المساعد الشخصي الرقمي

مشاهدة النسخة كاملة : حلمنتيش


magdikooooo
15-02-10, 03:07 PM
أحد ألوان الشعر .. لذيذ .. ذو عبارات واضحة ومباشرة ..
إن أسعفتني الايام سأحول تجميع أكبر قدر من قصائد الحلمنتيش ووضعها هنا ..
وللاخوة المتواجدين بكوستي بصورة خاصة تذخر ذاكرة المدينة بشعرا لديهم من القصائد الجميلة والواسعة الانتشار أرجو مراجعتهم للتوثيق لهم ..
ولبقية الاعضاء دعوة ليجودو لنا بما لديهم ..
وشكراً

محمد ساتي
16-02-10, 05:01 PM
دي قالوا اجمل قصيدة حلمنتيشية

بعد اذنك يا ابو النسب

بالجد القصيدة دي ضحكتني لمن دمعت

اها اليكم القصيدة

ونقعد نحن متقابلين

واعاين ليك تغمضى انتى وتعاينى لى اغمض انا


وتبداء القصه من اول


واعاين ليك تغمضى انتى وتعاينى لى اغمض انا


وتبداء القصه من اول

واعاين ليك تغمضى انتى وتعاينى لى اغمض انا

ولمن تكتر النظرات

تبداء القصه من اول

واعين ليك تغمضى انتى وتعاينى لى اغمض انا

وتبدا القصه من اول

واعاين ليك تغمضى انتى وتعاينى لى اغمض انا

عبدالحفيظ أبوسن
16-02-10, 05:11 PM
تعرف يا اساسي دي أنا سمعتها من سيدها في الثمانينات في جامعه الخرطوم وهي طويله سيدها أظنو المستعرب الخلوي
بفتشها ليك

محمد ساتي
16-02-10, 05:25 PM
انت عارف العجبني فيها انا كنت معتقد عندها باقي طويل لقيت الراجل مقتبس الجزء دا بس فضحكت على نفسي شديد

Abousamih
16-02-10, 06:40 PM
واعاين ليك تغمض انت

عبدالحفيظ أبوسن
16-02-10, 11:07 PM
قصيدة جميلة لشاعر الحلمتيش
محمد الجاك الصراف
المعروف بإسم
المتشعلق بن المنبرش
....................
حــلـيل خــالك ...!

الدُّخـْرِى يا ود اختِـى عِـز الدين
بآكـر تزور بيتنا وتشوف صورتى
وتقول : حبوبه ديييك صورة مِـنـُو الملصـُوقـَه فى الحيطه ؟ ! ...
يقولوا ليك : دى صورة خالك آ ولدى ... حليل خالك ! ...
أكان زولاً بشد الحـيل
يونسنا وكلامو لذيذ ... عديل بلحيل ....
كتير الناس تقول مجنون .. وما مجنون ...!
فى شيتاً جُـوّه فى قلبو يزاول ليهو حَامِى النـوم
يبـرِّم فى سبيب راسو ويساهر لى هوايد اللـيل
يقوم من نومو ضربة ديك
يفوت من بيتو بى ِريقـو زى الضيف
يشيل مُحْجَانو فى كتفو ..
وِيطـُـب مُخـْلاتـُو فى باطو..
وِيفارق الحله مستعجل مع هبة نسايم الصيف
وحفيان ساى ! .. يبارى القيف
يضُـرب الغابه وِتـْوَكـَّـر.. يحـِتْ فى ( السـّعَـفـه و العـُـلـّيف )
يهـز شـدراً فروعـو حديد
ولمّا العين تكون شافت قريب وبعيد ,
بهايم الحله تتوجه عشان ما تاكـُل المحتوت ..
يعاين ليها وِتـْبسم .. وما يحاحيها .. يمشى يفوت
حشاهُـو ضَـمرْ تقـول عجلاً مكـَدَّن فى الوِتِـد مربوط
بعد ماتـْغيب يقوم يرجع .. . يجيب نبقـاً تقول ياقوت
مغـسـَّـل بى دموع الحـُور ..
معلـّق فى رِقيبة السمحه فى البنوت
يخـُتـُّـو حداهـُو وِتـْـلـفــّتْ .. وجيهـو حزين ..
بدل مايقول بدور آكل .. يقول بس نادوا عز الدين
حليل خالك ... !

أكان زولاً بريد الجوطه والحفلاتْ
محل مايسمع النـّقره ,
يخت طاقيتو فى راسو
ويشيل طمبورو فى ايدو
وِيدِجْ حفيان برا نعلات...
دلاليك العرس داقات ...
ريحة المحلب المخلوط مع الصندل ...
حنة ملخوخة فى طاسات..
ضـريرتاً ماليه خشم ( الحـُق) ...
وام العريس مشغوله بس بالدخله والمرقه
وبنات عم العريس واقفات
يسالمن ديل ... ويعزمن ديل .. ويجاملن ديل ...
وشايلات جرتقاً ما غـَشْ !
خرز منضوم مع اللولى ..
وهلالاً زى هلال شوال .. حرير يلمَعْ !
زغاريت البنات طاقات ..
عريس بالفرحه داير انشق ..
محصن نفسو بى ياسين
وجايبين ليهو عضم الحوت
ومالى ضراعو بالحجبات ..
حجاب جلادو ( ود فراج ) .. غـليد وَاحَمَـرْ ..
مَـتقــّـله بطنو بالآيات
وهـاك يا زغبره وْجـُوطه ..
وناس داخلين وناس مارقين
وناس قاعدين وناس واقفين
وناس نايمين وناس صاحيين
وناس ضاحكين وناس باسمين
وناس رايقين وناس جايطين
وضيفاً جا وضيفاً فاتْ ..
وخالك منسى فى طرف الصريف واقف ..
لا زولاً يقولـُّو أمش ..
ولا زولاً يقولـُّـو تعال ..
دموعو تسيل مطر صابـّات
طبق طمبورو قبـّـل صاد
وجاك راجع .. يغنى ليك ..
غـُنـَاهـُو حزييييين ......
غـُناياً يبعث الميتين
حليل خالك ..!

عمار الدنيا مهما زاد , مصيرو زوال
تـُرُبـْتـَا الـزول تنادِيهـُـو
وعـُمر الزول تتم ايامُـو مهما طال
وخالك كان اظن عارف سنينو قلال ..
وناجع ديما فوق سيقانو ودّر عمـرو بالترحال
عصاتو (سَلـَم ) .. شرابو سموم
قـدُرْ ما يزيد عليهو الجـوع , يقـرِّط ( تِكـّـة ) السروال
دريبو وَعَـرْ مـلان بالشـوك
كِضِـبْ كان قـالو كـاس لـي نعـال !
هو خالك خال ؟! ..
دا من جـِنـُّـو .. يسافر فى الفيافى بَـرَا ..
وشاغل بالو سك الصيد ..
مخلى قليبو ناسى ورا ..
ضلام الدنيا فى عيونو ويفتش لى منابع النور
لسـانو انسـل ..
ريقـو فـتيت ..
وسـاكن ديمه فى العَـتـْمُـور ..
مشـَرِّك للغـزال بالخيت ..
وزارع فى الاراضى الـبور ..
دا قمحان من بنات آدم
وراجـى يمـوت يهاجـر لى بنات الحـور ..
حـليل خـالك ..!

وآآآآخــر عـمرو يا ولـدى ..
مرض مرضـاً ..!
مرض مرضـاً ..!
مرض مرضـاً ..!
.. رقد خـالك تلاته سـنين ..
وكـُلّ الشافتو تسكلج ..
تقـول : كـُـر.. كـُـر .. دا ما بـِحيَا .. !
ومـلك يامـين يقـول يامـييين ..!
كتير البطـّـل الشغله وقعد حرسو ..
يشـهدو فـيهو بالتلـقين
وكم كم مره جـبنا المـويه فى القـرعه
عشـان ما نـْغـَـمـِّد العـينين
ومـاتن تب اديـَّاتـُو
جـلد ملصـوق على عضـامو
وْحَـطب مدّاهِـن الكـُرعـين
وجبنا (حَنـُوطنـَا ) للتجهيز
بقينا نعد ضليعاتو
ونقول : يا الروح سكونك وين ؟!
لقينا الروح تطق مسجونه فى الحلقوم
مربـّطه بى سلاسل (كـُنْ )..
وطايعه الواحد القيوم ..
تقول : يارب ..
متين امرق .. متين امرق .. متين امرق
ونحن قعدنا فى ( الدلجه ) وحرسنا (ايوب)
شهور وشهور ... بقينا ( سُـقـُد )
وما ضاقت عيونـَّا النوم ..
وكل الحله منكسره ومجاملانا :
ناس ( التايه بت منشار)
وبت حمدون
بنات طه .. وبنات التوم
واخوات كمال الدين ..
عمتك كلتوم
وبت حاج احمد ( السـُرّه )
وبنات طيبه
وبخيته الرايقه بت جادين ..
دموعن بلــَّنْ الواطا .. وتيابـِن جَرْجَرَنْ دمـُّـور ..
وحزنانين على خالك ..
عشان خالك قليبو حنين ..
وشال فى كتفو هم الناس ..
يشيل ويردُم
يشـيل ويردُم
ويدس فى همـو فى قلـبو
ويقاسى براهو حر النار
دا شيتاً مابْـتشوفو العين
وهمـُّـو كِـتِرْ ..
وقلبو انقد يوم العيد
وخالك مات ..
مـات ماضـاق العـديل والـزين ..
حـليل خـالك ..
حـليل خـالك يا عـزالدين ..!

عبدالحفيظ أبوسن
16-02-10, 11:11 PM
طالبة استاذنت تستلف استيكة من شاعر حلمنتيشى:
المرحوم محمد اسماعيل (بورفيسور جاغوم بن بلاع)
تسمح؟؟

الاستيكه
قال تسمح؟
و كيف يا الحلوة ما بسمح؟
أصابعي العشرة تكتب ليك
و قلبي أبقيه إستيكة
عشان بس للغلط يمسح
يذوب بين أصبعين حلوين
يتوه وسط السطور يسرح
و لمن تنتهي الكلمات
يخش الشنطة في منديل
و نمشي القهوة نتفسح
-------
و صار عاشق يطيع سحرك
يجيب الفانتا شان أمرك
تختي الشنطة في حكرك
وقلبي الدايش وسط منديل
يسكلب ساي يقول يا ليل
و جوة الشنطة يتمرجح
و ترجعي تاني يا الحلوة
و أكون راجيك هناك مصلوب
أشوف الناس طشاش في طشاش
و أقرأ سطوري بالمقلوب
-------
تقعدي
و أعاين ليك.. تغمضي إنتي
تعايني لي.. أغمض أنا
و أعاين ليك.. تغمضي إنتي
تعايني لي.. أغمض أنا
نعيد الكرة من أول
و أعاين ليك.. تغمضي إنتي
تعايني لي.. أغمض أنا
و أعاين ليك.. تفري البسمة
تضوي سنة
-------
أحك راسي
و أبلع ريق
و أتنحنح
و أجر الكرسي لي قدام
و أرجعو تاااني و أتزحزح
و أقول للسمحة لو تسمح
ممكن كلمة في زاوية؟
تقول بسمح
-------
تقوم السمحة تتلمم
و تتبسم
و أنا أتراجف.. و أتخمخم
و أقوم أفرح
و أدق الجريك
و أطق روراي
و أرمي الكرسي.. أوب سوري
و أقع في الجنبي.. أوب سوري
و أدقش الماشي.. أوب سوري
و جنب السلم.. أوب سوري
-------
هناك في الزاوية نتقعد
و أستغفر.. و أتشهد
و أشيل أنفاسي.. و أتنهد
و أقول ليكي
والله
و غايتو الزول
و الحاصل
و في الواقع
و ما عارف
هه ما قادر أقول ليكي
-------
تقول لي
هي يا دا
و فيها شنو
و معانا منو
و يخسي عليك
و قول يعني
هه ما تخجل.. و تتعقد
-------
أنا أتعقد؟؟؟
أجر الكرسي
أزيد الخلطه تسبيكه
و أقول ليها
وبي صوتا ندي و ريان
يفيض رقة و موسيقى
من فضلك
و أترجاك
ترجعي لي الإستيكة

magdikooooo
17-02-10, 08:30 AM
ساتي
وأعاين ليك تغمضي تعايني لي
لمن كمل يومنا وطلع ضو النهار
لاطلت من جانبك حنان
بس كان تقول ورقي المغطغط سنبهار
ياحلوة من غير طعم لون
يا المشيتك فرق دون البنات
كان جيتي مامعروف على
ولاماشية من هنا لي هناك
وأنا ما غبي
لامن وضعت أحلامي فيك
وقت البنية أم وشن عريض هي المستحيل
هي النجمة في وضح النهار
وهي القمرة لي وكت الضلام
كت مابشوف
وكت بس دعول
فاكر كلامي عن الجمال
بس روح من غير وش صبوح
ياخ إنتي جهجهتي المبادئ
الجو في جواي صروح
قال غمضت
هو عيون متل قدود جلداً معفن بتقبا شئ
بس يابنية قبل ماتغمضي
هاك مني دي
لو تاني غتغتي العيون أنا بتمحى
من ذاكرة وجودي معاك ومابستحي
................
ساتي
إنشاء التتمة الاجتهدته ليك فيها تكون عجبتك .. المرة الجاية عليك الله جيب ليك قصيدة كاملة عشان مترهقنا

magdikooooo
17-02-10, 09:22 AM
أب توتا
تلاتة مشاركات مرة واحدة .. والله حقوا نبخرك بي شطة من عين ناس بطة ..
جيب جيب أصلو ناس زمان ديل ماكان في سينمات ولا تلفزيونات معدنها قعدات سمر ساي ..
طلع طلع لسه دايرنها واحة للإبتسامة الرقيقة

magdikooooo
17-02-10, 09:24 AM
واعاين ليك تغمض انت

وتاعيني لي ..
أب سامح
سانكس فور مرور فيري متش
ساتي
والله ماعملت فينا خير أصلو الله يسامحك ويكشح ليك ملاح التركين في جلابتك

عبدالحفيظ أبوسن
17-02-10, 09:32 AM
حضرنا عهدهم الذهبي ونحن طلاب بجامعه الخرطوم ، فقد كانوا نجوم الحفلات الجامعية ولهم درجات ورتب وثقافه ، مالوا إلي الطرفه الذكية وكانت شرائط لياليهم تباع كأشرطه الغنا في السوق،

magdikooooo
17-02-10, 09:36 AM
خلاص طلع من جوا وماتبخل نحن برضو حبايبك
إتذكر جزء وبنتمو حتى لو غلاط ولو النزول ماتمي 74 بنقبلا منك

