
يا جَنَا .. أبداً جَرَالَكْ أمرْ مِن هَذَا القبيلْ ،

إنك مسافر فى بلاد بره .. وزول عابر سبيلْ

تلقاك بنية حليوة .. زى موية السبيلْ ،

والدنيا حرْ ..

والجوف عليلْ ،

تنده عليكْ

يا ماشى زى الغابة .. يا زولْ .. يا جميلْ

وَقفْ .. وهاكنى معاكْ .. وسافِرْ .. يا جميلْ ،

- أيوه حَصَلْ ،

بس المطرْ كان قاجى .. والليل كان جميلْ

والبندقية .. جزيرة الطِليان ..

يمين . . مليانة شيلْ

والبحرِ رايقْ .. والمزاجْ . .

والجيب تقيلْ ،

وشربنا . . ناماً شُفنا ايطاليا مدنقرة فى المحيطْ،

وتقول ياليلْ

ويمين – حلفنا – نعومْ .. وكان الكيفْ تقيلْ

والواطة ليلْ ،

يا زول حَصَلْ .. زى ما حَصَل . .

ما الدنيا ليلْ

والزول مسافرْ

والطلايناتْ ديكْ . . يا ليلْ ،

- أيوه حَصَلْ

عباس سيف
20-07-10, 09:36 AM
- أيوه حَصَلْ
يازول حصل ولا ما حصل

اسامة ابوزيد
21-07-10, 08:39 AM
حرف الكاف

شيطان الشعر

كل صبحا جديد بسمع ربعا غريب فى غناك
من شدة فهم ولا أم نعيم قابلاك
أحكى لى الصريح والشئ ال عليه مطاوعاك
خلنى ها النغنى والضايقو أضوقو معاك


نصيحة عالم

مما قمتى فوق ساجك مولع ضيك
ما اتبعت عر لافية العطاش بى ريك
السرع والنشاط ما بشبهن لى زيك
تاتى المشية خلى الناس تموت بى غيك
بدرى النخل

العتب الكتير يا بدرى لى السماكى
ما شاف النخل وكتين إميل متاكى
كان خلقك تمام ومصدقات دعواكى
ود بنقالى كان اقعد تملى معاكى

شديرة من قاسك

بت اليازمان جا بالقماح قناصك

لا بهجس ولا بضوق الغميد جساسك

فى الزمن القبيل عاجبانا قوة راسك
شن معناك بقيتى شديرة لى من قاسك

اسامة ابوزيد
21-07-10, 08:42 AM
كُتْ قايل صحيحْ الهجرة تِرياق للجراحاتْ

ورَاح أرتاح من أحْزانى القديماتْ ،

وقُمْ طشيتَ فى دُنياتْ .. بعيداتْ

برايا جريحْ

أكاتل الريحْ

وأكوس فوق التخاياتْ ،

وأغلب الشوقْ .. ،

وأقول أصبُر خلاس فِضْلن شِوياتْ

عشان ترتاح من أوجاع حُبَك الفاتْ ،

وكم مرات

أحِنْ للارضِ .. والناس الحليوينْ

وادَفْدِف فوق بُلود الغيرْ مِطيراتْ ،

وكم مراتْ ،

... أوَاصلَ الهجرة فى الذاتْ ،

... ورُحتَ بعيدْ

وضيَّعتَ المسافاتْ

وضيّعتَ العناوين والجواباتْ ،

وقُتَ خلاسْ

خلاس الماضِى قد ماتْ ،

وودعتَ الجراحاتْ

-2-

.. ومرت بيّا زى شوبتينْ

وزىْ شِيتاً حميمْ .. ودفينْ

يجيكْ وكتَ الوجع .. والشينْ

يجيكْ زىَّ العديل ... والزينْ

حضرنى شعورْ

شعورْ بحضورْ

حُضور محضورْ

وسادِى الدنيا .. جايى عليّا .. زفة نورْ

.. واتلَفَتَ .. بى هجمة فرحْ .. مسحورْ

وجُوه النورْ

بَشُوفِك نورْ

شَلَح تَالاىْ

تقول مَقطعْ من الدوباىْ

بِفتش ليهو .. لى غناىْ ،

أتاريكْ .. كُتِ دِيمه معاىْ

مهاجرة .. وفى الضُلوع .. جُواىْ ،

-3-

أتاريكْ .. رُحتِ قبلى هناكْ

وشلتِ معاكى كل الفاتْ ،

-4-

لِقيتِك واقفه فى كل المطاراتْ

ومتظرانى بالشوق والبسماتْ

وايدِك راعشة بِتقول لىْ .. سلاماتْ ،

لقيتك فى محطات القطاراتْ

والتُلوج نازلات على وِشيشك وصاباتْ ،

وإنتِ تحاحى بالتوبْ .. الدِميعاتْ

.

اسامة ابوزيد
21-07-10, 08:43 AM
-5-

أتاريكْ رُحتِ قبلى هناكْ

وشلتِ معاكى .. كل الفاتْ ،

-6-

لِقيتِك فى الشوارع والمطوراتْ

وجارية معايا مرات للضُلولاتْ

وواقفه معايا مرات فى الشموساتْ ،

وقاعدة معايا فى قهواية مراتْ

وتحكى لىْ حكاياتْ ،

وأشوف عينيكى ضاواتْ

كما أُمبارحْ ...

ومليانات محناتْ ،

-7-

أتاريكْ رحتِ قبلى هناكْ .

