المساعد الشخصي الرقمي

مشاهدة النسخة كاملة : ساعي البريد


كروبين
25-03-09, 10:41 AM
ساعي البريد هو ذاك الشخص الذي كان يربط الوصل بين الناس في زمنٍ من الأزمان و قد كان يلعب دوراً رئيسي في المجتمع بتوزيعه للخطابات الواردة و كانت الخطابات تكتب بأسلوب جميل و أنت تتنقل بالنظر بين السطور سطراً سطرا و لربما تعيد قراءته عدة مرات و الاحتفاظ به إن كان الخطاب من المحبوب و لعب ساعي البريد دوراً في الشعر و الغناء السوداني فها هو أبو الورود يتسال ..... ( جواباتي البوديها تقول لا بتمشي لا حاجة ) و يقول ( رسلت ليهو زول مرسال و المرسال مشى و ما جا) .... و قد يتمادى ساعي البريد في تمرده عن العمل و يعمل نائم كما قال ترباس ( أنا عندي ظن ساعي البريد شم العبير عجبو الدلال نائم عمل ) و لكن وا شقانا و سهرنا لو ما جات الجوابات و أتعطلت المراسلة من المحبوب و مطنش الكتابة و تناولها البنا حين قال (البريدو مالو أتاخر بريدو يا ناس ) و يبحثون له عن المبررات و الأسباب أي للمحبوب ( يمكن كترت مشاغلو أو يمكن حدي شاغلو) و دي العوجة ذاته و لم يكن لأد أن يستغنى عن هذه الوسيلة كباراً و صغار و محبين و غيرهم و ها هو الكاشف يغرد ( حبيبى أكتب لي و أنا أكتب ليك) و عدم وصول البريد يصيبك بالضجر و القلق و الاكتئاب ويصادر عنك حبال الصبر ( مافي حتى رسالة واحدة بيها نتصبر شوية ) و كما قلت كان من يقرأ الرسالة و يعيد قراءتها و هو يتصور المحبوب بين السطور و عبق العطر ( أقراها لأخر سطر و أرجع أعيدها من أولها ) و الرسالة هي خير زاد في الغربة ( في الغربة من زمن بعيد ) أو كما غنى الجابري ( هل يصح و الغربة حارة و بالخطاب تبخل عليا) و لمشاكل ساعي البريد لجأ البعض للحلول المتوفرة لديهم ( يا طير يا ماشي لأهلنا بسراع وصل رسائلنا ) ( ما تخلى زول في الحلة إلا تسلم عليهو و تبوس أيديهو) رائعة صالح الضي و رائعة وردي (يا طير يا طائر ) ( تلقى الحبيبة بتشتغل منديل حرير لحبيب بعيد ) .... نعم كانت الخطابات و ساعي البريد ذو مهمة حساسة قبل ظهور عالم التقنيات و رسائل SMS و MMS و الماسنجر و الايميلات التي لا تعطيك متعة القراءة للخطابات التي كانت من ثلاث و أربعة صفحات مطولة و أنت تتنقل بين سطورها فرحاً أحياناً و زارفاً للدمع أحايين أخر ساعي البريد هو رجل من أيام الزمن الجميل التي أحسب أن لا أمل في عودتها مرة أخرى.

عبدالحفيظ أبوسن
25-03-09, 12:13 PM
مكاتب البريد والبرق ساهمت قديما في تطور المجتمعات ونقل المكاتبات الرسميه ولا زالت تقدم خدماتها في أنحا العالم إلا السودان وتطورت البريد السريع والدي أتش إل
بذكر تلغرافات زمان والحساب بالكلمه وطرائفها
زي واحد رسل تلغراف : البت تسميها أمها . فسموها أمها

سوما
25-03-09, 12:32 PM
بالجد حلوه طريقة السرد ياكروبين

وماخليت ليك زول ولا أي حالة إلا وأديتها البريد بتاعها خطير لقيتك

ساعي البريد ياهو ساعي البريد بس مواكب للعصر الحالي DHL و TMT
والتقنية بتاعت الإتصالات دي


http://www11.0zz0.com/2009/03/25/09/870977348.jpg (http://www.0zz0.com)