اسامة ابوزيد
17-02-10, 11:45 AM
بوست جميل وبداية موفقة يا مجدي

اتحفونا بالمزيد

Abousamih
17-02-10, 01:43 PM
بت هندسة..
http://www.youtube.com/watch?v=-TXoXQ2Xb6U

magdikooooo
17-02-10, 02:09 PM
أب سامح
الرابط مامابينو لكن الفيك إتعرفت

magdikooooo
17-02-10, 02:12 PM
لطلبه قالو بأجزو
البرتكانتين الصغار يا يمه قالو كبرو وعجزو
غايتو الشفوت ديل أحمد الله الجيت ولد
جوه الكناتر يلكزو
وفي اي حافلة يلكزو
طواااااااااااااااالي انتو تلكزو
*****
وناس الاغاني الهابطه بقو يتعززو
والكلمة لاتهبط ابداُ....انا لا اتحيز للمراة
اللحن هو الهابط اللفظ جميل!!!!
دق الباب وجانا انا جريت لي حفيانه ماقصدي الخيانه دايره يقيل معانا
خدره ناعمه وشاي منعنع والبعرس امو تقنع
اللفظ جميل
يتدفق عاطفة وحنان وترنُ بداخله الاجراس والاوزان....لكن
يحتاج لبعض الشهرة واللمعان ..
وهذا عيبنا في السودان
يحتاج لوردي او فيتوري آخر لنصدق ان بداخله انسان
ايها الانسان عاني دون يأس وتجدد
وتفاني للمعاني ومن الظلم تجرد
وكذا العشاق دوماً
ما لهم دارً ومرقد
مثل عصفور تغني هاهنا
وهناك غرد
هذه الارض بيتً لمعانيه
****
وناس الاغاني الهابطه بقو يتعززو
والشعرا ديل:-
(اني اتنفس تحت الماء اني اغرق ..اللون الازرق في عينيك يدفعني نحو الاعمق وانا ماعندي تجربة في الحب ولا زورق....زيديني عشقا"زيديني يا احلى نوبات جنوني)
****
وشعرانا ديل
مدخل اول:-
المدينة عارية والتفاحه فوق تحت الماء
مدخل ثاني:-
انا ليه تجيني المويه حفيانه وادنقر البسها شبط اخضر
النص:-
ياواقفه وضلك ماشي ...ياماشه وضلك واقف
يامتخبيه خلف وضوحك ..ياواضحه وفيك متخبي
يا يااااااااااخ اقيفوا
قفو نبكي من زكري حبيب ومنزل ***** بسقط اللواء بين الدخول فحومل
افاطم مهلاً بعض هذا التســـــــلل ***** وان كنت قد ازمعت صرمي فاجنبي
قفا نبك : فعول
من زكري :فاعل
حبيب : فعول
ومنزل : مفاعل
**** هكذا كان الشعر وليس الكلام****
هكذا كان يقطعها الخليل رحمنا الله
*****
وشعرانا ديل بس يرمزوا
فاطمه العجوز وما تصوتوا
والجك دا لو مافاز بفوز
والزير دا ياخ ماقلت ليك ماتخت لي فيهوتاني كوووووز
وهو يعني البكون كوز ما بشر
ومابشيل هم الشوارع والبنومو جوة الحفر
مابعيش........
انا لن انحاز لهذا الحزب ولا لسواه
مجرد رقة انسان اواه الانسانيه هي معناه وهي مغناه وهي محياه وهي مسواه
لا انحاز لهذا الحزب ولا لسواه
فكلٌ مسعاه السلطه وكلٌ مسعاه الجاه
وكلٌ ضل وكلً تاه
حزبي نفسي وحسبي نفسي
فنفسي الله وحسبي الله
****
يعني البكون كوز ما بشر
ومابشيل هم الشوارع والبنومو جوة الحفر
مابعيش الدمعة والخوف والسهر
مابقول ياعمو قدامك قطر
****
ياشعبي ياسوداني هوي فتح مصيرك في خطر
لاجينا شان جمهور لاشان نجيد النص
الني أخير للنار والمويه مابتنقص
فتح عيونك ديل ضهر البلد بنقص
لمتين نعيش بالدس جوة البيوت نندس
الكشه جات نندس لمتين نعيس بالدس
وطنا واحد وبس خالقنا واحد وبس
لمتين حنتجافا نضاري من عيبنا والدنيا شوافه
ايدك علي ايدي
نتصافى نتعافى والهمه للهمه نجمع سوا اكتافه
شان عزه وفجر المني العزه والمدفع الرزه
ورحم الوطن واحد ورضعنا من بزه
النيل وياهو النيل ليه يعني نتجزه
كيف نبني طابق فوق والساس تحت نزه
والطبله لابطيق مفتاحه لا الرزه
والباب قصاد الريح واقف علي لزه
وكل الهناء الضقناهو لا طاب ولا لذه
مليون معزه وميل ياخوانا تنهزه
*****
والشعراء ديل بس ارمزو
وماعندهم غير بالكنايات والمجازات القديمه انبزو
بت من ورق...... والزحزحه
وفي اي منتدي فيهو بنات يتغزغزو
والعلماء....
ياعلماء ياخ ماتوجزو ....وماتبقو قدر الحاره وامشو واركزو
تبت يداك ابا لهب .... وامريكا ماعارف شنو؟
امريكا دي واحده قليلة ادب
ونحن لها والي الجهاد
ياعلماء ياخ ماتوجزو
وابقو قدر الحاره امشو اركزو
هو الفينا محتاج لي حكاوي ولي فتاوي ولي شعر
في الفاضي بس تتنرفزو
والكفره ديل مادام في رب خلق ابن ادم وعوزو
اللمسكو المال والبنون والاشترو الطين ويكنزو
الدين وحاتو هو لابضيع لا بوصلو لا بنفزو
شدهونا في عيشتنا قصدونا
خربو طبعنا زاتو وبوظو
الزاكي مات وعليه دين
امونه قالو ادوها عين
عثمان اخوي جابولو بت
السوق ده ينزل لي متين
المويه
النور
العجين
البنسلين
الاوكسجين
البنقو وين
العرقي وين
والناس توح
زح ياخي زح
تنبح نبح
وتردح ردح
30 الف
دي مقابله دكتور ولا عرس عديييييييييييل
انشاء الله مايطيب الجرح
والناس توح
زح ياخي زح
الكسرة
الفول
الملح
ود الطهور
بيت العرس
الضيف لعله بخير صبح
الدين
وباقي المنهج التموه خسارة
وقام ربح
البنجمع
والبنكسر
والبنضرب
والبنطرح
البيت وقع
المطرة!!!
امسكو صرتو
شوفو التراب البنطرح
هو البيت اكان جات الكوارو بنطرح
اكان بالايادي بينطرح
ايييييييييييييك يازمن!!!!!
صرة جبين الهم ده عاد كيف؟
وكل الهموم الفينا كترو وعجزو
ولدونا تاني زمناً جديد
نادونا شيخنا يعوزو
*****
دايرين شغل؟
انا قريت طب العاصمه
انا تكنولوجيا وهندسه
انا في المعامل مدرسة
انا اول الددفعه اقتصاد
انا عندي ماجستير شرف
انا.........
بت بتلعب نص وباك
انا زول بهدف في الشباك
انا ديك وداك
انا جيك وجاك
والناس تغش
*****
دايرين نعيش رايكم شنو؟
العرس االجماعي قريب بتجو؟
وتجاوزو المحنه وكمان في بيت حلال تتجوزو
احسن ليكم رمضان بجي وتاني وين ...
ماقلنا ليكم من زمان وقت تخشو الجامعه
ياناس اركزو
واتمركزو
وماتلكزو
واتكوزو
اي اتكوزو
اتحزبوا وادو الوطن حقو
العيد فضل ليه خمسة يوم
والديجتال فضل الله اخوي ضربو رمهاهو وطبزو
بس اقعدوا عاينو وغمزو
الانقليز دخلو الفريق واتحنطو واتحمضو
واتكبرتو واتفولزو
وبس انتو اقعدو عاينو وبوزو
كونوا معنا علي قناة الاحلام
شاكيرا في اخر البومها الفني
ايهاب توفيق جرح تاني
السينما والصيف مش حتقدر تغمض عينيك
بس اقعدو عاينو وبوزو
والانقليز دخلو الفريق اتحلبو
واتحمضو واتكبرتو
واتفولزو
حلبو الغنم
وشربو اللبن
اتسلو بينا وقزقزو
ولسه نحن بنغازل في القمر
وهم طلعو فيه وتنقزو
بس اقعدو عاينو وبوزو
واتحزحزو واتغمزو
وارجوها في نص الطريق واتشنطو
انا لو قبضتها كنت وريتها النهار بي نجمتو
بت المرق ادم ابوي من جنتو
شوف الحضارة السوتها
والله بعد سنتين اكان تتلفتو
الحرفها ماحتو الاتو
مولانا طابق فردتو
الشيخ بونس فردتو
بي عرفته وبي هباهنه
وجنزبيله
وقرفته
عشرين مره وماكفته
والطلبه لسه بنقطو
ده زمن بنقطو فيه حروف
عاد الله لييكم نقطو!!!
والشعراء يمشو وينططو
نكر صوتك صداك!
وامونه غرقت في الرماد!
ووانا جاي ليك من سكتك!
وتطلعي انتي من صوت طفلة وسط اللمه منسيه
امونه مين؟
والسكه وين؟
وتطلع متين؟
بمشو وينططو؟
ما ينططو!
هو العلماء لسع مافتو
والدين ده من مادخلوه وجه النهار
وناس عمرو خالد وعلموه الكمبيوتر كلفتو
ياعلماء احسن اسكت
بس اقعدو كحكحو في الروادي
علماً بلا عملاً دحن شن كحته
سوقونا ياخ ودونا لبوش لي عند بيته والله نحن الصغار بنكفته
اي بنكفته ماكفت العالم ده كله
وملاه خوف قلع هدومه
ومامشكله الزول ينزلق في المطرة
ويكسر ركبته
ومامشكله االزمن ينحرق ويفقد نضاره وروعته
ومامشكله الزول العزيز يفرض علينا معزته
ومامشكله البت تبقي لي زول اصلو ماكان حبته
ومامشكله الروح تمشي دون حلماً لذيذ ماتمته
ومامشكله الفصل يتكتب مزعج لغاية الفته
بس لو صدق خاطر القصيد
والفيني رجح كفته
والزول اخير يمسك لسانه عليه جد
يبقي عشرة علي سجارته وسفته
يبقي عشره علي سجارته وعفته
عفوا يبقي عشره علي صلاته وعفته

شمس الشموس
17-02-10, 03:01 PM
محن الزمن تأليف المتجهجه الاممي

يلا يا اخوان تعالوا
شوفوها كيف محن الزمن
داير اكتب لي كلام
في حاجة ما معروفة كيف
وصفوها قالوا عليها فن
والله محن
بقولوا فن
الفن دا مايك ومندلين ؟
الفن دا ساون واورقنين ؟
وفنان وقف منفوخ سمين
بدا حفلتو
لمن تشوف
الوان قميصو وبدلتوا
والمايك المسكين
سجين في قبضتو
تقول يغني الاوصفوك
او بالاقل الم الفراق
والناس تردد بي ورا
لكن كضب
اول كلام غناهو كان
راجل المرا
ومزيكا صاخبة مزمجره
بعديها جاب
هوي يا اب شرا
والحفلة كلها جايطة جوط
تنطيط وفرحة وفرفره
وكل شاب محزق بالهدوم
شمّط بطينتو وضمرا
وبنات نضيفة متمرة
لابسات لبس
مابتوصف
الجينز كيف
وبلوزه ضيقة مشرشرة
وفنانا بالحيل منطرب
فرحان يغني ومنكرب
ماغني غنيات الرجال
دور عليهو غنا البنات
فيو صال وجال
ما الناس دي اصلها حالا مال
وخلاص خرب
ما الفن بقي
ممكن يكون لي اي زول
اسهل درب
ويقولوا فن
وغنا الحقيبة
خلاص قدم
سبقه الزمن
يا حليلو مات
وهنا اندفن
والله محن

تقبلو مروري

magdikooooo
17-02-10, 03:22 PM
أن لاأتقبل مرورك .. شمس
فقد أضاء البوست .. فليتقبلني مرورك صاحباً للموضوع
سمسم
والله جميل .. ولي قدام .. والحركات دي مابتاكل عيش نحن دافعين بدل إيجار للبوست ده تخش تخت حاجة ماتاكلنا حنك

شمس الدين فضل
18-02-10, 02:20 PM
يامجدى وابوتوتا وباقي الشباب .فى الشعر الحلمنتيشي عندكم كنوز وقمم فى كوستي وفى تقديري اشعر من شعراء هئية حلمنتيش العليا.. كانو معانا فى رابطة الاصدقاء الادبية بكوستي وهم ( قريب الله محمد فرح..2-التوم البخيت..3-ودالعركي ..والله قمم من الشعر الحلمنتيشي المرح والهادف بس ناقصهم اعلام.. اكتشفو كنوزكم ياناس

magdikooooo
18-02-10, 02:56 PM
شكرا شمس
فقد أشرت لذلك في بداية البوست وطلبت من الاخوة المتواجدين بكوستي بذل قليل من الجهد
شاكر إطلالتك ياغالي

اسامة ابوزيد
21-02-10, 12:28 AM
بص البنات
للمتجكم العلفي
الليله شوف باص البنات
عجلاتو كيف متحننات
الكي قبل والكيس حرن
يمشن تقول متوحلات
لمباتو خلقه مكحلات
من غير دلال
كنباتو من داخل عدااال
شايلات بلومات الكلالي
الحبهم في عروقنا سال
بنزينو من ازكي العطور
عادمو الكبير يطلق بخور
سواقو ديمه صباحو نور
و مساهو نور
ورفارفو من قدام خفاف
مضروبه بأحمر شفاه
وانا بس بخاف
وخوفي الشديد لايدك شداد
دايرين وصولك بالسلامه
وتجينا يا برج الحمام
نتلمه في الكافتيريا كوووم
ويتلاقوا احباباً قداام
نعمل تمام
الكل حضور مافيش غياب
وكل التياب اتجمعوا
تسمع ضحك تسمع سلام
وتحت التحت تسمع كلام
اه يا حريم نوعكم عجيب
مرات كلامكم لينا طيب
لي روحنا انتو بترفعوا
مرات علينا تزرزروا وتتأندلوا وتتدلعوا
ولآمن تحين ساعه الدفع
نحلف يمين ما تدفعوا
ونفضل نجيب الشاي وباللبن الحليب
وكمان نجيب وكمان نجيب
ليمون ملخبط في القريت وتبلعوا
وتقدو جيبنا ونرقعو
ولم ينتهي الليل سارمشن
وتقولوا دايرين ترجعوا
من نوعنا خالص تقنعوا
تاخدونا طرحه بدون ايجار
تاخدونا ويتفك الحصار
وتروحوا غير ما تودعوا
راكبين علي باص البنات
خطراتو باقه حلا وحمار
يا ناس خلاص انا قلبي فار
نطرح بلاش من دون ايجار
وجوفنا من باص البنات
جوه الخشم فتحت غبار
نطرح بلاش لستكنا طار
نتعب نلقطهااا في الظلام
تلقوها ميتات بالنهار يا ناس نزار
تلقوها ميتات بالنهار يااا ناس نزار

magdikooooo
21-02-10, 11:23 AM
سمسم
سكر نبات خالي من الاضافات
راجين طلتك ولو جوة البص ده

اسامة ابوزيد
21-02-10, 11:52 AM
ندى
قلتي ليّ سموك ندى!؟!
وده منو السمّاك ندى؟
ده أكيد أبوك

فيك شنو يسمّوك ندى!؟
في صوتك أتخن مننا
إضنين كُبار زي دِشّنا
وتقولي ليّ سمّاك ندى!
خشمك ده ريحتو معفّنة
ايدين كبار حقات بُنى
وتقولي لي سمّاك ندى!؟
المشية كتّاحة وعلال
كرشك تقول شايل جَنى
وتقولي لي سمّاك ندى!؟
قالت لي "ها هدى في البطاقة إسمي ندى"
شوف يا أخ..
مافيش علاقة بينك وبين ندى
خلّيها ندى ..
خالت قريبة جارت صديقة ناس ندى
ما فيش علاقة
ندى في العيون أكحل مجعّد مسوّدة

ندى في الحواجب زي هلال
قصة نصوم دي مؤكدة
انتي الحواجب دلجة بس
قلم الحواجب هاردها
وتقولي لي سمّاك ندى!؟
ندى تبتسم آلالاف مؤلفة تسعدها
وانتي الخشم شارّة
التلاليش
بس طبق ومغطّي صينية الغدا
ندى في الوشيش نظرك بشيش..
ما يعقّدها
وانتي الوشيش وش الجحيش
نخرين كُبار كُرعين ردا
وتقولي سمّاك ندى!
قاتلي "آي أنا إسمي ندى"
شوفي أوعك تقولي اسمك ندى
ندى ما بس الاسم
ندى الجمال زايد الأدب زايد العلم زايد الفهم
ندى في الجمال ما شُفنا أجمل من كِده
ندى في الدلال خصّاها بيو رب العباد حين أوجدها
ندى في الأدب ..
ربّوها بيو رجال ياكلو النار مولّعة موقدة
ندى في الكلام
طبيعي صوتا بيجيب صدى
..