وشلتِ معاكى .. كل الفاتْ

تَّصاويرنا

وغناوينا

وفريحاتنا .. ومشاويرنا ،

وحاجاتنا الصغيرونات

والخليتَه تذكاراتْ

ورايا هناكْ

لِقيتَه معاىْ

بِتمشى معاى

وتقعد جَنْبى تتكلمْ

تعيد ليا جميعَ الفاتْ ،

-8-

أتاريكْ .. رُحتِ قبلى هناكْ

وشلتِ معاكى .. كل الفاتْ ،

-9-

وكُتْ قايل .. صَحيح الهجرة بتداوى

ولقيتَ الهجرة .. بتكاوى ،

وتَفتِحْ لينا ماَضينا

وتخلينا

مساجينُو ،

وكُلْ مادُرنا نَهرُبْ مِنوُ ...

نَلقانا ... مساجينوُ ،

-10-

أتاريكْ . . رُحتِ قبلى هناكْ

وشلتِ معاكى . . كُلَّ الفاتْ

بكي
21-07-10, 05:07 PM
سمسم ياحبيبنا نهديك ماساتي

بكي
21-07-10, 05:15 PM
انا المأساتي ما بتتقال بقيت احسب عميري الفات عذب لاحفلة لاشبال
لقيت الفات كثير وكثير مرق مرق لازوجة لا اطفال
تراني في مهب الريح مريكب لافحها الشلال بقيت مسحور عيونك ديل
اتحجر بقيت تمثال وافتش في مكانك وين لقيتك في قليبي هننننننننننننا
انا الجرب ماسي القي تعال شوف كيف حفن كرعي
وانا اتبشتنتا ياخلاي فوق درب الفريع الني
بقيت لي مع العيون قصة مخلفة فوق جروحي الكي
خيالن ماداوم تامر يحلق في خلاهو الصي
واشوف غيمتك انا العطشان واقول هسع بجيني الري

بكي
21-07-10, 05:16 PM
قلنا نساعدك شوية يامعلم

اسامة ابوزيد
28-07-10, 01:10 PM
إهانات مسببة

إلى العالم العربي المعاصر

الفاتحة :

نفتتحُ الآنَ

باسمِ العروبةِ

والقهرِ .. والجاهليه

حفلَ السقوطِ

وحفلَ البكاءِ

وموتِ القضية

ونقرأُ في البدءِ

فاتحةَ الضارعين ..

على أُّمةٍ عربيه ،

اسامة ابوزيد
28-07-10, 01:11 PM
الشهادة :

ها نحن ما بين دجلة والنيلِ ...

نلقى الأمّرينْ

فها هي بغدادُ

ما بين قوسينْ

وها هي بيروتُ

ما بين نارينْ ،

فيا ربُّ اشهد

بأنّا احتربنا ..

وكنا شقيقينْ

وكان العدو على البابِ يطرقُ..

أو قاب قوسينْ ،

اسامة ابوزيد
28-07-10, 01:12 PM
الخروج :

يا وطنَ الشعرِ

والشمسِ ..

والفتحِ .. والقادسية

يا وطنَ السيفِ

والخيلِ ...

والفكرِ .. والعبقرية

ويا وطنَ الراحِ ..

والرّوحِ والرّيحِ .. والأريحيّة ،

ماذا دهاكَ

ومَنْ ذا رماكَ ..

لعصر من اليأسِ والجاهليه ؟

وكيف كبوتَ

وكانت خيولُك..

تختالُ مقدامةً للمنية

وكيف انكفأتَ

وعُفَّر وجهُك

بالقهرِ والحزنِ .. والبربرية

اسامة ابوزيد
28-07-10, 01:13 PM
الدخول :

هاهم الآنَ

من كلَّ فاصلةٍ فيكَ – يا وطني-

يطلعونْ

وهاهم الآنَ

من كلَّ جارحةٍ فيكَ – يا وطني –

يخرجونْ

بكلِّ المداخلِ – يا سيدي – يدخلونْ ..

فها هم يُقيمون في طولِ شارعك العربيّ

وهاهم ينامون في عرضِ تاريخك العربّي

وها هم يبيعون رسمَك للسائحِ الأجنبيّ

وهاهم يبولون في حرمِ المسجدِ الأمويّ

وها هم يبيحون كلَّ حفيداتِ بيتِ عليّ ،

وها أنتَ ..

لم يبق منكَ ..

سوى اسمك العربّي.

الخاتمة :

نختتمُ الآن

باسمِ العروبةِ ..

والقهرِ .. والجاهلية

حفلَ السقوطِ..

وحفلَ البكاءِ

وموتِ القضيه ،

فمدوا مباهجكم ..

أيها العربُ الأوفياءْ

ارفعوا الكأسَ ...

فالأرضُ دارتْ ..

وعدنا إلى زمنِ الهمجية ،

فها هي أيامُنا جاهلية

وها هي راياتُنا فارسيه

وها نحن في آخرِ الأمرِ عدنا ..

بدون هويه

ودون قضيه .

اسامة ابوزيد
28-07-10, 01:14 PM
الماضي والمضارع



-1-

يا معشرَ الخزرجْ

صِفوا ليَ الحربَ ،

كيف تقاتلون من يبدأُ بالعداءْ

ويستبيحُ مدنَ الأطفالِ والنساءْ .

قال كبيرُهم :

نرميه بالنبِل وبالرماحِ ..

ثم نمشي بالسيوفِ ،

حتى يسقط الأعجلُ منا ..أو من العدو ،

فنحنُ أهلُ حربْ .

-2-

يا معشَر العربْ

(من الخليجِ الثائرِ إلى المحيطِ الهادرِ).

صِفوا ليَ الحربَ ،

كيف تقاتلون مَنْ يبدأُ بالعداءْ

ويستبيحُ مدنَ الأطفالِ والنساءْ .