محمد ساتي
25-03-09, 12:38 PM
كانت لحظات ما أحلاها


بالجد كان الشقف وكان الترقب وكان ما كان وكان


التكنولوجيا أفسدت علينا حياتنا ومتعتنا بقدر ما قدمت من خدمات وسهلت سبل الحياة


لكن أظن مازال دور البريد قائماً وكذلك دور ساعي البريد

بس بصورة محدودة وفي إطار ضيق

احمد الحمودي
25-03-09, 12:40 PM
البريد حتى الان له اهمية كبيرة ولكن ناسنا من الكسل وعدم المسئولية ضيعهو اذا وجد بريد يعتمد عليه يمكن ان تقدم اي طلب عبر البريد ويجيك الرد عبر البريد حتى تجديد الجواز يكون بالبريد .
الان حتى مكاتب البريد تم بيها لمستثمرين بالمناسبة دي مكتب البريد في كوستي لمن اتباع ؟
وبي كم ؟
واين ذهب القيمة ؟
مرسال الشوق يا الكلك زوق

عاصم الشيخ
25-03-09, 12:47 PM
كربرب .... برجع لك بي روقة

كروبين
25-03-09, 03:23 PM
كان لدينا صندوق بريد 63 المنطقة الصناعية و كان ساعي البريد هو عمك بشرى الله يرحمه و هو كان مصرياً متسودن و هو خطاط أيضاً و كان يجوب المنطقة الصناعية بأكملها لتوزيع البريد و هو يسمعك أخر نكتة و كانت له حاسة غريبة في تصنيف الخطاب و عم بشرى كان مزواجاً و قد علمت أنه تزوج بستة نساء 2 مصريات و حبشية و 3 سودانيات ذلك بالطبع بعد طلاق و كانت على حبله أثنين و كان يحكي لي بأنه كان من كبار المجرمين في مصر و له فيش غير نظيف و للهجرة للسودان قام بوضع أصابعه العشرة في الزيت المغلي لإضاعة البصمات حتى لا تظهر ملامح البصمة في الملقف الجديد له و حصل بذلك على جواز جديد باسم أخر و هرب للسودان و قد علمت أنه كان مطلوب للعدالة و أختفى في هذه المدينة و لم يعد مرة أخرى ... و أذكر إن كان الخطاب من الحبائب يبتسم لك في مكر و لا تحصل على الجواب إلا بعد دفع المعلوم و كان رجلاً ضخماً يأكل حسب رويات البعض 12 رغيفة في وجية واحدة و كنت أرى أنها مبالغة و لكن أكد لي هو أنها 10 رغيفات فقط بحلة سمك كاربة أو قارصة لوحده بالتقلية ... رحم الله عمنا بشرى و كل البوستجية ما توفي منهم و العمر المديد من على قيد الحياة

كروبين
25-03-09, 03:33 PM
اغرب حاجة لمن يغلبك مع الحبيب و تدكو الورق و تخرخر و تقول ما داير معاها أو هي تقول ما دايرك معاك أها الجوابات البيناتكم مصيرة شنو .... يا زول المغنين لقوا ليها حل كدة أنسمع دي ( أنت رجع لي رسائلي و الرسائل العندي شيلها شيلها) معقولة يا مان هو الرسائل دي جاءت بعد تعب و معاناة و بوستجي يعمل نائم و المرسال يكسح بعدلو .... لكن أجمل البوستجية هم ما عايشناهم في الوسطى هي استغفر الله في المتوسطة فقد كان هناك من هم يقومون بدور البوستجيات على أكمل وجه لتوصيل رسائل الريدة و الغرام للطرف الأخر و هو شخص موثوق به و بالطبع كانت خطابات لا تستفيد منها الحكومة لأنها بدون طابع بريدي و لكن يشكل نص الكتاب حضن دافئ للرسالة حتى مستقرها بين احضان الحبيب و البكاء ليلاً بزرف الدموع و دسها تحت المخدة ... و تحت المخدة فيها زرات حلوة لمن أجيكم

سوما
25-03-09, 04:15 PM
هاهاهاهاهاها

حلوة منك يامان

بيني وبينك كده عم بشري ضحك ليك كم مره؟؟ واديتو بقشيش؟؟؟

يله راجنك بالمواقف التحت المخده سريع ..........