وتقولي لي سمّاك ندى!

magdikooooo
21-02-10, 04:16 PM
بت من ورق
هوي يا الحبيب ..
أحسن عيونك فتحن...
ونفض غبار الجامعات الكتحن ...
عبرات هواي لو سدسدن حلقك دحن لي زول سواي ما تنحنحن ..
وأنا أصلي عارفك ما بتحن ..
ليه العيوينات البريدنك تخونن .. .. وتجرحن
ليه بالدموع والنوح مع الناس .. تفضحن ..
وأنا ديمة بسأل ربي إنو الطالبات .. يسمحن ..
الطالبات .. يسمحن .. ويفرحن ..
وبالخير تملي يصبحن ..
ولو في مشيهن لكلكة .. يصلحن ..
بس لو ظهر كاشف رقم
لا يصافحن .. لا ينجحن
.............................................. ..
***
هو شنو الفضل في الدنيا عشان الناس تذاكر .. وتمتحن ..
بس نبرى من عيشة الفقر ..
وسمح السكات الفي خشم سيدو .. وكمان سمح الصبر ..
مادام في مدرسة مدرسة .. وأساتذة خصيصين نجاح ..
وحصص صباح .. ودرس عصر ..
حنسوي ايه .. حندق جرس أخر فصل أو ننفصل نتلمى نشوف باقي العمر ..
ماواضحة زي عين الشمس ..
واضحة كان هسي وأمس ..
***
وأصلي مارق ياضنى .. من غنوتي الأنا مدمنة ..
من بلوتي وسلواي أنا ..
من قصة لا بتأكلنا عيش لا تفر جبين هذا العناء .. من شدة فاردة الإرتخا ..
ومتمكنة من ممكنة وما ممكنة .. وايه لزوم يعني القصيد وكتين تموت العاطفة ..
وكتين نعتم فكرتو ... وحروفو ذاته نلونا ..
وكتين نغدغد مهجتو .. وندس عيونو وندفنا ..
ايه لزومي عن الشعر.. الماعرف معانهو ولا شيتا عنى..
وأبقى مارق ياجنى ..
كان من هناك .. أو من هنا ..
كان منهم .. أو مننا ..
من مزامير التوجس والغناء ..من صباحات الهواجس .. ومن طوابير المدارس..
ومن مروق الروح.. وأمرق من متاهات النفس ..
ماواضحة زي عين الشمس ..
واضحة في كل الجرايد والقصائد والمعـابد والمصانع .. والشوارع ..
لما دون نشعر نحس .. ولما دون خاطر يمر ..
واضحة إنو سكاتو مقدود من دبر .. وكلامو مقدود من دبر ..
وضميرو مقدود من دبر.. وقميصو مقدود من دبر ..
لكن منو البشهد عليك يابت مادام كلك عذر ..
يابت مدام عرفوك جد بتخافي من ضل الضحى .. ومن بشرة الناس السمر ..
ويؤسفنا جدا إننا .. ويؤسفنا أسود مننا ..
ومحنية ضهرو من الكبر ..
وعرفوك جد بتخافي من ضل الضحى .. ومن ضحكة الناس السمر ..
عرفوك .. بس هم ماأظن فهمو العيون السمحة فيك كانت شتر ..
ويسلم ضراع الطين .. وقدح المونة ..جيت أمونة ..
حر الواضة وادٌٌٌة صحونا .. للولد البشيل طوريتو سباق الفجر ..
***
واتضيع سنين العمر ليه في المدرسة .. المدرسة المابتجبر الخاطر إذن ..
المدرسة المابتستر الحال بكرة ..مبتملانا فت شوال تمر ..
ياخ ايه لزوم عن الدفاتر والمحابر والشنط والأردية والدق ودرس اليوم وحلق الراس وقليم الضفر..
ايييييييك يا سنين المدرسة .. فتينا ايه يامدرسة ..
دي الجامعة لسه فيهاناس بتحب بعض .. وتلبس بعض .. وتاكل بعض ..
وتقوم بعض وتقعد بعض و........ منو العوض وليهو العوض ..
وفي ناس تجمع ورق فاضي وتمر .. تنجح فشل .. تسرق حصاد غيرا وتمر ..
وكتير في ناس بتفط سطر..
***
ياشعب أصحى كفاك شقى .. وكفاك خطاك على الجمر ..
لمتين حنحلم بالغناء .. لمتين نعدي من الضياع والفرقة والحرقة ونمر ..
وسمح السكات الفي خشم سيدو .. وكمان سمح الصبر ..
والدنيامازالت بخير ... والدنيا مازال فقر..
وأنا زي دراويش العشق .. ماسقتا خطوات الرحيل ..
لكن مشيتا وبالجبر ..لكن مشيتا وفوق جمر ..
وحبيبتي قالت لي تعال ..تعال
ومرقت من جلدي القديم .. ودرعت توب الصبينة .. ومشيتلها ..وانا منتشي
سنتين ولا قعدت عيوني مع عيونها اتونست ..لا في الخيال لا قيتا .. لالاقتني هي ..
سنتين ولا بندالنا سكة ولا خطانا بتنتهي ..
سنتين ورغم الإبتعاد والعشنا من خوف وارتعاد لسه ..
سعاد هي بتستحي...... وأنا بشتهي وأنا بستحي ....وهي بتشتهي ..
ومابين نعم واللقيا كان حرفين نهي ..
وانا خاطري من كتر الهموم الساعة خمسة نسى .. وسهي .. وفي الهم غرق .. وبالشوق حرق ..
وحبيبتي قالت تعال ..
خافت وكت قتليها شيخ .. مسكينة
مابتعرف الفرق بين الدراويش والشيوخ ...
بين الصفيقات والعرق.... بين الغرق والماغرق ..
تاريها زينا يا خلق طينة ومطينة بالعشق ... ومقتولة لحد السكات ..ومتيمة
بس كنت ديمة بعلما إنو الحزن زاد الفرح .. والفرحة نفسها مؤلمة ..
والعافية أسمح منها ..لو حتى كانت بلسما ..
والشمس في توب من حلال .. والقمرة أكبر مجرمة .. وكضابة ومابتحلب لبن ..
القمرة كضابة مابتحلب لبن ..
ومليانة زيف ومهضلمة وممسوخة .. ومهما اتبرجت مازي مصابيح السما ..
والقدرة ما بتنفات شبر .. والسترة ميها الكمكمة .. والناس سواسية كالمشط ..
والحرة دينها ملجمة .. والحلوة مي حلوة طعم .. والمرة ربنا قاسما ..
والقسمة مابالأيد كمان ... الأيد هي زاتها مقسمة ..
أصبع صغير.. واصبع كبير..واصبع وسط .. واصبع نضم .. واصبع بدخل خاتما ..
وتفرق بداية الشوق كتير وكتين تصل للخاتما ..
ما الريدة بتشوف بي تحت .. والحب موشح بالعمى ..
وما بفهم النور الإ زول عاش في دياجر مظملة ..
النجمة مابتعني الوضوح .. العتمة ميها الهضلمة ..
الوشمة مانسمة جروح .. والبسمة عز البفهما ..
والنسمة في الصيف لو تفوح تحرق حشى البتنسما..
والوجعة باااااردة على الببوح .. وتسل روحت البكتما ..
والروح بتمرق مابتموت ..
الروح بتمرق مابتموت .. والجتة بتقيم مأتما ..
واحنا انعكاسات للنجوم .. والواطة ضل راميا السماء..
وأنا ما رميت إذ رميت وأي عاشق مارمى .. ضحك المشيب برأسه فبكى و نادى سلما ..
وسمت بغات الطير حين كبا حزينا .. حزينا مرغما ..
***
وريتا معنى القارعة وعقرو وربك دمدم . حفظتها الناس والفلق والحمد والإخلاص وطه ولم يكن والعاديات وكأنما ..ماكان في شي ..
وبعد ده كلو بتنتشي .. ولا بتستحي ولا بتختشي ..
وقرمت كرعي بالمشي .. وكلمتها قتليها أوع تدقشي ..
الطيبة مافي كل شي ..
وما تهبشي .. الجو خليو جو فيك والمابخش ماتخششي ..
ودمع الظنون البيني بينك قشقشي .. والشوق على باب البريدك وشوشي ..
ونار النضال جنب الشمس ماتمشي عليها روحي هوي بتشمشي ..
وكان جاك خريف الوجعة سويلك بيوت في داخلي ابني وعشعشي .. وأديني احساس إني شي ..
وقرمت كرعي بالمشي .. وكلمتها ..
خلي بالك يا بينة .. العمارات البناطحن والمعاني القرمزية ...
أوع تسرق من ملامحك أو تغير فيك شوية ..
ماني شايل هم قرايتك إتي قراية .. وذكية ..
أبقي جد ياحلوة فاهمة وأبقي واعية وكوني حية ..
أصلو في الجامعة العريضة .. وفي بيوت الداخلية ..
في الحبايب .. وفي القرايب .. وفي البقاسموك الأسية ..
الإ برضو خلي بالك .. هي المصايب مي شوية ..
العقارب والكهارب و الدبايب والمصايب .. وألف سوسة وألف حية ..
وإتي سمحة ..إتي قمحة ولسه نية ...
ولو دقستي أسأليني أنا الدقستا وأكلوني السمسمية ..
في زمنا وحات عيونك بدفنوك يازولة حية ..
أبقي واظبة على صلاتك .. قومي كل ما نادى حي ..
وخلي بالك في الشوارع .. والمسافات القصية ..
وفي مشاوير العصاري .. وإنت ساعة المغربية في الحدائق والكباري والملاهي الأجبينة ..
والوليدات الأخيرلك من تصاحبيهم بينة .. والبنيات البظلطن وشهم..
والبتعمل فيها شيخة أو تقول بتشوف لها طيا .. وفي القراية سجم رمادن ..
أبقي مارقة وناغمي ليا ..
مرة تلقى الضمة شدة .. ومرة تلقى الشدة مدة ... وعادي تلقى الخمسة مية ..
واسمع ... اسمع ..
يا تسمع في البغنن ..في البغنن
الله ليا .. وكر عليا ... وجيبو ليا .. وسـ...... عاد ده كلام ..
ونحن يا حليلنا الغلابة .. بلعبننا وكوعليا ..
ودايرة بيرقر .. ودايرة شية ..
ودايرة طرحية وتيك وملحة .. ودايرة جستي وميج ومسحة ..
وخصلة تايه .. وشنطة بطة ..
.........................................
.................................................. ......
***
وفي النهاية القصة فكة .. دي الحضارة الدينا فكي .. ولاحقة حبوبة أمي مكة ..
وعاملة فيها رشيقة حية .. ومهما نصرخ هيا هيا ..
ومهما نصرخ هيا هيا ..
وفي البتنسى أبوها يقدح .. في ضنى أيامو الشقية ..
عشان هي تقرا .. وبكرة تنجح .. وتحيا مستورة ورضية ..
وفي الحليل أماتن يبكن بوراهن ووب وحيا ... الإ هن سجم المحنة
حليل زمنكن يارضية .. لا فؤادكن مرة حن .. ولا طرن بالمرة جيا
الشفايف مي شفايف .. والشعر سوون كية ..
وبدن الإسكيرتي شرطة.. وتاني فوق الركبة طية ..
وبمرقن .........
أحسن أسكت ....... أحسن أسكت ..
شدي حيلك يا بنية .........
شدي حيلك يا بنية .....

عبدالحفيظ أبوسن
21-02-10, 09:23 PM
هو انتوا قاعدين لسه؟
قايلكم مشيتوا

اسامة ابوزيد
21-02-10, 11:25 PM
هو انتوا قاعدين لسه؟
قايلكم مشيتوا

القال القصيدة دي منو يا عمك

ابوعبيدةالمليجي
22-02-10, 12:33 AM
في منيب عبدربه المتوسطة كانت هناك ندوة تحدث فيها الأستاذ أسامة أبراهيم الشفيع وهو من الأساتذة النادرين في حياة كل تتلمذ عليه وأيضا حين كان الأستاذ أستاذا ومعلما لمكارم الأخلاق عنوان الندوة هل سيبقى الحلمنتيش حيث ظهرت في ذلك الزمان كثير من القصائد الحلمنتيشية الساخرة والتي تتناول حياة المجتمع بشكل فكاهي وتعالج الكثير من قضاياه والسؤال الآن أين الحلمنتيش؟؟؟؟

ابوعبيدةالمليجي
22-02-10, 12:43 AM
تعرف يا اساسي دي أنا سمعتها من سيدها في الثمانينات في جامعه الخرطوم وهي طويله سيدها أظنو المستعرب الخلوي
بفتشها ليك

أنا المستعرب الخلوي
أنا الأسيدك أنا القلوي
مفاعل خطير نووي
بتفاعل بدون كاتليست مع البروزر مع الكومنست
في قلبي اسامي بنات دست بنسات و.......جيستchest
.................................................. ..............
ياسيدة لا ياسيدة لا فايتانا وين مستعجلة
مالو العميد
مالو البليد لو خلى ست الناس تعيد
شرطا إمتحان مافي الجمال مؤهلة
................والباقي باقي والمقدر كلو باقي نسينا الباقي...............