قال خطيبهُم :-

نُحرضُ الجرائدَ الصفراءْ

ونعرضُ السيوفَ في المذياعِ والتلفازْ

ونُحسنُ القصائدَ العصماءْ

ثم نجلدُ البعضَ ،

فبعضُنا جاسوسْ

وبعضُنا كابوسْ

وبعضُنا ينخُر فيه السُوسْ ،

ثم نمشي بالوعيدِ ..

حتى يسمع الأعجلُ منا .. أو مِن العدوْ ،

فنحن أهلُ نَصْبْ .

-3-

تكلم الماضي ...

فكت المضارعْ

ولطمتْ خدودَها الشوارعْ

واستغرق العالمُ في المدامعْ.

اسامة ابوزيد
28-07-10, 01:16 PM
الدنيا صح فراقه لكن القلوب يا الدنيا مداكي الامان
وعـشم المسافرين الرجوع ولو ماكدي
ماكان في زول فات المكان
وانا لي حـبيب يــــوم دار يـسـيـب قال لي
قـريب برجع عشان نبني البيوت
نرسم خطوط الضو علي طول الـمكان

يا الله وين خاتم الـمنى
في رمشة العـيـن الأبـت بالـشـوق تـنـوم القاك هـنا
ارقــد عـلـي حضـنـك انــوم تمـلانـي ريــد املاك غـنا
مـا انتـي يــا بـحـر الشـعـاع الشمـسـو غـابـت مــن سنه
لـسـع بيغـسـل قلـبـي نـــور يشـرقـنـي يـــا ضـــي الـهـنـا
يـــا الـقـمـره ويـــن السـنـسـنـه لا حــتــي فــــي طــــرق
الــشـــعـــاع الــــمــــن زمـــــــــان فــــوقـــــك بــــنـــــا
هي اقـلـبي الصـفحه الـعـلي الـسـماء مـن هــناك مادام هنا
زولي البدي الدنيـا نـور ضلـم رحيلـوا الامكنـه

تراهو زي ما الطيف يمر الليل يمر اليوم يمر والعام يمر
وانـا فـي الـدريـب الفـتـا بيـهـو ألــم اتــر قـدمـك واصــر
ارجـي المسافريـن وانشـدن هـوي فـي المـدن مـا شفـتـوا
زول شـــــــايـــــــل بــــشـــــاشـــــات الــــفـــــجـــــر ؟
مـزج الصباحـات بالمغيـب لــون خــدودوا مــن العـصـر
وآه يـا بـيـوت لا دقــه بــاب لا فــات حيطـنـا العنكـبـوت

وانا لسه راقد في الرصيف
راجيك تقيف قدامي قبال ما اموت
دنيا من بعدك يباس ينشرا فــي الـوديـان سكوت
يا الله يوم كدي بالنهار فرح المواسم نفرعوا
صوت القطارت من بعيد فوق الفلنكات نسمعوا
اشواقنا والناس الزمان وكل المسافرين يرجعوا
المح حبيبي انا من بعيد يهجم قليبي ويقطعوا
حزن السنين الفينا ساد انا وانتي سوا سوا نقلعوا

عمار صالح
28-07-10, 02:38 PM
كلام من جوف الضلوع

واصل ياسمسم

محمد هلا
30-07-10, 06:28 PM
الدنيا صح فراقه لكن القلوب يا الدنيا مداكي الامان
وعـشم المسافرين الرجوع ولو ماكدي
ماكان في زول فات المكان
وانا لي حـبيب يــــوم دار يـسـيـب قال لي
قـريب برجع عشان نبني البيوت
نرسم خطوط الضو علي طول الـمكان

يا الله وين خاتم الـمنى
في رمشة العـيـن الأبـت بالـشـوق تـنـوم القاك هـنا
ارقــد عـلـي حضـنـك انــوم تمـلانـي ريــد املاك غـنا
مـا انتـي يــا بـحـر الشـعـاع الشمـسـو غـابـت مــن سنه
لـسـع بيغـسـل قلـبـي نـــور يشـرقـنـي يـــا ضـــي الـهـنـا
يـــا الـقـمـره ويـــن السـنـسـنـه لا حــتــي فــــي طــــرق
الــشـــعـــاع الــــمــــن زمـــــــــان فــــوقـــــك بــــنـــــا
هي اقـلـبي الصـفحه الـعـلي الـسـماء مـن هــناك مادام هنا
زولي البدي الدنيـا نـور ضلـم رحيلـوا الامكنـه

تراهو زي ما الطيف يمر الليل يمر اليوم يمر والعام يمر
وانـا فـي الـدريـب الفـتـا بيـهـو ألــم اتــر قـدمـك واصــر
ارجـي المسافريـن وانشـدن هـوي فـي المـدن مـا شفـتـوا
زول شـــــــايـــــــل بــــشـــــاشـــــات الــــفـــــجـــــر ؟
مـزج الصباحـات بالمغيـب لــون خــدودوا مــن العـصـر
وآه يـا بـيـوت لا دقــه بــاب لا فــات حيطـنـا العنكـبـوت

وانا لسه راقد في الرصيف
راجيك تقيف قدامي قبال ما اموت
دنيا من بعدك يباس ينشرا فــي الـوديـان سكوت
يا الله يوم كدي بالنهار فرح المواسم نفرعوا
صوت القطارت من بعيد فوق الفلنكات نسمعوا
اشواقنا والناس الزمان وكل المسافرين يرجعوا
المح حبيبي انا من بعيد يهجم قليبي ويقطعوا
حزن السنين الفينا ساد انا وانتي سوا سوا نقلعوا