تقبل مروري

كروبين
25-03-09, 07:40 PM
كان معنا في المتوسطة زميل دراسة يسمى النزير البشير الأمين منتقلاً من مدرسة أخرى في منتصف العام الدراسي الأول للصف الثاني و من المعروف أن الصف الثاني تكون من أكثر الصفوف هرجلةً فليس هم بالبراملة و خائفون كما في الصف الأول و لا هم على أعتاب الإمتحان و التخرج كما في الصف الثالث .... وكان هذا النزير داهية من دواهي الزمن فقد كان ذو خط جميل و صياغة أدبية ذات حنكة و قبول و مفردة سلسة (حنك شديد) و شاعر لا يشق له غبار له صولات في السجع و الطباق و الجناس رغماً عن عدم دراستنا للأسلوب البلاغي و لكن كان هو هكذا و قد استخدم مواهبه هذه في كتابة الخطابات للمتيمين الذين لهم علاقات مع جارتنا الحبيبة الخدمات بنات و كانت لصيقة لنا بالحائط و يوجد ميدان للطائرة في الفناء الخلفي للمدرسة و كذلك هن نتجول في ذاك الميدان و توجد مزيرة ملاصقة أو قريبة للحائط التي أحدثت بها فتحة لتبادل الخطابات كأول صندوق بريد عرفناه حين كنا يافعين و كان الشخص الأنيق النزير يقاولك على الخطاب ( خطاب غرامي بقرش + خدمات توصيل قرش أخر خطاب مع قصيدة بقرشين و خدمات توصيل قرش خطاب لأول مرة كان غالي جداً بخمسة قروش ) مدعياً أنو الخطاب الأول بكون مرهق و هكذا أذدهرت تجارته و ذاع صيته سراً بين فصلي و هو عثمان و الفصل الثاني و هو العباسي و بعض من طلبة الصف الثالث و أصبح يتفنن في ترويج بضاعته إذ يظهر لنا في بعض الأحايين تلكم الأوراق المزركشة (يا أبو الليل ) من أين أتى بها ذلك القصير المكير ثم يكون على اسلوب معين حتى يظهر لنا أقلام باركر سائلة جميلة باللون الفضي و كنت أرتعب منه أحياناً فقد كان مشاعاً بأنه له جنية تحدثه ... و على كلٍ فقد كان يكتب بصياغات متعددة و أسلوب راقي تلكم الخطابات الغرامية حتى أطلق عليه (يارا) و أذكر يارا ذلك أنه كان يكتب لمجلة الدستور (أوراق عاشق) و لكن لا أبالغ إن قلت لكم أنه كان يفوقه اسلوباً و في إحدى الأيام قبض عليه استاذ محمد أدم (كونجة) و هو يدخل بالباب الخلفي للمدرسة من جهة السكة حديد و الغريب في الأمر أنه قبض عليه متلبساً و هو يسلل خطاباً لا لأي شخص و لكن لنفسه (و شوفو بعد داك) أحضر بالمكتب منقاداً من خلف من اياقة قميصه كالحمل الذي سيذبح لمكتب المدير (عبد الهادى محمد أحمد) و لما كانت شبابيك فصلنا تطل على غرفة المدير أخرجنا رؤوسنا بالشبابيك لأنو الشمار حار شديد .... و قفل المكتب و لم نرى شئ سوى صياحه الداوي ....
و عند الصباح في الطابور تقدم استاذ محمد أدم طه (كونجة) و نده بصوت عالي النذير البشير الأمين فتقدم زولنا للأمام و قال كونجة صفقوا ليهو فصفقنا صفيق عالي داوي ثم قال النذير أخوكم عندو ليكم غنية ... و كانت الغنية عبارة عن الخطاب ملحناً و غناهو بصوت جميل و بعد ذلك خرج المدير و اسمع كلمات و قال انت ما طلعت من البيضة عامل لي فيها بتحب رد عليهو النزير مالو يا استاذ أنت ما بتحب (عائشة باروكة) و هي مديرة مدرسة البنات فما كان لنا إلا أن ننفجر من الضحك ..علمت قبل سنوات أن النزير أصبح من الشيوخ في الدعوة و أصبح شيخ النزير