magdikooooo
22-02-10, 08:25 AM
مليجي
نورت البوست والحلمنتيش ظاهرة متجددة
شاكرين طلتك

magdikooooo
23-02-10, 09:05 AM
قصيدة عيد ميلاد
للشاعر بشري ود البطانة
وانا من زمنا خدو مشلخ
وهى من ازمانا خدها ساده
اتعجبت سماحا مواتر
طبقات عالية وكلها ساده
وكانت بينا فوارق شاسعة
اتعارفنا
وكانت جاده
وقالت عيد ميلادى الشهر الجاى
ولازم تحضروا
قتلها خير
قتلها خيييييييييييييييييييييييييييير
ودخل فى اضافرى
تقصدى ايه بى عيد ميلاده؟
ايا ربى اتولدت يا دابا؟
يبقى الاعياد سوها زيادة؟
امكن ولدت وانا ما عارف؟
يمكن ميلاد عيسى واجدادها
يا ربى بدقوا الدلوكة؟؟؟؟؟؟؟؟؟
وبعزموا الحلال كالعاده
بس قتلها خير وانا جاييكم
وعديلة وزين
والشهر الجاى
مرق مركوبى من السحارة
داقاهو المطرة قبل شهرين
ونكت طاقيتى من العضاضة
سليتلى ثماد رقعتها زين
سديريتى ابوى مسويها لبد
فرتقت اللبده مرقتها طين
عراقى مغزوز فى الكوكار
كان سوهو وقاية وكت فازعين
سروال مدفون فى رهل العيش
ملفوف محشور بين شوالين
لميتن واديتن شطفة
شريتن فووووق فى زريبت الزين
والزين بقراتو مكوفرات تب
مدغن طاقيتى هرنها زييييييييييييييييييييييييييييين
شافتن السرة بت الهراف
طردتن وجابتن لتاف
وغضبت غضب
وعزمت اقوم
جفن ما جفن
اقوم فى الحين
مرقت ووشى مطوطو تب
وصتنى الحلة رجال وعوين
وصتنى ام نوفل لى كركار
كان تلقى ودك جيب لى رطلين
وقروشى حلف صرة وبى خيت
وصتنى حليمة بت العجبين
سروال لى محمد ورطلين بن
بنبيعلنا شي ونديك بعدين
وصانى الهابر لى مركوب
مخلوفة وسرج وكرباجين
عنقريب وموسر بى حبال قد
تيبار ومسلة وابريق طين
والناس بتوصى وغبيانة
والناس غبيانة وبتوصى
وانا ظرفى مكدر زى الطين
وبتوصى وزى بايعلى بعير
وانا بايع تيسى وعيش كيلتين
والتيس اعور ما جابلو سعر
والعيش بتاب ومسوس وشييييييييييييييييين
تتسود ختوة هالسفرة
انا ماشى لواجب اقوم بالدين؟؟؟؟
وركبت الباص مخلاتي دفس
كدوسي وحقتي وعود سكين
وانا راكب في الباص بتأمل
ياربي بجيبو الحكامات
بتسو دلوكة بيجوا الحلال
ضابحين تيران ام خرفان صر
مدققين كمين شوالات عيش
وانا مالي ومال عيد ميلادن
ان نقروا الدلوكة اولادن
انا بنزل حربي ومتعكز
وادارق اصقر في الدارات
وانا معروووووووووف خراب حفلا ت
وامسك صوتي المدهون قطران واركز واندق
شان السمحات ما يقولن ضيفنا قريزن ساكت
ووصل وسعل لامن جيتن
وهداك البيت يرقش لوحات
وصل ولقيت البيت مزرود لاحدو بنات سمحات
شايلات هديات
وحدات وردات
وحدات زهرات
شايلات رسمات في شكل ارنوب
واسودونمور سبحان الله زي الميتات
يضاحكو قر حايشين صينية تبق شمعات
ماف زول قالي انت منو مابعرفو الضيف زي الخواجات
لتيت عكازي وقفت طرف
ملص نعلاتي اتفرجختا
لي تفه خلالي مضنقلو تب سكيني ملسنه بالجمبات
تبماكي وحُقتي مزرودا ولعتا كدوسي واخد جبدات
وان بتأمل هذا العالم ياتو البنوت وياتو الجنيات
وبحرت عيني لامن برقن
كل البنوت زيها سمحات
والبقر اشابه لي ضمة
ما عرفت الراحن والفايتات
لي حسن الحظ هي النقرتني
ما شالت شك من شافتني
ساقتني وقامت بالواجب هي اصيلة وراسية وست حوبات
نادت صاحباتا بنتعارف
نانسي وناندى وشيماء ولمياء ْ وحوراء وكفا
من وين! من لندن جينا امس راجعين باكر زي ها الحظات
من الطايف والمنشية ومدينة النيل وبنوت راقيات
طيبات طيبة وكل كليمة معاها ضحيكة
ونضاااف ورهااااف زي اللعبات
واحدتاٌ فيهن سمحة سماح لكن مي طاعمة
وانا زول مستغرب في حاجات
ان زول اسراني سماحتاً كاسيا
بنت البلد الهاديه وراسية وضميرا الحي التب مامات
وقالت لي
عرف نفسك بي عبارات
عرف نفسك بي عبارات
قتليها : انا الاسد الحرس غابتو الضريا
وانا الساعة الكتال بختف حديا
وانا الدايرني مابجيب لي هديا
وسارح مدرج ام هبج التخيه
مراتع اللبل الضان السعيه
وادرج عاصفة اللقدة السخيه
وادرج عاصفة اللقدة السخيه

اسامة ابوزيد
23-02-10, 03:54 PM
ياعبدو روق
في الليلة ديك القصة ذاتها بقت عليك
يا عبدو وأدوك الشريط
يوم قلنا ليك انضم معاها وكلّما
أبيت تسمع كلامنا وبقيت لميض
وقلته أحسن أكون تقيل أنا ما جميل
وبقيت تقيل لامن سقوك موية الغسيل
وجيت تنطط زي زمان وتباري في قعور الشجر
كايس كراسي الخيزران ..
وقعدته يا زينة الرجال.. كهربجي قال
رفعوا الستار والبت تجي ومرات تقيف
ومعاها يا زول ولداً حريف
والوقفة كانت وقفة ولف
صاحبنا بالاحساس عرف
سألته والناس كلّموك
ووقعته في شارع الزلط
تبكي وتجعّر والعيون اتورّمت
ويد القميص ضهر القميص كم القميص
حتى الفنيلة اتشرّطت
يا عبدو عيب
قوم يلا صلي على الحبيب
الواطه صبحت دايرين ننوم
يا أخوانّا لأ أنا عايز أموت أقع البحر
يا عبدو عيب
الدنيا حر والموية بتسخّن عليك
ثلاثة ساعات زولنا يسب ويكيل
ودموعو سايلات بالكفوف
وشرايطو تلمع في الكتوف
بقى فيلسوف
في علاقة بين يوم السبت وعين الحسود
ومقارنات بين الجهل والجمال
وسوء الإختيار قال شينة قال
قال شينة قلنا كلام صحيح
وخطيبها زاتو ولد قبيح
ياخي قوم الواطة صبحت دايرين ننوم
قام تاني جاب سيرة البحر
وقام تاني جاب سيرة البحر

magdikooooo
25-02-10, 08:48 AM
الاخ سمسم
مجدداً أشكر إسهاماتك الثرة .. وأتمني أن يتواصل إبداعك ..
ودي

اسامة ابوزيد
10-06-10, 11:51 AM
فتاة بجامعة القاهرة الفرع
لي إيــدينا بنــــــــرفع *** والعازب كلو بيســــــــمع
نفوسنا كتير مشــتاقة *** للراعي دوام نتضـــــــــرع
شعارنا عريس متواضع *** ياخي ياقدر اسمع أجمع
نحن البايرات في لهفة *** والعمـــــــــر ولـــي وودع
نحن مساكين ياجماعة *** وللجنة دوام نتطــــــــــلع
لو واحد قام وأتقــــــدم *** في لحظة نلبي ونسمع
***
بلاش عربيــــة خصوصي *** مالو الكداري دا هســـع
بلاش من شبكة وشيلة *** بي أبســط حاجة بنقنع
البيت ماشــــــرط عمارة *** دي مظاهر ساكت تخدع
لي جنة نضيرة نحــــــول *** البيـــت الخرب البجمـــع
ما شـــــرط تجيب تلاجة *** كفاية الزيـــــــــــر البنقع
***
ما دايرين كبدة وشـية *** بي ويكة تقيلة بنشـــــــبع
ما أصلو شــبابنا الودع *** ما ممكن تانــــــي بيرجــــع
أحلامنا الكانت بــدري *** ما عادت تانـــــي بتنفــــــع
دايرين الشاب الأغبش *** حتى لو فقــــــران ومقطع
لانو الفيهو الفايــــــــدة *** ليهــــــــــــو دوام نتطلــــع
حياة الســــــترة أملنا *** انشاء الله ربنــــــا يجمــــع
يحن الله عليــــــــــــنا *** ونشــــــيل أيدينا ونرفـــــع

اسامة ابوزيد
10-06-10, 11:52 AM
للرب شـــــكوانا بنرفع *** والبايـــر كله بيســـــــــــمع
في دربك يامـــا جرينا *** والعين الســــــاهرة بتدمع
كم مرة ايدينا اتمـدت *** والرد الجــــــارح اقنــــــــــع
احلامكم والله غريبــة *** وللعـــــــين بتزغلل وتذلــــع
طلباتكم لينا تحيــــــر *** جايين تتواضعوا هســــــــــع
ما جينا زمان شن قلتو *** يافقير يامقطـــــــع أرجــــع
***
ما عندك حق الســــــــفة *** لابس دمـــــــور ومرقع
دايرين العنــــــــــدو مصانع *** لو كان لي غيروا بيركع
ما جينا زمان شــــــن قلتو *** يافقير يا مقطـــع أرجع
في جيوبك ساكنة عناكب *** لو كان باعوك ما بتنفع
دايرين العنـــــــدو الفـــــلة *** لو كان حنكوش ومدلع
ما جينا زمان شـــــن قلتو *** يا فقير يا مقطـــع أرجع
***
لو ماشـــي لآخر الدنيا *** تركــب رجليك تتبرطــــــع
دايرين العنــــــــدو البنز *** لو يبقى عجـــــــوزاً أصلع
ما جينا زمان شن قلتو *** يافقير يامقطع ارجـــــــــع
يا البيتـــك مبني زبالة *** ومن غير فيضــــان يتزعزع
دايرين العنــــــدو الفيلا *** لو كان صغيـــــر بيرضــــع
ما جينا زمان شن قلتو *** يا فقير يامقطـــــع أرجــع
***
وموكيتاً فخـــماً فاخــــــــر *** ونجفاً بالـــدر مرصــــع
والكندشة فريون ضــــاربة *** وثلاجة فريــــــزر تجمع
بي فيديو كاسـيت وأتاري *** نتسلى لو وكتنا نضيع
ما جينا زمان شـــن قلتو *** يافقير يامقطع أرجــــع
***
دايرين زنقيل ومقنــــــدل *** لو كان تمســـــاحا يبلع
والعملة الحرة ضــــــروري *** والمهر دولارا يدفــــــــع
وبشرط الشــيلة العامـرة *** والكرسي الجابر يلمـــع
وذهباً مختوم وأســـــــاور *** مليانة الإيد للأصـــــــبع
وضروري الحفــــــلة بوردي *** والكابلي اللحنو موقـع
ونقضي عسل في أوروبــا *** ونطوف العالم أجمــــع
بي لندن وروما وموســـكو *** وفينا المدن الأربــــــــع
نلبس في الكاسي العاري *** ولو طلعت موضة بنتبع
وناكـــل فاكهة طـــــــازجة *** وبالخير نتمتع ونشـبع
أفلامـــكم والله عجيبـــــــة *** خلونا نحمض ونطبـــع
ماجينا زمان شـــــــن قلتو *** يامبهدل أوعك تطمـع
***
مد رجليك قـــــدر لحافك *** وشوف ليك طـورية وأزرع
لي مين تتقــــــــدم انت *** يا قرد ياقبيح يا مبرقـــــع
كيفن بتحـــــب يا أغبش *** من غير شاكوش تتفرقع
لو كان بنحــــــــب الزيك *** ما أخير الموت الأســـــرع
لو مت وفاتك تفــــــــــرح *** ولو عشت حياتك تفجـع
ولو تبقي ضراعي الأيمن *** في لحظة بنقطع ونجدع
***
ما قلنا الدنيا دي فانية *** وآمالنا مظاهـــــر تخــــدع
اختاروا العندو ديانـــــة *** الديمة وشـــــــو بيلمـــــع
قلتولنا خلاص انتظـــرو *** الحــور في الجنة بتنفـــــع
الليلة قطـــــــركم صفر *** والعمـــــــــــــــر ولى ودع
عجزتو قعــــــدتو تقولوا *** واشبابنا الأغبـــــش أجدع
ماجينا زمان شن قلتو *** يافقير يا مقطــــع أرجــــــع
***
ما جينا زمـــان ليه كنتو *** جاهــلننا زي الشــــــــفع
ما خلاص الليلـة وقعتوا *** من قد القفة الأوســـــــع
والليلة قطركــــــــم دور *** وقعتوا في وش المدفــــع
رافعين الراية البيضـــــاء *** لكن هيهــات ما بتنفــــــع
رافعين لعرس جماعي *** وفي العشرة ألف ما بنطمع
وهنياً ليكم كبدة وشية *** بعـــد الأضراس تتخلــــــــع

اسامة ابوزيد
15-09-10, 05:43 PM
قالو الكورة فن ودلال
وانا لا مريخ بيعجبني
ولا ان شا الله حتى هلال
علاقة الكورة بالاتنين
غادي هناك .. وفايتة تلال
لا مريخ بجيب ليهو كاس
ولا لو ختو فيهو هلال
ماشافو الكورة برا هناك
ناس زيدان وليل تورام
متين يا الله نلقى الحل
ونلقى فريق يكون حلال
بدال حس البلد ينشال
وفوزنا كمان بقالنا محال
نجيب حراس ونفس الحال
تشوت ليه يمين يجيك شمال
متين يا الله يهدى البال
ونلحق نحن ناس ميلان
حنقعد لسه في مريخ معاه هلال
حرام يا ناس
مرضنا خلاص وجانا زلال

عمار صالح
15-09-10, 06:01 PM
هههه

كورتنا دافوري معاهوغبار
كعبل و شلت يا ستـــــار
ما بتعرف الجد من الهظار

اسامة ابوزيد
28-12-10, 08:21 AM
الريده في تلفون


الريده في جوال كذب
وضياع رصيد
وضياع زمن
زي ريده في ضلمه
وظلام
لا شفتها ولا شافتك
ويوم المعاد الطال سنين
تطلع كمان زي رغبتك
يا ريته لو وقفت هنا
صوته القبيل العذبك
يطلع كمان مصنوع وهم
دا الالهمك
واسمع كمان
حتى الاسم
خايف يكون حق
صحبته أو جارته
ياقام طلع حق
تركية ولا مصريه
في فلم كده
ترجع حزين
مكسور جناح
وهي شمتك
ليه شمتك
شان أنت ما زول
القبيل اسمر سمح
لون القمح
شان أنت
مصدوم فيها جد
طول الزمن هي القشتك
اصلو الريده
في تلفون كلام
وضياع رصيد
حرقه وعذاب وحشه وألم
ساعة عرف كل
الحقايق المؤلمة
ردد بقول
الريده في تلفون
كذب
الريده في تلفون ضياع

اسامة ابوزيد
02-02-11, 04:44 PM
ود اللّمين الباقي رايه
وصاني كتر للوصايا
الغربه قال بتفتح الناس العمايا
وصدقنا نحن وقمنا ندهبش حفايا
سافرت آمالي ابعد من مدايا
ولما تهت رجعت للناس الورايا ...
(المقلي ) يا ضراعي اليمين
أبو ( السارة ) يا الداري العقب
يا الباقي لي فرشة وغتايه
وتعبان وراي ما رامي بالك للعطايا
(دكتور/ عمر ) يا حليلي منك
فرقتنا الدنيا يا طيب النوايا
( ود العبيد ) يا روحي يا رفقة صبايا
حكمتك يا سيدي يا رب البرايا
أمي دايرة تشوف جديدي تشم جنايا
وناس عواطف قالوا دايرين بس رضايا
والتايه ..
التايه يا ام نيتا لبن ..
يا الراجيه فرحة يوم هنايا
وناس فرتكان دايرين اطقوا من الزعل ..
قالوا اب سويقاتا رقاق ما جاب هدايا !
كيف بس أجيب ليكم هدايا ؟!
********

وانتوا عارفين الكبير نادا المنادي
وفي المنام قال ليهو :
حاج الجاك تعال .. تعال .. تعال ..
طقاها لي بلد الحجاز
تبع الحجيج ... وصل البقيع ..
انفش زين ..
يبكي ويحج ..
(مرضية) بتدور العلاج
دايما تنق
في كلاها قالت نار توج
وانا دربي مسدود بالكتر
امشي وافج .. واقعد وافج
والبيت يعج ..
ناس ( سامية ) دايرين الأكل والكسوه
دايرين الشراب
ودخري البيت (عمر)
يا سيدي يازين الشباب
جوابو في ضنب الجواب
جوابا قدر نص الكتاب
داير بناطلين شان يهج
*****
واحدين يسووا الحيله بس جواب سلام
وآخر الكلام يصبح وصايا
لي أنا ..... !
تصور .. ! لي أنا المجنون اقرطع في المحايه
وكتب شيخي ومسح ما خل آيه
ووقع قيدي اندفن وسط البنايا
وزعل مني الفكي ورفس الدوايه
وختف حنكولو فوق راسي كسر كم عصايه
*****
اصبحت اكوس لي صورتي في ضهر المرايه
ومآسي الدنيا ما شربت ندايا !
برضو في آخر النهايه
انتو ما مخلني يا ناس ود هنايه وبت هنايه ؟!
راجيني وموسيقا اللوم بتعزف في الزوايا
ويرقصوا الراجين يخمو رزم هدايا
أجيب هدايا ؟ ... أنا ؟
أجيب هدايا ؟ ... أنا ؟
أجيب هدايا ؟ ... أنا ؟