فعلا الشايقية ملوك وأبناء ملوك وسادة في كل شيء وفحول شعر

اسامة ابوزيد
01-08-10, 09:58 AM
عمك هلا ذااااااتو بهنا

شرفت يا عمنا

اسامة ابوزيد
03-08-10, 10:46 AM
زمن ماجاني صوتك طاش

زمن ما جاني صوتك طاش .. ولا جيت ماري أناديكا
مشحتفة بعدك الأحضان علي تبتيب أياديكا
مشيت وين بس عشان أغشاك .. أبل أشواقي ألاقيكا
وزمن ده أنا وإنت والأمواج .. مراكبي وشوق مراسيكا
***
سلامات والفؤاد طاريك .. منابع حسو أتاريكا
وراك لاجفن الدمعات .. ولا قصرن لياليكا
جفيتني وتهت في الأيام نسيتني أنا ماني ناسيكا
تعال بالي العليك مشغول كفاهو فتر يباريكا
***
أرض مجرورة راجية الغيم تشابي علي تقاويكا
أنا الكمترني شوق عينيك وأزاني وجع طواريكا
تعال أرويني بالآمال سرابة سرابة راجيكا
ومتين بس ياسحاب الخير بتروي لهيب بواديكا
***
كتير ونست صمت الليل نشيل ونخت غناويكا
كتير فكرت كيف أنساك .. متل ماك جافي أجافيكا
غلبني وحات سواد عينيك مع العابرين أساويكا
وشنو الناقصني إشان إرتاح بالاك وبلا ألاقيكا
***
حليل يوم طلتك مشتاق حنين الدنيا ماليكا
تلومني علي غيابي إرتاح .. وكت تزعل واراضيكا
ومنو الكان زينا الأفراح بيملأ حسيس مزازيك
وحليلك والقدر لفاح .. ختفني أنا البضاريكا

اسامة ابوزيد
05-08-10, 03:20 PM
عدنا مع مسدار القاف وشاعرنا الرائع سيداحمد الحردلو .. تابعونا....
حرف القاف

بوراق الحب
الحم غززن لى حسارى عندى بوراق
كولهن طنعو تف لى من بعيد ما بزارق
السبب الخلانى من النقير مدارق
سكعى البانقير بى دريب اصبرى العارق


سخلة ود فهيد
جميز فامك البارى الهرف والفرق
برعيمك سمح دغمة براطمك زرق
كحلة وغر عيونك يا أم حواجبا فرق
سخلة ود فهيد ديفة الثنايا البرق

رمح حاد
درعا تا على عليو النعام مراقة
درجت عقلى فى نجيم علقته أم براقة
تف أم إيدنفج حربته مى زراقة
حادة برا نفخ فورا كتير وطراقة


امتنعت عن كل طالب
قرنك برعوهو وجدعو كلاقة
قرطن فوق عقد ورقك برا لصاقة
ست سرقة مشية ثابتة خاتية شلاقه
دى قسيت على فرسان ا والدراقة


حديث عذب
بت اليازمان قبل الرضيم تتاقه
فيها خمس حزوز شورتين عقب خناقه
تلت وبكت الخوخ النقرتو دقاقه
فوته على البنات تمرة لسان وحداقه


دهر معاكس
كم شويم لهن وكتا كتير فوق ناقة
زمنا فى طرف ريسة وشوية فاقه
عاكسنا الدهر كترت علينا العاقة
نحن برانا يا عبد الله كيف نتلاقه


جفانى النوم
ها الايام على زايد حسار معتوقة
آخد ليلى تام غمدة نهار ما بضوقه
جلد الما انسلخ لحمو وانجلب فى سوقه
كرفها قالوا منعش لى البشم معشوقه

اسامة ابوزيد
05-08-10, 03:21 PM
فاقت بنات الجيل
لخلوخة تقوم مسايسه ومفروقه
بين التقنتين دفق البصير ما روقه
ان جلست معاك وان سمع منطوقه
على المشببات بلحيل بعيد معلوقه


شهادة شاعر
ديفة اليازمان جفلن على بانقوقه
دفقوا الشاهى صرف فوق عقلته المشقوقه
كان يا الليلة فى قيد الحياة ود دوقه
نما مو ملتق كان بجدعو فوقه


تحسر على الماضى
كت فى جقدله وفا قه وشوية روقه
على الدنيا راضية العندى مى ممحوقه
شن معناها هسع نمتى المربوقه
كانت ليك قبيل ما تبقى كدى مسرقه


لا أطيق فراقا
لتيب خشم الدرو الكبد البقونة بساقى
فى ناموسو فوق ساجا كبير متاقى
ديفة الفى اللتيمة مقمحة البنداقى
فى سهمين عوالى وجرسه منو فراقى

خفيف الراس
ستات اللبيق ال فصلنو مطارق
حسرورهن على كل مرة بصبح فارق
خفيف الراس شفق جاب لى الخبر مسارق
قالوا بحنسوهو وخالتو فى بطارق


نسام الغفر
لتيبا حارسو حراتو ومسايس وفارق
عقب الحرة صقار من السموم مدارق
أتناين عروقو وراح فصيصو يزارق
لامن جاهو نسام الغفر مسارق


الحساب الفارق
حسرورن زمان انا ضيقنبو خلاقى
طول الليل مساهر وعينى ما بتلاقى
من فرط البجينى الهجعة بى العراقى
وين ما دور أغلق فوقى يصبح باقى


جيل طردونة
مطرقى مابمضع فيها لى السواقه
كتلت من عصرها وما انخبر سراقه
جيل طردونة هادا ما لى فيهو علاقه
يا ريت السركه تكون لى فيهو لياقه

اسامة ابوزيد
05-08-10, 03:24 PM
زمن ما جاني صوتك طاش .. ولا جيت ماري أناديكا ..
مشحتفة بعدك الأحضان علي تبتيب أياديكا ..
مشيت وين بس عشان أغشاك .. أبل أشواقي ألاقيكا ..
وزمن ده أنا وإنت والأمواج .. مراكبي وشوق مراسيكا ..