سوما
26-03-09, 12:07 PM
كروبين والله ضحكنتا شكلكم كنتو مصائب

الا ليت المتوسطة تعود يوماً وتعود قصصنا معها

بالجد مرحلة مبالغة في الجمال والشغب والهرجلة ..... أنا قايتو أكتر حاجة بتذكرها ( لمن كنت بصدر صوت وفمي مغلق وبكون عادية خالص (يعني طنطنه) يقوم يجي الأستاذ ويفتش الصوت لمن ما يلقاهو يقول الناس البتقرأ شديد دي أقرو براحة وتاني نكرر الحركة .... ومافي زول بعرف إلا الجمبي هههههههههه) أيام

كروبين رجعتنا لوراء وللذكريات

ودمت

ahlam izat
26-03-09, 01:13 PM
فى هولندا كل شئ بالبريد ونخاف جدا من فتحه لانه بجيب الفواتير والشيكات

والجقلبة تقوم الشهر ده فاتورة الموبايل جات عالية ونقة ما ليها اخر

كروبين
26-03-09, 01:20 PM
في ذات المرات أتاني من ساعية بريد خطاب ريحتو تجيب الطاشي لكن خط زي درب النمل أو كارو لساتكو مفتولة لكن مكتوب بسياق جميل يا زول العبد لله رأسو كبر شديد و عامل فيها كوبيد يشيل و يقرأ و أرجع أعيد من أوله زي ما قال زكي عبد الكريم و أنا ما عارف زاتو الكاتب الجواب منو و طبعا حرفنة البنات ما بكون في أي أسم و أنا رسمت لنفسي أحلام وردية و بقيت أسرح مع سهرة يوم الخميس الأرسال محلى و الفيلم عربي رومانسي و أخوكم حريص على الجواب بالله أتقول خريطة الكنز ... المهم يوم الدقسة حصلت و الجواب نسيتو تحت المخدة بعد ما ساهرت معاهو سهر جد ووقع ليك في يد ود عمي و هو أكبر منى بمرحلة و كان مستقر معانا في الصالون في البيت و كنت ما بترسل ليهو لو بقى نبي حقارة ساي مني أها أستغل الظرف طبعا و قال لي والله الا أورى عمي بالجوابات البتجيك ... عملها طبعا جوابات طوالي بقيت اتوسل ليهو قال لي تاني ارسلك المريخ تمشى قلت ليهو جدا المريخ ده طبعا النادي البحبو موت و بالفعل يمشور أخوكم مشورة لامن رسلو يطلع برة زي كيلون الباب مشاويرماكوكية و ما عادية شئ السوق الكبير لكيس التمباك شئ يكون رويان و الجك جمبو و يقول لي جيب موية من جوة مرة شوف لي جرائد من الحلة يرسلوهو للرغيف من الفرن يجي يرسلني انا ..غايتو جنس زلة .... لمن يوم دقس و سرقت الجواب منو .... و زولنا جاء من الشغل و قال لي جيب موية يا ولد قلت ليهو موية ... هاقال موية ... الموية التقيف ليك في زورك و ما تنزل .... يا زول كيف الكلام ده قلت ليهو كدة لو عجبك لو ما عجبك أضرب راسك و لما اتكسرت اضربها تاني ضحك قال لي يا كلب سرقت الجواب قلت ليهو جواب شنو و طبعاً كنت قطعت الجواب ارباً اربا و كل قصاصة رميته في كوشة حلة براها ...
بعد داك لمدة حرمت الحب و الريدة ...