اسامة ابوزيد
03-02-11, 10:26 AM
طالبة استاذنت تستلف استيكة من شاعر حلمنتيشى:
المرحوم محمد اسماعيل (بورفيسور جاغوم بن بلاع)
تسمح؟؟

وكيف يا الحلوة ما بسمح
اصابعى العشرة تكتب ليك
وقلبى استيكة للغلط يمسح
يدوب بين اصبعين حلوين
يتوه وسط السطور يسرح
ولمن تنتهى الكلمات
يخش فى الشنطة فى منديل
ونمشى القهوة نتفسح

هناك عاشق يطيع سحرك
يجيب الفانتا شان امرك
تختى الشنطة فى حكرك
وقلبى الدايش وسط منديل
يسكلب ويقول والليل
وجوه الشنطة يتمرجح
وترجعى ثانى يا الحلوة
تلقينى راجيك هناك مصلوب
اشوف الناس طشاش فى طشاش
واقرا سطورى بالمقلوب

ما تخجل وتتعقد
انا اتعقد؟؟
ازح جنبك ..ازيد الخلطة تسبيكة
واقول ليكى ..بى صوتا ندى ورائع
يفيض رقة ومزيكة
من فضلك... ونترجاك
ولو تسمحى..
ترجعى لى الاستيكة

اسامة ابوزيد
31-05-11, 10:21 AM
الحضاره
يا اخوي بس وين الحضاره
شبابنا ضايع يا خساره
انتو قايلين الحضارة
لما تمشي الشابه موضه
لابسه فستانا قصير فوق للركابين بي كتير
بي جمبو مستدير
وفي الضهر شباك كبير
و الصدر واقف عديل طياره
‏ ‏ جاهزه عشان تطير
و الكتوف مكشوفه لي
برد الشتاء و حر الهجير
جادعين عليها الشنطه
‏ ‏ مخلايه حمير
والشنطه عاد فيها البلاوي
من جوه دكان للعطور
النيفيا في زات اليمين
وديانا في زات الشمال
وفي النص كمان برايه
لي قلم الدلال
و الوش تقول كراس رسم
مليان رتوش احمر شفاه
واحمر كضوم و اسود رموش
تحلف تقول ضاربنو جير
و الايby ‎the ‎site ‎‏ ‏ مره
‏ ‏left‏ والتانيهright‏
اهي دي الفتاه
اما الولد سجم امك الراجياك
سجم حبوبتك الحارياك
منفوش تقول ضكر الجداد
قالبو القعاد شكلو زي بوب مارلي
شافو تاتشر لابسه فوطه
حاكوها و قالوا موضه
يا حليلك يا فتوه
ويا حليلك يا رجوله
يا حليلك ابان سراويل
يا حليلك ابان شنبه

اسامة ابوزيد
01-06-11, 11:44 AM
شهادتك عاملة ماجستير
دي لا دفتر ولا توفير
دي لا عجورة لا جرجير
ولامن تمشي للتعيين
ومره 00امش 00ومره تعال 00
تقابض انت زي زغبير.
تفكر جدي في الزوغان 00
ولامن تمشي للمنفى
تقابلك برضو سودانير
وهاك يا تلتلة وتأخير
وهاك يا تلتلة وتأخير

اسامة ابوزيد
15-06-11, 11:29 AM
وَشَــرُّكُـمُـــو يَـهُــــونُ وَنَـبْــتَــغِـــيــــهِ إذا مَـا كَـانَ شَـــرُّ " مُـوَاصَـــلاتِ"
"فَـمَـشْـرُورُونَ" نـحــنُ عـلــى بِطــاحٍ تَـعُــفُّ عـنِ" الحـُوَامـةِوالصِلاتِ
فـــلا أهـــــلٌ نُـــــزاوِرُ أو نــعــــــود ُوهـذا شــرُّ مَــا فِــي ذي الـحـيــاةِ
ومــقــبــورونَ فــي " أُوَضٍ شَـقِــيَّــــةْ كـأنَّ رِحـابَـهــا سِـجــنُ الـعُـصــاةِ
" مُـكَـنْــدَشَــةٌ ومــا فــي ذاكَ خَــيْـــرٌ كَـفَـانـَا الـلَّـهُ شــرَّ " الكنـدَشــاتِ"
نـقــومُ " مُـخَــدَّريــنَ إذا غَــفَـــوْنـَـــا ويأتي النَّـوْمُ يَحْـمِـلُ " هلْـوَسَاتِ"
مَـسَــاكـِـنُ كـَالْـجُـحُــورِ وَقَــدْ يُـظَــنُّ" بِسُكْنَـتِـهَــا" نـعـيـشُ بِـأُبُّـهــاتِ
فَـلا وَالـلـَّهِ لا شـمســاً " نــشـــوفُ " ولا حـتــى شُـعـــاعٌ مــنــهـــا آتِ
ولا " حَـوْشـاً"ولا حَـتـى" بَـرَنْـدَةْ " نَـشـمُّ هـواءهـا وبـهـا " نـَتَـاتـَي "
أَلَيْـسَ" بِشَـرَّةٍ" عنـد " الـمواقـف" أحَبُّ إلَيَّ مِن ذي" الجـهـجـهـات"
شـوارعُ لا تَــرَى فـيـهــا " بــراحــاً "مُـكَـدَّســةً بِـأحْـــدَثِ نــاقـــــلاتِ
وَغـابـــاتٌ مِــن الأسْـمَــنـــتِ تـعْــلُـــو وتـبــدو مُــشــرِفــاتٍ سـامـقـــاتِ
" تُـقَـطِّـمُ" لِلـْهـواء ونـحـنُ صَـرعــى " نُفَرْفِرُ" تحـت أكـوام الـمـئــاتِ
بُيُـوتُ الطِّيـنِ "والْحَـوْشُُ الوَسِـيـعُ" أحبُّ مِـن الـقـصـورِ الـشـامـخــاتِ
لَـئـِنْ " أُعْـفَصْ وَجُوَّةأبو رِجِيلَة" فَخَيْـرٌ ذاكَ مِـن" عَـفَـصَـاتِ" ذَاتِــي
فإنْ " تَاوَقْـتُ"مـن شُـبَّـاكِ بصٍّ هُــنـــاكَ أرى مـيــاهـــاً جـاريـــاتِ
وأشْـجَـاراً " بِـشَــارْعَ الـنِّـيـلِ عـاتـْيـَـةْ" تَـهُــبُّ عـلــيَّ مِـن كُـلِّ الـجِـهـــاتِ
فرغمَ "الإنشِحَـاطِ "علـى"الـمواقــفْ" لـسـاعـاتٍ ورغـمَ "الـشـعـلـقـاتِ"
أَحِــنُّ حَـنِـيــنَ "خَـرْمَـــانٍ"لِـشَـــايٍ" رَمَاهُـو" الـشَّـايُ فـي أرضٍ فَـلاةِ
وإنِّـــي جِـــدُّ " خــرمـــانٌ" لـِـشَــــايٍ ، من "الصَّامُوتِي يَظْبُـطُ مَلْمَلاتِي"
بِــرَغْــمِ الْـغَــيـــْرَ إِحْـتَــلَّ الـكَـرَاسِــي" وَلينَا أَنِحْنـا جَادَ " بِفَرْجَـخَـاتِ"
فَمَقْهَـى "الجَعَلِـي " كـان لـنــا مـلاذاً إليـهِ " نـزوغُ" عـنـدَ الأمـسـيـــاتِ
" نُكَرْكِعُ"كَوْبَ شايِ أو"فِرَنْسِـي" وعِـنـدَئِــذٍ نُـبِـيــدُ " الـدَّبْـرَسَــاتِ"

عمار صالح
30-06-11, 06:00 PM
دلع الزوجات حســــب المهنات




الكيميائي: يا احلى تفاعل في حياتي
...الفيزيائي: ذرات حبي
المهندس: يا مثلث عمري
الرسام : يا اجمل لوحه
الصيدلي: يا بلسم فؤادي
بائع المكسرات : يا لوزتي
الفلكي: يانجمتي
المحامي: يا سجن قلبي
الموظف: يا راتبي كله
الخباز: يا ناري
النجار: يا مسمار قلبي
صياد البر: يا غزالي
البنشرجي: يا رقعة من قلبي
بايع الفواكه: ياموزه مقشره
موظف الاتصالات: ياسماعه حبي...

سم سم : ياصلعه فؤادي
بكبك : ياكبسه زنقلتي
كشه : يازنقه فيسبتي

يوسف الشنبلي
30-06-11, 09:33 PM
يا ود صالح يا قيافتي

بكي
30-06-11, 09:33 PM
دلع الزوجات حســــب المهنات




الكيميائي: يا احلى تفاعل في حياتي
...الفيزيائي: ذرات حبي
المهندس: يا مثلث عمري
الرسام : يا اجمل لوحه
الصيدلي: يا بلسم فؤادي
بائع المكسرات : يا لوزتي
الفلكي: يانجمتي
المحامي: يا سجن قلبي
الموظف: يا راتبي كله
الخباز: يا ناري
النجار: يا مسمار قلبي
صياد البر: يا غزالي
البنشرجي: يا رقعة من قلبي
بايع الفواكه: ياموزه مقشره
موظف الاتصالات: ياسماعه حبي...

سم سم : ياصلعه فؤادي
بكبك : ياكبسه زنقلتي
كشه : يازنقه فيسبتي



هههههههههه قوية ياعمار وطيب عمك ابوتوتا شنو

عمار صالح
01-07-11, 04:45 PM
يا ود صالح يا قيافتي
شامبيون ؟؟
عملتها شينه يامان ....
مشتاااقين والله

عمار صالح
01-07-11, 04:47 PM
هههههههههه قوية ياعمار وطيب عمك ابوتوتا شنو
هووووووووي يا كبسه انته
ماتجيب لينا الهوا

بكي
05-07-11, 12:59 PM
هووووووووي يا كبسه انته
ماتجيب لينا الهوا


حواء الطقطاقة ولاشنو ياعمار

عمار صالح
05-07-11, 01:07 PM
حواء الطقطاقة ولاشنو ياعمار
ههههههههههههه مهله العباديه

بكي
05-07-11, 01:08 PM
ههههههههههههه مهله العباديه


دي منو ماعرفتها يافنان

عمار صالح
05-07-11, 01:10 PM
دي منو ماعرفتها يافنان
دي برسلها ليك في الفيس كبسوك ياملللكها

بكي
05-07-11, 01:25 PM
دي برسلها ليك في الفيس كبسوك ياملللكها


رسلها طوالي راجينك ياعمك

هاشم ابو الشوش
09-08-11, 02:11 PM
كضاب يمين كضاب لو حاولت تقرب منها يوم .. حمتنا النوم بنية صغيرة وامورة وبتتكلم بال ج اكتر من يوم اتقطع قلبي حتت لمن تسألني الاستاذ ماججا بس دفترا دا وضحكتا دي مكسرة قلبي وحامياه النوم وهو قايل فيها شنو هو قايل انو نريدا بعيد لبعيد ؟؟عيونا .. عيونا تمسخ طعم العيد ومابتلبس ساي هدوما ججديييد في ججديد لكن اصارحا بالريد زي ماليوم داك قربت وقلت بريدك يالسمحة ياخ دي زحت خصلتا من عينا جنس زحة وشالت ايدا وشالت قلبي وصلحت الطرحة وقالت لي قلت شنو ؟ بس كلمتا دي لفت بي الدنيا ودقت بي الواطة وبقيت بين نايم ومانايم وبين صاحي ومابصحي وبين نعسي ودخلت نفسي الخوفة وغيرت الموضوع ياآآتشة الساعة بتكون كم هسة ؟ صحيت مخلوع وخلتني اقابض في روحي عشان ماتروح وادتني خيارين للساعة قديم وجديد وانا قدامي عيون بس اللمبة ام مية فولت ورموش الموت كلاما عسل شحتافة شديدومابتعيد ,, برنامج الجامعة سمح والله والجوافة ومريم ست الشاي ,, قعدت تتزاوق مني مرة تعاين لي ومرة تعاين لي صحباتا يابت الناس انا هسي بريدك قلتي شنو كان بتريديني انا برضو بريدك وكان مابتريديني انا برضو بريدك من جاي لي جاي لقيت روحي براي والواطة ضلمة شديد والاحلام طارت مني ,, بس .. بنية عسل شحتافة شديد ,, تقفلي بابك مني وتمشي ؟ ماتقفلي بابك كان قافلاه بابك باب الخير والرحمة ولا بوابة الرزق الطالع ونازل انعل يوم الفيك لمانا .. انعل يوم القلب الرادك انعل يوم البعشق بابك انا غلطان يوم قلت بريدك جد متحسر اني هويتك واتخيلتك تبقي هنايا بس معليش انتي منو ؟ كنتي ملاك من زمنآ طول الا بعد ماعرفت حقيقتك وقمتك مسحتك واتوطيتك تحت الجزمة وهسي بعد نكرانك ليا مافي كلام بتقال او رحمة مابتستاهلي اني اريدك جد ضيعت هواي في ريدك واتغشيت في ريدتك ليا كنت السازج والمسكين كنت بريد يوم ردتو قليبك واكبر غلطة وغلطة اكيدة يوم ماخترت قليبك مرسي واتمنيت لو اقدر انسي الم الماضي ووجعة هسة ومر الجاي الصابح اقسي والله يسامحك يالسويتي في قلبي الجرسة ويالخليتي مشاعري تترجم ويالوطنتي مكاني المقسي ويالهيجتي زمن الهمسة و الله يسامحك في الكان منك وانا لسة بريدك واكتر شان قالو زمان من صالح او من عافي سامح ويؤجر ..