سلامات والفؤاد طاريك .. منابع حسو أتاريكا ..
وراك لاجفن الدمعات .. ولا قصرن لياليكا ..
جفيتني وتهت في الأيام نسيتني أنا ماني ناسيكا ..
تعال بالي العليك مشغول كفاهو فتر يباريكا ..

أرض مجرورة راجية الغيم تشابي علي تقاويكا ..
أنا الكمترني شوق عينيك وأزاني وجع طواريكا ..
تعال أرويني بالآمال سرابة سرابة راجيكا ..
ومتين بس ياسحاب الخير بتروي لهيب بواديكا ..

كتير ونست صمت الليل نشيل ونخت غناويكا ..
كتير فكرت كيف أنساك .. متل ماك جافي أجافيكا ..
غلبني وحات سواد عينيك مع العابرين أساويكا ..
وشنو الناقصني إشان إرتاح بالاك وبلا ألاقيكا ..

حليل يوم طلتك مشتاق حنين الدنيا ماليكا ..
تلومني علي غيابي إرتااح .. وكت تزعل واراضيكا ..
ومنو الكان زينا الأفراح بيملأ حسيس مزازيكا ..
وحليلك والقدر لفاح .. ختفني
أنا البضاريك

اسامة ابوزيد
09-08-10, 10:46 AM
لادخلت قليبي سواها ... لا قادر كمان انساها
لو كان بس نجيت من نارا...ناري التاني بدفاها
قولو الدار تقولو عليا ... برضي انا معترف بهواها
خلتني وقنع يا خلة.. لاكن قلبي ما خلاها
اليقنع قليبي يسيبا .. يبقي حجر اصم تالاها
يقنع والدة مجنونة.. يوم تتبرة منو جناها
,,, ,,, ,,, ,,,,
بهوى صددودا بهوى عنادا..بهوى الانتظار في رجاها
بهوى غرورا لماغرورا.. في عينيا زادا وجاها
بهوى جراحي طالما جراحي.. حين تبسم تحاكي شفاها
بهواها وفلبي عليها.. يحفظا من خلوقو الاها











لو خايفا لي من آهاتي واحزاني البعيشا وراكي
اعرفي انو عزة نفسي اكبر من مدار ادراكي
تاني انا لاب تهزني لوعة..لا برجع واجيك متشاكي
قادر حتى افارق ضلي رمشي انا مابدمع شاكي
من جور الظروف اعتدت..في كل خطوةاشوفو هلاكي
ايه يعني ان قسيتي وجرتي..واتنكرتي ليهو هواكي
لا الدنيا بتقيف كان فتي لا روحي بتفوت بوراكي
لا قلبي ان علي انهدهتي قادر لحظة يستناكي
الدنيا العبوس بي خيرة اياك من تظني اياكي
ياك قمر الزمان في سمانا يابوحة اتخلقتي براك

اسامة ابوزيد
11-08-10, 06:15 PM
مواعين الشجن

بيناتنا كان ساح العرق
واتقصقص العشم القبيل كان المرق
ساند قفا الإحساس وكان
شايل عرش بيتنا البنينا من الصدق
يا غالية بس .. لو مافي شي
فضل علامة من العشق
ما قايلو بظهر في الوشي
ومن بين عيوناتك يّبق
يحرق حبال وصلي القبيل
وكل الغنا الشلناهو ليل
في لحظة إتحته وحرق
ومركب هوانا بعد فرد
أشرعتو في الأحزن غرق
يا غالية انا المليان أسف
لوشفتي يوم قلبي الحزين
يوم أتختف لون فرحتي
ويوم اتهزم بينا الحنين
يا غالية مات فيني العشم
وقنّعتي عمري من السنين
يوم شال سعادتي هوا الندم
وشتّتّني في الأيام انين
يا غالية ما اترفعت قدم
الا الله قاللّها كوني
كوني كانت من عدم
يوم سقت دربي بعيد وكم
قاومت يا غالية السنين
ومرقت من جواك حريق
بس لسّه في جواي دفين
وآه ما مرق زول من حريق
مرقة سبيبة من العجين
يا غادة حرقان بي بكاك
ويا حلوه اسف لو هواك
تكنّتي في الأيام ندم
وضريتي بي ريح الهلاك
وانا يوم .. معاك
ازرينا في المجهول عدم
يا غادة ما كان المني
والله ما كان العشم
يا حلوه ينبشنا الكلام
وبين الحطام
تلقيني عضمة بلا لحم
لا انت .. آخر بت
ولا انا .. آخر اولاد الزمان
لا ريدنا آخر ريد
ولا اتكشحت مواعين الشجن
يا غالية لسه الدنيا في
ولسه بنعشق ونشتهي
وايامنا لسع ما إنتهن
قبال أعاين في وشيك
دمعة أساك ..
ويا ريتا يا غالية إنتهن
قبال اجيك ..
قبال يسوق قدرن خطاك
يا غادة اسف لو بكن
عينيك علي أيامي المعاك
سامحيني يا غالية الزمن
هو الساقنا لي مدن الهلاك
يا حلوه بدفع في تمن
غفلة قليبي انا يوم نساك
بس لو فضل جواك شي
ولسّع بريقك ما إنطفا
وجواك عقاب حبي القبيل
أتمده في الأيام وفا
سامحيني يا ما عشمت فيك
لو قلبك المجروح عفا

اسامة ابوزيد
15-08-10, 06:26 PM
حماد قام بدري سأل امي
قبّال الشاي والناس نايمين
قال ليها آيمه الناس بي كم؟
قالتلو الناس!! الناس غالين