محمد ساتي
26-03-09, 04:21 PM
والله يا كروبين الواحد لو لمه فيك ما يسيبك شكلك وناس العينة البتوصف أي حاجة


تحياتي كروبين واصل فنحن ننتظر جديدك وما تنسى بوستاتك القديمة الشيقة رحلة القطر أمل وبدر و....و....و

كروبين
26-03-09, 04:29 PM
إحلام يا فردة ضحكتيني و الله يعني ساعي البريد أو برنيتة لمن يجيكم لامن تنخلعو و الزول يرجع لوراء و و ياخد ليهو صنة و يقول ده الجابو شنو هسه

خال سامي
26-03-09, 06:53 PM
شايل معااك قلبي الشديد سلمتو ليك قلبي الوحييد
بالله ياساعي البريد سلم علي الزول البعيد قول ليهو غيرررك انا مابريد انا مابريد

خال سامي
26-03-09, 06:58 PM
[http://www.youtube.com/watch?v=jSpZOgmFkz0

Abousamih
26-03-09, 10:59 PM
البريد مؤسسة ما زالت قائمة في الدول الأكثر تقدما...إرتبط عندنا في السودان بالرسائل...وفي تلك البلاد يمثل -كما ذكرت الأستاذة أحلام-محطة خدمية هامة تصلك من خلالها الفواتير ...كهرباء...هاتف...البطاقات البنكية...

Abousamih
26-03-09, 11:01 PM
عشنا تلك الفترة التي أبدعت في وصفها يا كرب..وما زلت حتى الأن أحتفظ برسائل من ذلك الزمن الجميل...حينما كانت جدتي ترسل لي أشواقها

من كوستي
30-03-09, 01:09 AM
كروبين



كلااااااااام ياعوض دكااااااام


والله البريد دة لو عرفو قيمتو من بوستاك دة اقصد من بريدك دة اهلنا في السودان اكااااااان خالوووووو كترت الشبكاااااات الزي دكان التنباااك دي وقبلوووووو علي البريد التعيسين اليلنا دةة وعيييييييك عمك الشايقى في كوستي اكان بقى سيدو علاااااااا وينا العضاااااان التلبس الحلق.......................



المرور الانيق والله ماقصرتوووووو مع ساعي البريد


وجددددددد كدةةةةةةة بوست رابيييييي ضحتكااااااااا لمن قلتا بس


اجدوووووو ابو سامححححح عيني في عينك جدتك برضك ولاحقتك هعععععععع



تسلم كرب رب جد كدة فكرة لتنوية مهم لما وصل الية التطور في البريد وسالو اهل الذكر ان كنتم لاتعلمون احلااااام ممكن تزيدناااااا عن مافي بلاد اهل الذكر التكنلوجي!!!!!!!!

عاصم الشيخ
30-03-09, 09:46 AM
الغالي كربرب .....

امتعتنا بسردك السلس , وارى في قدحك بقية من خمر فزدنا واسترسل .....