بكي
09-08-11, 02:52 PM
تسلم ياابوالشوش

معاوية كشة
09-08-11, 06:34 PM
ياسلام علسك يا ابو الشوش ايوه كده خليك كلك نشاط وحيوه موش زى ريقن المخستك دا(هاشم ود خال ريقن)

هاشم ابو الشوش
12-08-11, 02:29 AM
البت دي ماتشبه بشر
دي جمالا ياخي جمال غريب
دي عيونا ذي باقه عسل مقموسه في كوره حليب
فوق العيون مزروع جمال لون الشمس ساعت المغيب
واللون لسه مااتعرف لالون دهب لالون زبيب ي حلوه اتعبتي القلب يا حلوه طلعتي الصليب

كسرى
11-09-11, 11:06 PM
(( الشينة ))

مكسّر فيك محتحت تب
ونار الريد بتوقد في حشاي لهب
غرامك بس تقول فرار لقالوا حطب
أشوفك ماشه إتبرجل تقول من خوفي أوقع بب
عيونك عمشة مقلوبة خدودك للكور مضرب
شفاهك بس تقول حلوف نقول أسترنا بس يا رب
بحبك موت حقيقة بموت
لما أشُم نفس خشمك تقول عقرب
ولما أشوف كريشتِك ديك لحاف بي حبلوا إتكرَّب
وكشِّك في الأرض وأسُوق وصوت كرعيك بلا الكركب
ولما أشوف صويفاتك
مجبَّد إنتِي بالفازلين وبالكركار وبالمحلب
مربّطة شده بالأستِك
تقول أطفال إتفرقو ضاعو في ملعب
كم قمبور وكم طمبور وكم شعرات عليها عجب
تجيك القُورة ذي رقشة وذي أمجاد وشيشة كعب
ولما أشوف خلقتك ديك مًحال إسم الله ليك قرّب
ولدوك في ضلام الليل بضو فانوس كئيب متعب
بشارتك بلحة فيها السُوس ودايتك بالحبل تسحب
حبيبت القلب ما عارف بحبك ليه
عشان أعجوبة في الشينات !
عشان مولودة بي سنينات !!
عشان تاريخ صلاحيتك
من زمان بدري عدي وفات !!!
والله عشان جمال صوتك
تقول منشار نشرلُو خشب
مكسَّر فيك محتحت تب
عشان مجنون وعقلي هرب

اسامة ابوزيد
12-09-11, 11:44 AM
تسلم يا كسرى

اتحفنا مرة اخرى

اسامة ابوزيد
18-09-11, 01:13 PM
شاكــوش المســيد
بشير المبارك موسى

سلام أهل الشواكيش جملة ما خصصت
جيتكم بالعديل مالصت ولا حقصت
شاكوشي العجيب المنو مبسوط بسطة
برويلكم حكايتو الكاملة ما نقصت
*****
الشاكوش يمين في ده الزمن بقى راحة
ما زي حق زمان ما تزيلو الا جراحة
يا رفقا الكفاح والله بكل صراحة
شاكوشي اللذيذ ما كان عنيف براحة
*****
يا رفقا النضال هاكم خبر شاكوشنا
ما المقدور وقع قبال نضري عيوشنا
ماف أعذار بتنفع و ما بتفيدنا رتوشنا
شاكوشنا الظريف بنشيلو جوة رموشنا
*****
شاكوش المسيد مالك مبدل حالي
خليت عيني ساهرة ترى المنام بقى غالي
ادمنت الوساوس و يوت تبعت خيالي
حصلت القبيل عدو النجم قبالي
*****
شاكوش المسيد والله فريد في نوعه
ما بدور ضجه في سرية تامه وقوعه
طقتو بارده لكن قاسي قاسي طلوعه
سيدو تشوفو اتبسم و بالا دموعه
*****
شاكوش المسيد الشفتو فوق لي هاوي
ما بفلق يمين بعدل بصلح اداوي
اهل الخبرة قالو على لسان الراوي
حمد السيد مكافح وبرضو زي مكاوي
*****
الدنيا العجيبة دي ما بتحقق اماني
شاكوشي البولول جوه في البيت جاني
يا عزال خلاص انبسطو بالمجاني
أشمتو ورو شاكوشي البعيد والداني
*****
شاكوشي الملفق شامي لي فيك ريحه
لي هذا الاوان ما جابو لي تصريحا
الداير نهاية ريدنا قصدو يزيحا
سائل المولى يبلاهو وعروقو يسيحا
*****
مابننغش لكن اصحى يا مغشوشنا
ترسم في الخطط قصدك تجينا تحوشنا
كضبك انت والله بفهمنو دحوشنا
سبحان الكريم جايينا في نص حوشنا
*****
مو موضوع فلان ماف زولا انغشابو
التلفيق ببين من لهجة الليك جابو
كان شيتا بجيب الريح اخير سد بابو
و الشاكوش صعيب لكن حبابو حبابو
*****
مالو فلان حلت ليهو الحكايه بعدنا
بقى اتجارى لمن شافو بادي سعدنا
قام اتناطى كجنا الحكايه قعدنا
ما بنسيبو الا يشوف برقنا رعدنا
*****
يااهل الدرايه اليوم دحين افتونا
مالا الناس بقت بي اللخبتات مفتونا
تبسم ليك و الحقد الدفين في عيونا
في نشر الحكايات زي وكالة سونا
*****
الحاسدين خلاص نار حقدهم عمتنا
لفقو للحكايات شان تروح كلمتنا
كضبة ناس فلان و الله ما همتنا
والنسوان يمين ما بفرقن لمتنا
*****
سلام للغوث هناك حارس الديار العامره
طابت مركز الدين ام فيوضا غامره
طلاب سيدي بي توجيهو ناهية و امره
قوم الجيلي راكبين الخيول الضامره
*****
الصلاة والسلام للمصطفى العدناني
شافع الامه نبراس الهدى الرباني
سائل المولى بي جاهك غسيل ادراني
والقلب الجريح ما يصيبو شاكوش تاني
*****

كسرى
24-09-11, 09:00 PM
( تغشيني .. يا الغشاشة ؟!! )

تغُشيني وتقولي لي بحبك ..
وأنا المسكين وأنا المغوش وتاريك لاعبه على الحبلين !
يا غشاشة يا دجالة .. يحبك سيف جديد وسنين
يقطِّع ليكي يدينِكْ .. يكسِّر ليكي كُرعِينِكْ ..
ويخليك طير بلا جنحين
تطيري سنين وما تتلمي .. وبدل واحد تحبي إتنين !
وأظن عشرة !!!!
أنا عندك زي فستان كُمْ طويل وكُمْ قصير ..
واحد للِّبس بالليل واحد في الصباح تاتيل
يحبك صرمة يا ضرمة .. ويحِشِّك بصلة قاؤرمة
يسوِّيكْ بوش للطاشِين
برضو تقول لي بحبك
وكل قطر رسالاتك تجيني مطر :
حبيبي اللُّونَكْ الأسمر
بلاك الدُّنيا ما بقدر
قطر يشيلك يودِيكِي السماءْ الأحمر !
ويشِيلِك زي هبوب طُوكَرْ
وأنا الكان مُنايا نكون إتنين ..
نسكُن في قَصُرْ عابدِين !
وأزُور بيك لندن ديكِ يا السمحة ..
وأودِّيك فُسحَة لي برلِين
لاكين فوَّرتِي عليّْ دمِّي
وكترّْتِي عليّْ همِّي
وأنا البِي وراك نِسيتْ أُمي
نِسَاكْ ربِّك ..
برضُو تقولي ليْ بحبك ؟!
يحبِّك سيف جديد وسنين .. يقطِّع ليكي يدينِكْ ..
يكسِّر ليكي كُرعِينِكْ
يمعِّطْ ليكي شِعِيرَاتِكْ ..
يخرِّب ليكي لقاءتِكْ
ويخلِّيك شِينة بين قوسين !
وطالِب ربِّي يوم يِبلاك بي واحد يكون عنتر زمانو ..
عضلاتو حديد .. ويدينُو متر زي الكوريك
يطرُشِك كَفْ يلفِّكْ لَفْ
يلخبِطْ ليكي وشِّك المبدُول ..
يخلِيكْ .. لا قِرِدْ لا زُولْ !!!!

كسرى
24-09-11, 11:46 PM
وبمناسبة الشواكيش الحايمة دي .. هاك يا سمسم !!

ناس ضايقاها ماكنتوش ..
وناس دافساها صحنين بوش
ناس نادوها ناريمان نهى وإيمان ..
نزار هيثم أسامي رشوش
وناس نادوها يا كلتوم ويا فطوم ..
وود بعشوم أبو طربوش أسامي بروش
ناس في الحب بتدخل توش ..
بدون تقديم بدون تلميح معاها قروش
شبح موديل سنة ألفين بيملى الحوش
وناس بتريد بكاها يزيد وما بتوصل ..
دوام يدوها بالشاكوش
عشان تعبان مفلس تب .. ما عندو ماكنتوش ..
وتسمع لب لب لب
وراسو يدوش ويبقى عموش
يقولوا عليهو شهيد في الحب .. ومات مغشوش !!
وحالي ألبي أصبح كيف ؟!
ده من شفتك غشاني خريف ..
مطر من جسمي نازل شو
ويوم سيرتك يجيبوها ..
أبقى أخاف أكون رجَّاف
بدل رِيفدُورْ .. أرُش بِفْ بَاف
قميصي الساوي لي غلبة ..
مسكتو لبستو بالقلبة
أدور أنضُم أتمتم زِين ..
أمرُق الكلمة مِن عِلبة
وإتلخبط
كُرَاع جزمة ..
وأعاين التانية ألقى شَبَطْ !
وأكون ملخُوم ..
أشوف سِنيَر .. أقول برلُوم
أمِش شمبات .. أقول أُم دُوم
أشوف شندي .. أقول خرطوم
أقلب الحال .. ليلي سَهَرْ .. صباحِي أنُومْ
وأحلم يوم ..
تكوني معاي .. ونطلع في مكاناً هَايْ
تشربي كولا .. وأقعُدْ سَايْ
أتوه وأسرح .. وأنُمْ دُوبَاْي
وااا أسفايْ .. وااا أسفايْ
عليْ قلبي الصِبح بكَّايْ
وشن بنسوِّي ..
لمَّا نشوف قمر ضوَّايْ
يَطُلقْ النَّار .. يَشِعْ جُوَّايْ
ويبقى مُناي .. أعاين ليك صباح ومِسَا
وأجُرْ السِبحَة .. أقول مَدحَة
يا سُرَّايْ .. يا سُرَّايْ
ومُناي ألقاك يا السمحة ..
مُنايَ تجُودِي بِي عينيكْ
قدُر لمحَة
ولمَّنْ تلبسي الطرحة ..
تُصاب مِعدتنا بالقُرحة
ويجرِّبُوا فِينا كل علاج :
هستامين .. كلودكوين ..
ده لا ينفعنا إنتستين
ولا يشفينا دربكينين
وما عارفين ..
إنُّو علاجنا كافلجين
وكافلجين علاج ليْ كُلْ مرض خطرِي ..
علاج للبشري والبطري
وأشوف قَدَرِي ..
أكان حبيت وشاع خبرِي
أكان كفتْ الهموم كفرِي
وقبل أموت .. أقول كلمات
أوَصِّي بِدفنِي في الأحفاد
ويبقى فُراشِي في شمبات !

كسرى
25-09-11, 02:06 PM
لصقة .. لذيذة !!

قالو زهجانة وأظنك
ما عرفِتِي سؤالِي عنِّك
يا اللِذّيْذَة الكُلِّي جِنِّكْ
عايز أكون أنا أبقى منك .. أيِّ حاجة قريبة منك
***
تبقي طربيزة .. أبقى كُرسِي
تبقي راكِب .. أبقى تكسِي
بيكْ أسافِر .. لامْ دقرسِي
وتبقي حافلة .. أبقى بُوكسِي
ويا سلام لو أبقى بِبسِي
تشربينِي
تقرطِعِينِي
تدفِقِينِي
وما مُهِم
هَيْ قرطِعِينِي
بس مُهِم شوفت عيونك .. أبقى منك أيِّ حاجة قريبة منك
***
تبقي وردي .. أبقى ترباس
تبقي سانتو .. أبقى كدباس
تبقي بنكِي .. أبقى حرّاس
تبقي بُرعِي .. أبقى عبّاس
تبقي باب .. أبقى ترباس
أبقى غرقان .. تبقي رفَّاس
رفِّسِينِي
وفتِشِينِي
وغرِقِينِي
وفنجِطِينِي
وما مُهِم
هَيْ رفِّسِينِي
بس مُهِم شوفت عيونك .. وأبقى أيِّ حاجة قريبة منك
***
تبقي فالِق .. أبقى مفلُوق
تبقي كِسرَة .. أبقى طايُوق
تبقي منفوخ .. أبقى مطفُوق
تبقي وِيكَة .. أبقى لاَيُوُق
تبقي شنّاق .. أبقى مشنُوق
تبقي حرَّاق .. أبقى محروق
ويا سلام لو تبقي خازوق !
مقلِبينِي
وزهِجِينِي
وعكِّرِينِي
وما مُهِم
هَيْ مقلِبينِي
بس مُهِم شوفت عيونك .. وأبقى أيِّ حاجة قريبة منك
***
تبقي حِيطَة .. أبقى طُوبَة
تبقي رُوسيا .. أبقى كُوبَا
تبقي جُمبَاظ .. أبقى هُوبَا
تبقي غنماية .. أبقى لُوبَا
تبقي فاطمة .. أبقى زُوبَة
أبقى راس .. هِيْ تبقي قُوبَة
ألِّمِينِي
وعوِّرِينِي
وبشتِنينِي
وزهِجينِي
وما مُهِم
هَيْ عوِّرِينِي
بس مهم شوفت عيونك .. وأبقى أيِّ حاجة قريبة منك
***
تبقي سُكّر .. أبقى ضُبّان
تبقي بوليس .. أبقى بُمبَان
تبقي كِبدَة .. أبقى مُصرَان
تبقي شِيتَة .. أبقى طرزان
أبقى حفلة .. وتبقي سكران
فرتِقِينِي
وجهجِهينِي
وبهدِلِينِي
وما مُهم
هَيْ فرتِقِينِي
بس مُهم شُوفتْ عيونك .. وأبقى أي حاجة قريبة منك
***
قالو زعلانة وأظنك
قالو قرفانة وأظنك
ماكِي عارفة سؤالي عنك
يا اللّذِيذة الكُلِّي جِنِّك
عايز أكون أنا أبقى منك .. أيِّ حاجة قريبة منك
أيِّ حاجة قريبة منك !!

كسرى
28-09-11, 03:40 PM
ناس الطب .. بي هنا >>>>
(( الطبيبة ))

يا اللي ريدك فيني طبعة ..
يا المكسرة فيني ضلعة
يا البجيك في الجامعة دايش ..
يوم خميس ألقاه جمعة
يوم أشوفك ..
قلبي ينتف ..
عرقي ينزف
وأبقى اْشوفك سبعة سبعة
" أصلو ريدك جاني فجأة " ..
وأدى لي صنقوري كبعة

*****
يا طبيبة ... يلا شيلي القرقريبة
ويلا عوسي قليبي كسرة
ويلا دنكِلِي مِنُّو لُقمَة ..
والعَبِيبَا
عل بس شِيليها مرَّة ..
وأبلعِيها كالجاتوه
خلِّيهُو يسأل جوَّة يسأل ..
والبِيسأل ما بِتوُه
ولمَّا جاتْ المِعدة تهضِم ..
قِيل مهلاً أترُكُوه
أنّه لا يطلب شيئاً ..
إنّه قلبُ ُ متيم ..
جاءَ يسأل عن أخوه !

*****
قد سألتُكِ لا تُجافِي ..
إنَّه حبٌّ خُرافِي
ما بَسِيبِك ..
كان بترضِي وكان تخافِي
ما بَسِيبِك كان رِضِيتِي وكان أبِيتِي ..
كان وقَعتِي .. وكان جَرِيتِي
كان عُقُبْ طَلَّعتِي زِيتِي !!
ما بَسِيبِك ..
كان خلطِتِي الأمَّة جُملة
كان طلبتِي المَهرِ عُملة
وإن طلقتِي علي نملة
ما بَفُوتِك إنتِ مِلِّي !!
كان بترضِي وكان تَمِلِّي
ما بَفُوتِك إنتِ لِلِّي !!!