قال ليها الزول لو دار يتباع في السوق
او كان تموين بيكون بي كم
قالتلو آآآود قول بسم الله
انتَ صِبِح محموم الليلي !!
ده كلام الجن والجان والجنبو الما طيبين
قوم صلي صلاتك واسأل الله ان شاءالله يعين
قال ليها آآيمة امبارح كان
في البيت الفاتح في الدكان
انسان معروض والناس قاعدين
قالتلو انسان زيي وزيك والناس شايفين؟
قال ليها ايمة بنية حلاتا
وكمان من ناسنا الغلبانين
جات شاقي الشارع ..العصر امبارح
والريحة تقول زرعو الياسمين
لابساله قميص زي برنامج التلفزيون الكان في السهرة
فوق للركبة وبلا ايدين ... وبتنادي الناس .. ياناس ياناس يامحتاجين
قالتلو تقول ياناس ياناس والناس سامعين ؟؟
قالليها ايمة بلا اصوات وبيناتم كان سمساري العين
قالتلو آآاود طب وين اخوانا ووينو بلدنا ووينو الدين؟؟
قالليها اخوانا ...كانو سكاري وطوالي اايمة هم سكرانين
والدين آآيمة هناك في الجامع ... بره الجامع مابسووا الدين
حماد كان عمرو يكون كمطاشر .. والوالدة تكون الكم وخمسين
شوف فرق العمر الكان بيناتم ... وبيناتم كان كم زول عايشين ..
كم زول مبيوع كم زول اتباع وكم دلالين ..وقبال ماتقول الوالدة كلام ..
قالليها آيمة شايك فار
قالتلو آآآود الشاي ملحوق دي انا كاتلي النار ..
قول لي كيفن مابسوو الدين !!
قال ليها اااايمة البت يايمة لو دار تتباع بس تقلع توبا وتشق الشارع ..
تقابل واحد حافظ السوق وعارف الحاصل .. وبي نظرة صغيرة وغمزة عين ..
تصبح حق الولد البت وتصبح هي المجنونة وهو العاقل ..
عرفتي آآيمة الزول بي كم
الزول بي شرفو .. بالشرف الغلي المامبيوع ..
عشان آآيمة ..بي اييد القدرة الزول مصنوع
قالتلو آآود سرحت معاك والبهم انطًلق وهسع برضع في النعجات
قالليها آآيمة الشاي بي كم ؟قالتلو الشاي بي كم تمرات
والسكر وين ؟؟
قالتلو خلاس !!كملت حديثك وجيت تتحدث في الممنوع والممنوعات!!
احشي خشيمك واشرب شايك بي تمرات
وقوم اندلي وازرع شرفك وشرف اخوانك وخدر فوق الطين قمحات
وازرع شرفك وشرف اخوانك وخدر فوق الطين قمحات

اسامة ابوزيد
15-08-10, 06:27 PM
مشيت بعدك بلاد الشوق .. غشيت في سكتي الأطلال
لقيتك لسة في الخاطر .. وفي مرقة شمس باكر ..
ملان بيك طول حياتنا جمال
رسومات روعتك تذكار .. علي ابواب بيوت الحي ..
محل تاوق .. لقيتك شوق .. مشتت في الشوارع ضي ..
اماسينا البتسهر بيك .. نجيماتنا البتشهد لي ..
وراك لاجفن الدمعات .. ولا اتلاقن رموش عيني ..
اونس بيك نصايص الليل .. احجيك دندنة وموال ..
سألت عليك براي النيل .. تميراتنا وعصيفير الهوى الصداح ..
لقيتك في عيون الناس .. حنين ساكن القلوب مرتاح ..
بتطلع من حكاياتنا .. وخيالاتنا .. بعيد شايفك رهاب رحراح ..
انادي عليك شموس تمرق من الواطه .. قلوب بيضا .. شعاع وصباح ..
يبق نورك مع الفجاج .. علي النخل العزيز وطوال ..
اتاريك إنت كلنا بيك .. بلاك نحن وبيوتنا شجن ..
تموت سيرة الفرح نبكيك .. نتوه مانلقى لينا وطن ..
جناينا وضرانا الفوق .. قمارينا وحسيس القوق ..
رحل كل البلد وياك .. نزل جواك .. حنين وسكن ..
وأنا ( الكاتلني ) من يومداك .. علي عينيك عيوني بكن ..
اقالد ذكرتك جواي .. وأعيش باقي العمر رحال ..
سلامات وين نزل محياك ... تحياتنا وأمانينا ..
اكيد باكر نجي ونلقاك ... قمر باهر أماسينا ..
تبل شوق القلوب ترتاح .. علي نمك غناوينا ..
(لدايات) شايك الرماي .. مزاجات قهوتك جواي ..
احاسيس فيني تتحكر .. جمال نيلنا وعصارينا ..
نضاريك في العيون تظهر .. بريق لهفة ودمع هطال ..

اسامة ابوزيد
15-08-10, 06:29 PM
البحث عن ذاكرة لوطن مفقود







عَبيّت زُوادتي الرّيقة من بايت القَوَى ..

الوطن الدّشَرْ ...

غيمو الرّبَطْ

ساعة بقينا من الرّوَى ..

شبّة مطرْ ...

سافرت لِكْ بأشواقي لآخر المنافي ..

بَحّتَّ في كل المخافي ..

وكُسْتَ عَنِّك في الخُرَطْ





في التواريخ الرؤومة ..

بين نقوش نبتة ورسوما

في الطّرابيل العظيمة

وبين لُغة مروي القديمة

وخَطْ .. في خَطْ

راجعتَ بِكْ كل الاسامي... البعرِفا

كل الُّجمل .. حتى الضمائر ... وأحرُفا

صحّحتَ بِكْ زمني الغلطْ

باخَتّبِكْ قلبي الشّقِى ..