كروبين
30-03-09, 03:46 PM
الشمالية
وادي حلفا
عبري

هكذا كانت تكتب العناوين في ظرف الخطاب الناصع البياض و في أخر الظرف ظهرت كلمة بالبريد الجوي وكنت أستغرب لتلك الجملة إذ كنت أتخيل أحد الظروف مكتوب عليها بالحمام الزاجل و كانت تصل الخطابات لعد فرزها في مكتب بريد و برق الخرطوم للأقاليم المختلفة و تصل خطاباتنا الواردة للأقليم الشمالي إلى مدينة وادي حلفا الميناء النهري الذي يربطنا بالشقيقة مصر و من ثم تنقل بالبص و هو لوري بدفورد يطلق عليها سفنجة ليس لها أبواب و لا تقل باي لوري ولكن بص مكتوب به البوستة و هي تصل يوم الأثنين إلى عبري و سائقها يسمى دهب تينا عليه الرحمة و ذكر في أنغية عديلة المشهورة ( دهبا أتنينقا وعدداقي ) أي مواعدة دهب يوم الأثنين في كناية لإنتظارها جواب من الحبيب و تصل العربة لبوستة عبري ....
عبري تلك المدينة اليافعة على شاطئ النيل كأجمل عروس في ثوب الفركة و القرمصيص تظنها أضغاث أحلام و يحتضن بوستتها النخيل من كل صوب فلا ترى لها شمساً من أية ناحية و أذكر بها عمك محمد صالح قورتي و هو رجل طويل أسمر هاش الوجه طفولي الملمح و هو يغرق بين الختم الدائري للبوستة و الختامة الملئية بالحبر الأسود و هو داخل قفص حديدي من السيخ و تربيزة من الخشب القوي المتين و معه الشيخ عبد العزيز و الشيخ لسيت اسماً كما علمت فيما بعد بل هي كنية و هو خبير في عالم التلفرافات و يضع سبابة أصبعه و هو يرسل البرقيات كما يناغم على مفايتح أورغن .... تيكيكيك تك تك تك .... و يقال من تأثره بالمهنية أنه كان يحمل معه علبة كبريت و يتناغم بها على طويل الطريق و هو على ظهر جماره الأبيض العريض إذ كان من سكان نلوة و التي تبعد عن عبري مسافة 22 كيلو يأنس بتلك الكبريتة نفسه لتبديد طول الطريق ....
لي عودة

عاصم الشيخ
26-04-09, 12:13 PM
شنو يا فردة .... لي عودة ومن ديك وعيك ....

اسامة ابوزيد
26-04-09, 01:45 PM
حليل البريد
لمن كنت في البنك كنت ماسك مفتاح صندوق البريد واهم حاجة يوم السبت من الصباح امشي افتح الصندوق


تخريمة :
وعاوزنا نرجع ذي زمان .. قول للزمان ارجع يا زمان
وهاتلي قلب لا داب ولا حب .. ولا انجرح ولا شاف حرمان
تفيد بايه يازمن وتعمل ايه يا عتاب
طالت ليالي الالم واتفرقو الاحباب

سامى الهادى
26-04-09, 03:11 PM
انا عندى ظن ساعى البريد شمة العبير عجبو الكلام نايم عمل

عاصم الشيخ
06-09-09, 11:53 AM
البريده ...

ماله اتاخر بريده ..

من كوستي
07-09-09, 01:32 AM
خطابااااتي البوديها تقول لابتمشي لاحاجة

والناس البقونى سبب رمونى وصبحو فراجاااااااا



العمل الخيانات العفانات دي يكون منو؟؟؟؟؟؟:o :rolleyes:

بكري الطيب البدري
09-02-10, 08:38 AM
التكنولوجيا اثرت في عمل البريد

عاصم الشيخ
23-01-12, 04:45 PM
بالله يا ساعي البريد
سلم على الزول البعيد
قول ليه غيرك مابريد
ما بريد انا ما بريد



من البوستات التي احبها ..

عادل عثمان
23-01-12, 05:49 PM
بوست ممتع وسرد بتفاصيل مشوقة ..
أين كروبين ملك الحرف الجميل ؟

ودالبلة
23-01-12, 11:44 PM
فعلا بوست رائع جدا
برغم مروري سريعا عليه

شكرا كروبين

عبدالحفيظ أبوسن
24-01-12, 07:26 AM
كروبين قاعد ,, يوم والتاني بنشرب جبنتنا سوا ,, بقول مدبرس وقرفان بس

والي الدين علي
24-01-12, 07:36 AM
إين صاحب هذه المفرده الأنيقه
ليته يعود

عباس سيف
24-01-12, 09:53 AM
كروبين قاعد ,, يوم والتاني بنشرب جبنتنا سوا ,, بقول مدبرس وقرفان بس
دي حسادة منك يا كروبين
مالك حارمنا طلتك