*****
إنتي أقري ..
وكلّ معلُومة بتفيدِك
يا حلاوة المايكِروبَايُو ..
جارِي في مُوية ورِيدِك
كلّ جرثومة بترِيدِك ..
صارُو هِيلِك زِي عبيدِك !!
وإنتِي للباثُولوجِي تقرِي ..
أصلُو شِيتاً دمُّو بقرِي
عِلاَّ جنبِك يبقَى ساهِل ..
وفيهُو تجرِي

*****
وإنتِي يا أشطر طبيبة ..
يلاَ شَرِّحِي فِينِي حَلِّي !
فرتِقِي الجُواي وسَلِّي
تلقِي رُوحِي مُناها رِيدِك
والعِلاج جاهِز فِي إيدك
مَاهُو كَمْ كبسُولة "فَاليُوم"
إسبِرِين أو كان يُورانِيُوم
العِلاج جاهِز في إيدِك مِن سِنيِن !!
العِلاج يا إنتِي ..
آخذ حُقنةْ حُبْ أو حَبتِينْ
من عيونك ..
من كلامك ..
كُلُّو رِيحة بنسلِينْ
وأشفَى مِن كلّ المواجِع ..
وأبقّى زِين

كسرى
28-09-11, 03:59 PM
وناس المحاسبة .. بي هنا >>>>

بت محاسبة

أرسِل مشاعرِي .. أقعُد أفكِّر وأحسِبِا
خلُّونِي بسْ أستُر أسَايْ .. ما الحلوَّة قارِية مُحاسبة !
البِتْ شدِيدة ومُرهفة .. وكمان رقِيقة مُهذبة
وزِيادة للحُسن البدِيع .. البِتْ أنِيقة مُرتَّبة
لا بِتعجِبَه الحِسبَة الغلط .. ولا بتدُور الكبكبة
ورُّونِي بسْ أعمل شِنُو ؟! ..
ما الحِلوة قارِية مُحاسبة !!

*****
يا حِلوة بسْ .. مِن وِينْ أجِيكْ ؟! ..
وكيف ( القُيود ) بسْ أكتِبه ؟!
( يُوميَّة ) مليانة إنتِظار ..
( صارِف ) دُموعِي مُكبكِبا
( أُستاذ ) بُنودُوا بِقتْ تئِنْ ..
رِيدة وهُيَّامْ
أشواق غرام
وعُيُون تنُوح ..
النوم يمِين بِقى غالِبا !
ما إنتِي ( مِيزان ) القلب ..
يا حِلوة قارِية مُحاسَبة

*****
أدِيني مِنِّكْ ( إذِن صرِف ) ! ..
أو ( شِيكْ مُؤجَّل ) وبسْ كَفَى
بفتح ( مخازِن ) رِيدِي لِيكْ ..
وأشعارِي فِيكِي بَصنِّفَه
( وأجرُد ) جمِيع غُرف المَسام ..
بِى حُبِّك إنتِي أستِّفَه
وأهدِيكِي ( أصناف ) مِن محبَّة ..
( رصِيد ) عدِيلْ .. والله مَا مُتسَلِّفَه

*****
وأهدِيكِي أشواقِي وغُناي ..
بسْ لِي عُيُونِكْ ( بَصْرُفه )
مَا أنتِي أجملْ طالِبة ..
يا حِلوة قارِية مُحاسَبة

*****
ولو دُرتِي يا سِتْ البنات ..
يا ضَيْ سِنينِي الحِالكة
بَدِيكْ ( سَندْ ) مِن غِير شُرُوط ..
لِي قلبِي تبقِي ( المَالِكة ) !
ويفضل مُسجَّل في ( الأُصُول ) !..
مَافِي البُنُود (الهَالِكة ) !!
ولو دُرتِي ( شِيك أبيض ) عدِيل ..
بكتُب وأقُول :
يَا بدرِ مَا بِعرِف أُفُول
يَا غِيمَة أدمنتْ الهُطُول
يا حُسنِ جَاوزْ كلِّ قُول
أنا لِيكِي إنتِي وإنتِي بسْ
غِيرِكْ مُحال يأسِرنِي زُولْ
ومشاعرِي غِيرِكْ يملِكا
يا نغمة عذبة مُحببَة
يا حِلوة قارِية مُحاسبَة !!

كسرى
30-09-11, 12:35 AM
(( حكاية الجردل !! ))

فتحتَ الباب ..
وجمب الباب وقفت شويَّة في الشارع ..
وباب جيراننا كان مفتوح وظاهِر إنُّو زول طالِع
وخلف الباب لمحتَ التُوب ..
بلعتَ الرِيق .. لأنِّي كتِير بعرف التُوب ..
وجوَّة التُوب لِقيتْ الزول ..
وظاهِر إنُّو ده المحبُوب !
معاهُو الجردل المليان ..
أكيد المُويَّة مقطُوعة !!

*****
حرام واللهِ ألفِ حرام ..
حرام الزُول يشِيل جردل !!
ويقطع مِيل عِشان حمَّام !!!!
حرام واللهِ ألفِ حرام

*****
عليكُم الله شُوفُوهَا ..
وعِشان عِينِيهَا ساعدُوهَا
وعِشان محبُوبتِي مَابتقدَر ..
تشِيل المُويَّة في جردل !!

*****
علِيكُم الله شُوفُوهَا ..
مُبهدلَة كِيف مع الجردل !!!
تشِيل حَبَّة وتخُتْ نَفَسَا ..
وتخُتْ حَبَّة وتشِيل نَفَسَا
وتخاف مِن تُوبَه يِتبلَّبل !
وتاخُد لفَّة الشارِع ..
وكُل الشَافَا يِتبهدل
عليكُم الله شُوفُوهَا ..
مُعذبَّة كِيف مع الجردل ؟!!!

****
حرام يا مُويَّة ألفِ حرام ..
كِرِهتَ المُويَّة مِن البَلفِ حتى الدُشْ ..
ومِن بابُور مِياه الحِلَّة ..
حتى الهيئة ..
والماسُورة ..
والناقُورة ..
والصِهرِيج ..
ومُويّة النِيل ..
ومُويّة الزِير ..
وخرطُوش كَابِي في بِرمِيل ..
وحتى الغِيمة لمَّا تشِيل !!!!!

*****
عليكُم الله شُوفُوهَا ..
مُعذَّبة كِيف مع الجردل ؟!
تشِيل حَبَّة وتخُتْ نَفَسَا ..
وتخُتْ حَبَّة وتشِيل نَفَسَا
وبلدنا النايِمة لِيها سِنين ..
تشبِّع فِينا بالمغصَة
وعُيون نِيلنا النبع مِن فُوق ..
بتتفرَّج عليْ المغصَة
وغُيوم بلدِي المشتْ مِن فُوق ..
بتنزِل وِين ؟!
بتنزِل في كِرُوش نجِسَا !!
ومطر بلدِي النزل مِن فُوق ..
بينزِل وِين ؟!!
بينزِل فُوق جنايِن سِيدِي يسقِيها ..
وبينزِل فُوق عصافِير الهَوَي السكنتْ ..
جنايِن سِيدِي يروِيهَا
ومطر بلدِي النزل مِن فُوق ..
حينزِل يُوم !
ونِيل بلدِي المرق مِن ضَوْ ..
حيمرح يُوم !
وغِيم بلدِي الشرد يا ناس ..
حيرجع يُوم !!
وبِت بلدِي البكتْ في يُوم ..
وضاقتْ وجعة الجردل ..
حتملأ الدُّنيا بالزغرُود ..
وتنسى حِكاية الجردل !!!!!

كسرى
06-10-11, 01:23 AM
خليناك وما خليتنا
الشاعر : البروفسير محمد عبد الله الريح
شهرته : حسّاس محمد حسّاس
كنيته : شيخ السجادة الحلمنتيشية !!!

يا القصِّيتْ درِبنا وجِيتنا
مِن بين الشباب نادِيتنا
قلته كتِير خلاص حبِيتنا
لمَّا شبكنا فِيكَ أبِيتنا
يظهر ناوِي تخرِبْ بِيتنا
*****
قُول باللهِ كيف بارِيتنا ؟!
بِي مُوية العُيون جرِّيتنا
في حبل الغرام شرِّيِتنا
ما تنزِلنا يالما طِرِيتنا !
ورَانَا كتير جرِيتْ سكِيتنا !
لِيْ قاضِي المحنَّة شكِيتنا
لمّا شبكنَا فِيكْ فكِيتنا
بِي دمعْ العيون بكِّيتنا !!
جِيتنا وبالعيون بَاكِيتنا
لمّن غلبتَكْ صَكِّيتنا
زي لِعب الورق شكِّيتنا !
جِيتْ حمْبكتَه .. ليهْ دكِّيتنا ؟!
تانِي بريس بريس لاقيتنا
لمَّا رِضِينا بِيكْ صافِيتنا
تانِي بدون سبب جافِيتنا !!
ليه يا جكسة يعنِي طفِيتنا ؟!
قُمته وبالحنان وصِّيتنا
لمّن للأهل عصِّيتنا
ولمَّن في الدُرُجْ رصِّيتنا
في الآوُتْ بعِيد باصِيتنا
زي لِعب العِيال سوِّيتنا !
وإتفششته زِين كَاوِيتنا !!
*****
يا الغسلتنا ولاوِيتنا
ما إتكرمشنَا .. ليه ما كوِيتنا ؟!
إتشتتنا ما لمِّيتنا !!
في قُفَّة هواك خمِّيتنا !
في كانُون هواك حمِّيتنا
ولمّن زِيتنَا فَاحْ شَمِّيتنا !!!

قيل أنّها القصيدة الوحيدة ( يتيمة ! ) والتي لم يكتب سواها .. ( ما عارف هرشوهو وألاّ شنو ) ؟!!

هاشم ابو الشوش
06-10-11, 09:56 AM
يكون شغل الشعر ماغطي معاو ياكسري

كسرى
06-10-11, 03:14 PM
يكون شغل الشعر ماغطي معاو ياكسري

طبعاً هو عالم فاضل .. ومختص في علم الحيوان ( بيطرة ) .. وذو حس فكاهي لطيف جداً .. تجمعه صداقة قوية مع الأستاذ الساخر جعفر عبّاس ( أبو الجعافر ) .. وأظن قصيدته تلك كانت في زمن ( الجاهلية ! ) .. أيام الجامعة والشباب .. قبل دخوله ( الكنترول رووم ! ) .. خصوصاً لو المهندسة ( شايقية ! ) .. ( إليكترونيك صااااح ) ..
هاك النكتة دي بمناسبة شايقية :
قالو في راجل معرس تلاته نسوان ( شايقية وجعلية ودنقلاوية ) ! ( مثلث رهيب .. برمودا ) ..
فمرض مرض شديييد .. وكان لازمو عملية بي مبلغ كبير جداً وهو ما عندو التكتحو !
المهم أغمي عليه ودخلو للعملية إضطراراً .. وبعد فاق جابو الفاتورة لي أهلو مشو ودوهو لي زوجاتو عشان يدبرنها ..
الجعلية قالت : يخبرني ما عندي القرش !
الدنقلاوية قالت : يعدمني المليم !!
الشايقية ( مُدكِنة تحت البلاطة صاااح ) .. عاينت في ضراتا بي حُرقة شدييييييييد وقالت لهن : بدفعا أنا .. إلاّ بشفِّرُو عليكِن !!!

مشكور على الطلّة يا أبو الشوش .. تحياتي ودعواتي لك بكل توفيق .

كسرى
06-10-11, 03:46 PM
(( بترولنا !))

حباب بترولنا فرحانين ..
ولي جيتك رِجينا سِنين
طلعتْ رُوحنا قبّالكْ ..
وطلّعُوا زِيتنا معصُورين !!
قالوا بُطُون ترُبطُوهَا .. ربطاناها
هُمْ فكُّوا .. بِقتْ كرشاً تشِيل جاهلِين !!!
قالوا دِقُون تربُّوُها .. ربِّيناها ..
هُمْ حلقُوا صِبحوا مُلُس حلاتُو حسين !
قالوا تدُكُّوا .. دكِّيناها ..
بَسْ جرُّونا لِيكْ خمسِين !!!!
أخدنا السِيك وفي قُبُولنا ..
ورق يا أخوانّا فِيِوْ "آسِييين"!
لكِين بَسْ خلاص سُودانّا بِتصلّح ..
وتبقى " أُمبدَّة " زي " بَرلِين " !!
تعال شُوف كيف جنيهنا يعُود ..
مكانُو الفاتُو ليهُو سِنِين !!!!!!!!!!!!!!!
جنيه حيساوِي إتناشر ..
ما " دولار " .. " إسترلِين " !!!!!!!!!!!!!!!!!!!!!!
مَزارِعنا بتدوِّر جَدْ ..
مَزارِع فُول وأبْ سبعِين
وزِيت السِمسِم .. قصب سُكَّر ..
بنلغِي بُطاقة التموِين !!!
نسُوق عرباتنا نُص اللّيل ..
ونحرِقُو لِيكْ جِنِسْ بنزِين !
وتبقى الكهربا بلُّوشِي ..
لا أمطار أبتْ تهطُل ..
ولا طُوربِينا خشّاها طِين !!
والغسالة كهربا .. بل ..
تكوِي بَرَاهَا لو عايِزِين !
تعال شُوف لِيكْ جِنِسْ تكيِيف ..
ونُوم يا زُول لحدِّي إتنِين !!!!
بدل سُودان ..
نكُون صُفران ..
نكُون بُويِضان !!
ونبقى بويُّيُيُضْ ومُرتاحِين !
والطب زاتُو يِتطوَّر ..
نركِّبْ للمريض قلبِين !!
دكاكِين حقّتْ إسبيرات ..
كلاوِي .. كِبَدْ .. أُذِين وبُطيِن
دكاترة يجُونا مِن برّة ..
دكاترة يجُونا مِن لندن ..
عِشان القُحّة والتسنِين !!!
عِلاج مجّانِي ندفع لِيكَ لو تمْرضْ ..
مِنُو البِمرض ؟! ..
يقِيسُو الدَّم ميّة وعِشرِين !!
والتعلِيم يكون ثورة ..
تعُمْ النّاس ويِفهمُو زِينْ !
عِشان ما يسامحُوا زي أوّل !!!..
الياكل النّاس بإسم الدِّين !!!!!!!!!!!
يجِينا وزِير كلامُو كُتُر ..
يخُتْ الخمسة في الإتنِين !!
حندخِّل عاشرة وحِداشر ..
قِراية الجامعة بَسْ سنتِين !
ينظِّر زي فِلان دَاكَا ..
مُحامي مِن أهل ( لِينِين ) !
والبِسقُط ننجِّحُو لو وحِيد أُمُّو ..
عِشان مِسكِين !!
ونلغِي مدارِس الوُزرا ..
وينجحُوا ناس خلف والزِّين !
والقانُون صريح واضِح ..
مُصدَّق لِيْ كلّ زُول بِيرِين !!!
تعال شُوف المشاكِل عَادْ ..
بِيرِي وبِيرَكْ إتفتحُو ..
ويَاخْ سَفلِّنِي طنْ بِنزِين !!!
وعايِز لَيَّ إستِقدام ..
بِتاع عُلماء فلك إتنِين !
وعالِم ذَرّة مُتمكِّنْ ..
عِشان يَاخْ وَلدِي ساقِط دِينْ !!!
آدم مُوسى مِن دارفُور ..
عاوِز ليهُو بيّاعِين ..
للتُنباْك عِشان أصلِي !
يكُونُوا هنود وجامعِيِين !!
وواحد عِندُو كافتيريا ..
خَلَّى الحبشة والصُومال ..
قال لبنان .. وسِنْ عِشرِين !!!!!!
عاد بنُّوتنا باراً جَدْ ..
مع لبنان وإسطنبُول !
بنات تلقى الشَعر مِترِين ..
وما غالِياتْ ..
عِرسْ الواحدة بِي ألفِين !!!
ونِتبُوبَرْ عاد جِنِسْ بُوبَار ..
كلامنا يكون طرف نِخرِين !
أكِيد سُوداننا بِتطوَّر ..
لو حاكَمنَا كُلّْ سارِق ..
وكُلّْ غدَّار بَسْ سنتِين !!!!!!!
أكِيد بِترُولنا راح يطلع ..
وبنسيِّرُو بالعدِيل والزِين !!
بَسْ البترُول هُوْ ما بِنزِين ..
هُوْ الإيمان صحِيح ما غِشْ
هُوْ شرع الله ما تلوِينْ
كيف بترُولنا بَسْ يطلع ؟!!
بترُولنا الدهب .. ماسات ..
في المنْجم .. ومنجّمنا ياهُو الدِّينْ .