وبشرتو بي لُقْياك عَبَطْ

يا طيبة زي شارع وَسَطْ ..

يمشيبو كادِح وارزقي

وممتنعة زي قبض المياه

والمافي

والما بتلقي

غالِبني جيتك أصادفا

لا في المعابر والموانيء المُترفة

لا في المطارات الوسيمة كما الفراغ ..

لا الأرصفة

كل الدّروب التّعرفيها وبعرِفا

التألفيها وبألفا

خَشّيت دغيش سِعْن الدِّني المرفوع على سِيبات وفا

رَوّابي كان قُطّاع غني ..

وشوقاً مَفورِنْ وانكفى

قِدّام خُطى الوجد الِحفى

غابت صباحات القُرُب ...

وبَقّت ضلامات الجفا

و ضَي المصابيح الجريح ..

كِترْت علي الرّيح .... وانطفا ؟؟؟

هوي يا بِنيّة من الغُبُش ..

من حَرْ أباطهم مُترفة !!!

وين انتي شان نرقد قَفَا

وين انتي وين .. في يات دُغُشْ

ما بيننا بين غيبتك كفى

لو بَقّ حِسِّك في هشيم دبش الضياعات والسأمْ

زي أغنية شوق ..

زي نشيد ..

اندبَّى همسِك زي نغمْ

او خبّ خطوِك زي شهيد ..

رَفّتْ مسيرِتِك زي عَلَمْ

ما كان مهابات الصِّقور

(نخّت) تحت رخّة رَخَمْ

وين انتي وين ...

ما كان هجم ديش العجم ....

والدِّنيا ضَوْ

وامسن سبايا الاغنيات

العُزّل ... ألآه ... شِنْ تسوْ ؟؟؟؟

ولافي الكفوف الخاوية سيف ...

لا في الكتوف الزاوية ضَوْ !!!

دَلّجتَ درب الاربعين ..

صاقَرْ قوافل الرِّق .. سنينْ

برّاً

وبحراً

حتى جَوْ

أشريكِ قُلْتَ من الزمنْ

واعتق معاك رِقّة مشاعري ازوِّجك كل الوطنْ

كل الرِّجال الحملو ارضك بالحلال ...

وافتق سحاب العشق شَوْ

ولا بنتي في الزِّنج البَجَمْ ...

لا كنتي في العرب الأشوْ

لافي شلوخا ..

ولا الوشم ..

لا في شيوخا ولا في عَوْ

بل فيكِ غشّاني الزمن ...

ادّاني صَرْصَرْ وبعتو نَوْ

كوترني .. بي حبل الوَخَمْ

كُلْ ما انقطع توْ .. باَنْ لي .. توْ

ناقِزْ وراكْ ..

ناقِزْ وراكْ ..

ناقِزْ وراكْ ..

انترْتَعَتْ رُؤياي ..

هَكَعْ ..

ما بين أريت ... يا ام زين ... ولوْ

وبين تبقي وين ..

لاكْ في الوجود

لا في العدمْ

لا في الحقيقة ... ولا الوهمْ

لا زين

لا شين

لا البين بين ..

يا راحة الباقالو هَمْ

لا عنِّك أفتاني الزّمان ..

لا مِنّك إنقطع العشمْ

يا ريتو أغناني الكَمَانْ

آ طيبة عن صوتِك نغمْ

من أعلى ميضنة فيّي كان أعلنتَ موتِك للأُممْ

أو .. صِحْ بجيتك لى الرِّمَمْ

لكنو صمتك طال ...

وحَانْ ميعاد زفافي على الألم

قلت ارفع ايديني واقول ...

خاني الصبر ..

خان وانهزمْ ؟؟؟

زي ما انهزم كمّين نبي ...

وخانت على التاريخ ذِممْ

آ طيبة أخافك ؟؟؟ واللاّ اخاف

السُّبة واللّعنة الوبيلة ؟؟

تحل وراي كما الجفاف ؟؟

أو..... تار على اكتاف قبيلة ؟؟

معلمي اللّــــه من عتاد ..

يبرِدْ حشاها ... ولا في حيلة

بَلا تأمِّل في البُعَاد .. سنين ...سنين ..ودنين ... طويلة



وكيف ؟؟ وكمْ ؟؟

والإنأخد بالدّم غَصِبْ ...

مافي البرجِّعو إلاّ دَمْ !!!!





آ طيبة هيلة ..

سلام

عوافي

يا أصيلة .. كما المَعَانا

أو .. بديلة عن اللِّي مافي

يَمّه أدخلي على غُنانا ..

يا أمُرقي من القوافي

يا أحذرينا وما تخافي

وما بنخيّب حاشا ظنِّك ....

ينفخوها وما بتموتْ

حيّة نارِك ... حيّة يوتْ

خُتِّي قِدْرِك في الأثافي ..

يوسف الفي الُّجب بيمرُق

ضاربا ريقة اليلقى قوتْ

روقي أكنِّكْ ..

واللاّ كَنِّك ..

تاوقي في البحر الخرافي ..

يونِسِك في ياتو حوتْ

سَمّ ينده جوفو حافي ..

وهِّطينا على الأثافي....

وهِّبي نارك لا نموتْ

يا حمامة غار محمّد ..

يا خيوط العنكبوتْ

يمة كُسناك ضُمّة مافي ..

الدّروب وين غيّبنِكْ ؟؟؟

في سؤالنا الضّارِي عَنِّك ..

سَدّن ابوابِن بيوتْ !!!!

والبيوت البشبهنِّك ..