كسرى
10-10-11, 10:00 PM
(( من اللاحقين إلى السابقين!!! )) ..

أمواتنا جميعاً نسأل الله لهم المغفرة والرحمة .. يقال أنّه كان هناك رجل يذهب كل يوم للمقابر ويدخل في جدال من طرف واحد مع الأموات وهو يوجه حديثه لهم قائلاً :
* إنته هسع خاتي ليك طوبة تحت راسك .. ومادي كرعيك .. عامل نفسك ميت يعني ؟! ..
* ده موت ده ؟! ..
* بلا إستهبال معاكم .. قوم شوفنا نحنا ميتين كيف ؟!!..
* ميتين لي زمن الرخسة .. لما كيلو اللحمة كان بجنيه وبتسعين قرش .. ده موت ده ؟!!!
* قوموا شوفوا الموت الجد !!!!!! .
روى البروفسير محمد عبد الله الريح قصَّة هذا الرجل للشاعر شمس الدين حسن الخليفة .. وكانت تجمعهما صداقة فتفاعل معها .. بل وحسدهم على ذاك الحال .. وتحرَّكت طاقته الشعرية .. وكان ميلاد هذه القصيدة ...

سلام يا الفُتُّو خلِيتُونا في الدَوَّامَة ..
مُرتاحِين وراقدِين لا سفر لا حُوامَة !
*****
إنتُو مِن الكلام بِقِيتُو مُرتاحِين ..
وبينكُمْ مافِي دجالِين ومُحتالِين !!
لا هَمْ كِسوَة .. لا هَمْ العِيال شايلِين !!!
لا مَاهِيَّة تفْرِقْ .. لا كشِف لا دِين !
*****
مُرتاحِين مِن الزحمة وجرِي الحافلات ..
ومِن خمج المطر وسَمُوم وكتَّاحَات
لا جُوع لا عطش .. لا فلقَة لا آهَات ! ..
لا مُساهرِين ولا جارِيِيِن وَرَا البِكيَات
*****
راضِين بالشِبر مُتوسِدِين الطُوب ..
لا بُناء .. لا إيجار مِن ويلُو قُلنا الرُوب !!
لا تيار قطع .. لا مُويَة نازلة خبُوب ..
لا فاتُورة بِيها المُخ يكُون مشطُوب !
*****
لا شاكِين مرض .. لا بِتمشُوا لِيْ دِكتُور ..
لا دَمْ مِن كشِف .. أو مِن روشِتَّة يفُوُر
لا في المركز الصحِّي الوِقُوف طابُور !
وحِلَّكْ للعصُر !.. لاَمِن يجِيكْ الدُور !!
*****
فارقتُو الفلس ال للعِباد هرَّاس !!!!..
وفارقتُو المِلاريا الطالعة فُوق الراس !
وفارقتُو البعُوض المصَّ دَمْ النَّاس !!
يحْمِي الغمدَة .. والزُول يِنكرِش يُوتْ حَاس
*****
فارقتُو الضرايِب والرِسُوم ولهِيبَا ..
شوشوة العِباد .. مجتهدة في تعذِيبا !!
ومِن مَا نمشِي تِترجَّانا باهظة رهِيبة ..
بَسْ باقِي النَفَسْ ندفع عليهُو ضرِيبة !!!!!!!
*****
ناجِين مِن رِسُوم المدرسة الهَاريَانَا ..
ومِن حق الفطُور .. ومواصلات صالِيانَا
ومِن سِيد البقالة .. النُوتُو دِيمة ملانَا !!
ومِن سِيد اللَّبن واللَّحمة يوم تَغْشَانَا !!!
*****
سالمِين مِن ضغِط .. ومِن سُكّْرِي ومِن قُرحَة ..
لا تصلُّب شرايِيِن .. لا إكتِئاب لا ذبحَة !
ما شايلِين هِمُوم .. متمدِدِين في البَرْحَة
نايمِين مافِي واحد بِندهُولُو بِيصْحَى !!
*****
لا تلَّبْ عليكُم في الضُلُمَّة حرامِي !! ..
لا بَصْ يِنقلِبْ .. يعْمَلُّو حادِث دامِي
لا فيضان ولا سِيل جايِّي مِن غِيث هامِي
لا خايفِين بُرومَايِد ولا زيت حامِي
*****
لا حاسِّيِن زلازِل .. لا جفاف لا مجاعة !!
لا لابسِين هِدُوم مُحتاجة لِيْ شمَّاعة !
لا بِتِحتاجُو تلفزيُون .. ولا لإذاعة
لا كِتاب لا جرِيدة .. يأجِّرُوها البَّاعة
*****
نِحنَا هَلكنَا فقر الدَّمْ .. بِقَى مُوالِينا ..
والبُوشْ هَدَّ حِيلنَا .. سلب لحمنا حِسِينَا !!
والتُفَّاح ده لو في رُوشتَّة مكتُوب لِينا ..
نمُوت مَا نشُمُّو .. والمُوز ذاتُو غالِي علِينا
*****
مِن حالكُمْ أنِحنَا حقِيقة بغرانِين !! ..
لو شايفِين ظِرُوفنا .. تعرفٌُو حالكُمْ زِينْ !!!!!!
إنتُو مشِيتُو لِي دار الخِلُود سابقِين ..
ولابُدْ نِحنَا بِيكُمْ .. غِير جِدال لاحقِين
*****
برفع إيدِي ضارِع .. بسأل الرَّحمن ..
يشملكُم جمِيع بالرَّحمة والغُفران
ونِحنا عملنا يصلُح .. ونُحظى بالإحسان
بِيْ حُسن الخاتمة أوعِدنا يا رحمن

كسرى
10-10-11, 11:49 PM
(( عناد قصيدة !! ))
أيضاً للشاعر : شمس الدين حسن الخليفة

لو إنته مُغرم بالعِناد ..
أنا بالِي زي ليل الشِّتا ..
لو دُرتَ شلهتِي وأزايْ ..
أنا رُوحِي خِلقَة مُشلهَتَة !!
تهرُب نرسِّل لِيكْ تزُوغ ؟! ..
دِي حِكاية فعلاً مُلفِـتَة !
رُوحِي المُطفْطِفَة تشْتهِيكْ ..
تَبْرَاكَ وإنته تشلِّتَه !!!
أنا مِن بِرُودَكْ يا لئِيمْ ..
أعصَّابِي دِيمَة مُكتكِتَة
تِعبتْ عُيُونِي وحَوَّصَتْ ! ..
الجيلي مابِي يثبِّتَا
رجعتْ بعد سفراً طوِيل ..
بِقتْ العُيوُن هِي محطتا
كُرْعِينِي لَمَّنْ لاَقتكْ ..
إتسمّْرَتْ في فِجتَا !
لاَمِنْ مشِيتْ إتحرَّكَتْ ..
يمكِن مَشِيتَكْ دَفرَتَا !!
عُزَّالِي قالُو بِقيتْ هزِيل ..
وأفكارِي دِيمَة مُلخبَتَة !
وأنا قُلته لِيهُمْ مالُو نَانْ ..
يَا عُوَرَا ؟! مَا هِي دِي لِذْتَا
آه لو تعضِّيِنِي الحِلِيوَة ..
عِشان أبَرْوِّزْ عَضَّتَه !!!
إن شاء الله تفْرُكْنِي ..
وتَلايِقْنِي وأمُوتْ فِي حَلَّتَه !
وكمَان تشلِّخنِي وتقِيف ..
شلُّوفتِي تحضر دَقَتَه !
شَارَّانِي لكِينْ مَا بزِحْ ..
أنا دايِر أشُوفْ بَسْ آخرَتَا !!!

معاوية كشة
11-10-11, 09:55 PM
شكرا ياكسرى ...قصيده تصور لنا الصبر و(اللياقه) من لايوق ...حلوه والله

كسرى
11-10-11, 11:14 PM
شكرا ياكسرى ...قصيده تصور لنا الصبر و(اللياقه) من لايوق ...حلوه والله

الشكر لك أخي معاوية كشة .. نحن ضيوفاً وأنتم أرباب الدار .. ( لقيت كتير من الإخوة مسخنين البوست .. جينا زدناهو شوية حطب ) .. الشكر لصاحب فكرة البوست .. وإنته كمان أدينا حاجة من بيت الكلاوي كده ..

كسرة :كشة .. أعتذر إن بدر مني ما يسيئ لشخصكم الغالي .. ولك العتبى حتى ترضى .. والعفو يا أخوي .. وما أبرئ نفسي فالدّنيا أصغر وأقصر من أن تأخذني عزّةٌ بإثمٍ !! ..

كسرى
12-10-11, 12:08 AM
(( كهربة منقطعة النظير !! ))
للشاعر : شمس الدين حسن الخليفة

حِليل الكهربه الجافتنا دُون أسباب ..
لا إتنكرنا لِيها ولا قفلنا الباب !
يِزِيدُو رِسُومَا نتفائل نزِيد تِرْحاب ..
وكُلْ مَا نقُول توافِي ..
نلاقِي ظننا خاب !!
*****
مِتِينْ يا الكهربه المقطُوعه ..
I see you ..
وإنتِي دوام مرِيضة ..
وراقدة I.C.U
معاكِي النَّاس تعِيش كُلْ يُوم ..
مآسِي New
مُحتارِين معاكِي ..
يمُوتُو أمْ يحْيُو ؟!!
*****
تبْكِيكْ المصانِع ..
إتعطَّلتْ مَكنَاتَا !
زايِدة خسَايِره ..
ومُتوالِية يُوتْ نكْباتَا
وكهربة السَجمْ ..
السادرَة في حركَاتَا
لاَهَا الحيَّة ..
لا أعلنْتُو لِينا مَمَاتَه !!!
*****
تبْكِيكْ المكاتِب ..
ضُمَّة مَا شغَّالَة !
الأمخَاخ مُعطَّلَة ..
والسَمُوم ملاّلة
النّاس بِي هِدُومَا ..
تضِيق وحَالتَا حَالَة !
وكهربة السواد ..
بِي دغالَة سايِقَة دَلاَلاَ
*****
تبْكِيكْ كُلُّو تلاَّجَة ..
وفِرِيزر سايِح !!
بِي دِمُوع التَّلِج ..
السايِلة تمْلاَ صفايِح
والأكِلْ التِلِفْ ..
قَطَّعْ قُلُوبنَا سرايِح !!!
وكرتْ الجمرة مدفُوع ..
تمنُو ساكِتْ رايِح !!
*****
يبْكِيكْ جِسمِي عرقُو ..
دِمُوع غزِيِرة تسِيل
خلاص صَابنِي الجفَاف ..
وإنهَدَّ مِنِي الحِيلْ
معدُومَة الشهيَِّة ..
ونُومِي ذاتُو قلِيلْ !
مُهيَأ صِرتَ لِيْ ..
ضربة حرارة عدِيلْ !!
*****
تبْكِيكْ الشِمُوع ..
شُوفْ عِينِي جارِيَّة دِمُوعَا
سُوقِنْ حَرَّ ..
في كُلُّو بيت مزرُوعَة
النَّاس كِيف كمَان ..
مَا تكُون دَوام موجُوعَة !!!
مَا دَام كهربتنَا ..
نِهَارْ ولِيلْ مقطُوعَة !!!!!
*****
تبْكِيكْ الشوارِع ..
فايِرَة زادَتْ عَتمَة
باللّيل الأرِض ..
نار قايِدَة والحُوشْ كَتْمَة !
والرُّوُحْ في المنَاخِير ..
لا هبُوب لا نسّْمَة !!
علينا إتفقُوا دِيلْ ..
وألاّ الحِكايَة دِي قِسّْمَة ؟!!!
*****
تبْكِيكْ الحِلُوقْ ..
النَّاشفَة ولِسَانَا إنْسَلَّة !
حَارَّة المُويَة ..
والرِيِقْ الدقِيق مَا إتبلّه !!
ولو جَانَا التُراب ..
الطِينَة تِزداد بَلّة
قُلنا الرُّوبْ ..
وراجِينْ الفَرَج مِن الله
*****
مَا بِنِسْتغنَى عنَّها ..
إلاّ كِيف نَصَلاَ ؟!!
رِضِينَا نصُوم ونفطُر ..
حتَّى لو بِيْ بصَلة !!
حِكاية الكهربه ..
ومغايِصَه المُتصِلة
زِيْ حُبْ الحلنقِي ..
الإشتهر في كسلا !!!

اسامة ابوزيد
29-10-11, 01:34 AM
نريد لدفس البطن بوشا ................ نكون بأكله كمجاهدينا..
ولن نرضى سواه بأكل لحم ........فلسنا فى اللحوم بطامعينا..
اذا ما لاح طيف اللحم يوما..............ندنقر دونه لا ناظرينا..
فيا لحما يقد الجيب قدا ............. كفاية مغستك السويتا فينا ..
فان بطوننا يالحم عادت ............. الى الافوال بعدك قانعينا..
تمطقت الخشوم لأكل بوش .......تدنكل بالشطوط أو الطحينا ..
وزغردت البطون لأكل فول .... تكركب مرة وتحوص حينا ..
اذا ما البوش جهز ملىء صحن .....تخرله المجامع ساجدينا ..
وتنخر فى نواحيه الايادى .... يصوم عن الكلام (البوز ) فينا..

كسرى
05-01-12, 10:27 PM
عشق فنِّي ..
قال النجّار :
مُسمار ودقيتيني في خشب اللَّيالي المُحزنة
مُنشار هواك قطع الصلات المُمكنة
يا أبلكاش .. وفُورمايكَا .. فينا .. ومننا !!!

وقال المكوجي :
يا كاويَّة قلبي قبل قميصي ..
رشيِّتْ لِياقتُو وما إنكوَى
يا ريتني لو أغسِل دواخلي من الهوَى ..
وزي عمَّة بيضَا أشُرَّهَا
صابون هواك غسَل النوَى !!!!

وقال الجزار :
يا طاعمَة زي كِبدة إبل ..
بالشطَّة والليمون شِفَا
أنا بي وراك سِبتَه القطِيع ..
ضلَّ الدِّريب .. وعليك حِفَا
يا كاسرَة بي فرَّار هواك ..
ضُلَعِي .. وظرُوفي المُؤسفة !!!

وقال المكانيكي :
يا واقفَه بين صبري وترُوس الفرملَة ..
أنا بحكي رِيدِك للملأ
والجاني مِن بِستِم مشاعرِكْ ..
بلْفُو طار .. بحْكِيبُو للِّيل .. والخَلا
وأنا بعذُرِكْ ..
وأوْزِن دِركسُون الصبُر ..
وأضغط كلتش الأُمنيات ..
لو ألحَقِك
يا الحِنتَا زي زيت رِجُوع ..
أسود مِن الشقى والدموع !!!!

كسرى
10-01-12, 10:36 PM
أستاذ ( إنجليزي ) في مدرسة ( بنات ) ! ..
جا مسخِّن كده ..
من أوّل ( حصَّة ) ..
عمل ( قصَّة ) !!

قال ليها :
كل ما أقبِّل وأعاين ..
ألقي عينيك جات في Mind..
حاجة Very good..
حاجة Fine..
يا Suger مصنع كنانة ..
يا Flor ماليَّه البُطانة ..
إنتي Fantastic banana..
إنتي Where is مابتجينا..
إنتي شعَرك Dark night ..
إنتي My heart إنتي نُورُو ..
إنتي My love البدُورُو ..
عايز أشُوفِك More tommorow !!!!