انكرننا وانكرنِّك !!!

ننكشف لا لوم عليهن ..

بس ها كيفن يسْتُرنِّك ؟؟

وفي سُكاتنا الجاري مِنِّك

رحّبنْ بينا السجون

الدرادر والمنافي

فينا مَنْ روّح فدايتك ..

وفينا من لا زال ...

وفينا

مافي من بدّل لرايتِك

وانتي في ذات السكوتْ !!!

التراب يتشهّى حِنّكْ ..

السِّحاب عابر يفوتْ

واللاّ يكمُد للعيون

بالغُبار غُمّة وسوافي

وانتي يا آخر المرافيء

يا امْ وجوداً بات خرافي

في صحاريك داخ غفاريك ..

من برِد زمنو الرِّعافي

دون كواريك ..

مات واتاريك

غبتي بي كل المدافيء

يا لساريك .. لاك موافي

لا كمان قادرين نسيبِك نمشي في الزمن المجافي

ما عهدناك عاد تخافي

كانفعالات المُراهِقْ ..

شابكة كالشّجَر الضِّفافي

خيلِكْ - الرِّيح - حين تنهّدْ

لوحة التاريخ بيشهدْ

لونا والدّم الإضافي



إلاّ يا وتري وغُناهو ..

راحة أنغامو .. وعَنَاهُو

يا نبي الثورة الغشاهو

برداً أكتر من غُتَاهو



الاّ يا بِتْ جاك زمن دارِعْ الأيام قُلُبْ !!!

الدفاتر والكتبْ

إستحمّتْ بالغُلُبْ

التلاميذ النُّجُبْ ..

طيّشا الفقُر ....

الغبينة

صنّت الأجراس وجينا

إلاّ يا .. آخ ... ما لقينا

الجوامع مستباحة ..

والمصلّين صَرْ جُنُب

الكنائس جالبا دينا !!

والمدينة تبيع عوينا !!!

لي النخاسية الغُرُبْ

لي اللُّحاسية وعُقُبْ

تشتري آفات الرُّعُبْ

والهتافات الجُرُبْ

عربدت باسم السّما ..

توّكت ريح السُّحُب

ومن ضُروعاً .. كان تكُبْ

كل أطفال الفقارى ..

وكلهُنْ في فَدْ شُخُب !!!!



في اللُّغة الجرسية .. سُبْ

في التُّقى النجسية .. سُبْ

في الوقار الفاوه ... سُبْ

في شعار ما ساوى .. سُبْ



واللاّ اريت ما كُنّا منك ..

لا في بيناتنا القُرُبْ

كُنّا اقلاّ نشوفو عادي

التردِّي الجاي وغادي

سادي في النعم الزيادي

وابن آدم بالأيادي

لى سُترة الحال يكافِت ..

غابة غابة ..

ووادي وادي

ينبح المسكين يا طيبة ..

طيبة يا راحة الفتارى

وواحة الفي الصّيْ حيارى

عورة الشُّرفاء الفقارى

سُترتها ولُب المباديء





يا بنية الأُجّر ام خير ..

أو نبية الشجر الطير ..

يا رسول البسمة للاطفال ... حبيبة نيل بلادي

يا طليقة الغيم ..... عروس طين البوادي

المناديل بانتظارِك ... والايادي

معبّا شوق ..

يا طيبة ..

طيبة ..

طيـــــــــــــــــ ...

ولا حياة لمن تنادي

بَكاك بكيتني .. سَكَتْ برايا



كنت حافي على إبر ..

بِتّ حابي على شظايا



من انكسار رمّاشْ عيونِكْ

فوق مسام سام المرايا

من كُتُر تعباً تعبتو ..

قلت ألقاك ما كَفَاية

يا تكمِّلي فيّي صمتِكْ

يا أخلِّص بيك غُنايا

دي الحنايا وراكِ يبستْ

وامست آشميق الخلايا

وبِتّ أمسِّرْ من حروفِكْ

وأفتل الأيام .. قراية

نبّقْ الغيم .. برضو إرضِكْ

ما استجابت لي سُقايا



وقُلتَ اخطِّكْ بي دمايا

يا اصابعيني ابقي ريشة

ويا شراييني الدواية

وقنِّعي الرِّيح الورايا

النّكعْ بالخيل ..

محالاً ..

يدِّي بي بَقَر الدّرَايا

انتهت كل الخفايا

وقلت اكوسلِك في الخطايا

لمّا في ذات لُقيا حَرّ ..

وزاد هواكي على هوايا

وقمتي خنتيني معايا ؟؟؟

اشتكيتِك لى القمرْ

وضُمّتْ انسام السِّحرْ

الرياحين والزهرْ



شهدوا ليّ عليك يا اخيّة

جاء القمر سوّاك بريّة

وباعتزاز بى نبرة حيّة

صاح في جمعنا يا بريّة

من يكن من غير خطيّة



؟؟؟؟؟؟؟



وقُمْ رميتِك بالتحية من اللِّي فيّ

فيا .... وفيّة

يا معاكي تغيبينا ..

يا تعالي وابقي جية

للبعيشو غَصِب عشانِك ...

والبموتو بحسن نية

حَارْ علينا بعد طراوة ...

وبين عيون احباب تقيّة

نبقى في كتمة وشقاوة

وبين أرَاذِل

وارزقيـ….....ـة



كفاك شكية !!

كفاك شكية !!

يا التّشرِّكْ لي غمامك ...

وتحتَك الانهار قوية

ما انسرق ذات ليل سنامَك ...

لو قبيل كُسْتَ الحوية

كفاك شكية !!

وما بيضيع حق لا قضية

لو في طُلاّب من وراهو

ونية بيضاء وبندقيـ……ـة