المساعد الشخصي الرقمي

مشاهدة النسخة كاملة : الدجل والشعوذه - الساحرالسوداني حامد التائب


فرح الاماسي
21-01-09, 04:19 PM
الشيخ حامد الذي كان رأساً في الصوفية (الطريقة التجانية)

وكان ساحراً من أكبر سحرة السودان ......

من الله تعالى عليه بالتوبة إلى عقيدة أهل السنة والبراءة من الشرك والسحر والدجل والشعوذة وعبادة الشيطان والتصوف

وقضى فترة بعد توبته معتكفاً بالمسجد الحرام بمكة لفترة ثلاثة أشهر....

أقام محاضرات علنية وبين فيها ما كانوا يفعلونه وكان بعضها بنادي الأسرة وبعضها بمسجد مسيك بالامتداد ودعا الناس إلى أن يذهبوا معه ليريهم بعض المراحيض التي رموا فيها كتاب الله جل وعلا....

طلب المناظرة العلنية من البرعي قبل وفاته ولم يوافق على ذلك فهو من أخبر الناس بالبرعي ..

يقيم الآن بمدينة الحاج يوسف بالخرطوم بحري..

قبل أيام وصلتني الأقراص وهما قرصان بهما أكثر من ستة ساعات فيديو ... أسأل الله أن نوفق لتنزيلها هنا ولتضعها في منتدانا وقد قال الله تعالى (( ولا ينبئك مثل خبير))

محمد ساتي
21-01-09, 04:47 PM
فرح الأماسي أحيك على نشاطك اليومي ولقدام

بكري الطيب البدري
22-01-09, 01:07 AM
سؤال بريء : هل في ناس من الصوفية سحرة ؟[/CENTER]

عوض مختار
22-01-09, 08:02 AM
http://www.youtube.com/watch?v=PRwWNH2pcIc

عوض مختار
22-01-09, 08:08 AM
سلامات ..الأخت فرح الأماسى ...سلام ....فى رأى إنه رجل دجال لا أكثر ولا أقل ...فقد إتبع طريق آخر للشعوذة ...الجمعة سوف أنزل لكم بعض الحلقات ...موجودة كلها فةى يو تيوب ...سمعت جزء منها ولم تعجبنى ..لكن للقارىء رأى آخر .فإذا أردتم سمع الباقى أنزلته لكم ..لكن لا مانع من ثلاثة أربعة حلقات
عوض مختار

فرح الاماسي
22-01-09, 08:52 AM
فعلاً يا عوض الرجل دا دجال ولكنه اثبت كلامه بالفعل وامام الجميع وشرح اي شئ علي الملأ والله حيرني جدا دا عمل تجارب حية عن كيفية السحر والحجبات وغيرها وماتنسي انه كان قطب من الاقطاب يعني مكانته في الصوفية كانت كبيرة غاااااااااااااااااااااااايتو ربناسهل والله حيرونا

فرح الاماسي
22-01-09, 08:54 AM
والله ياو ود ساتي الرجل دا بقول انه كان صوفي وصوفي كبير كمان دا يعني شنو انه فعلا في الصوفية في ناس دجالين واعتقد انهم اقلية وهم الشوهو الصوفية ولكن اوليا الله لا خوف عليهم ولا هم يحزنون .

فرح الاماسي
22-01-09, 08:58 AM
والله يا بكري في الصوفية في ناس دجالين امثال ذلك الرجل ولكن اوليا الله لا خوف عليهم ولا هم يحزنون .

عبدالحفيظ أبوسن
22-01-09, 09:10 AM
مايحدث الآن أسترزاقا وليس تصوفا . أس التصوف الزهد والتقشف و خدمه الناس وحسن الطويه وحب مخلوقات الله جميعها , ونشر التوادد والتراحم
قال (ص) رب أشعث أغبر ذو طمرين لو أقسم علي الله لأبره . أما راكبي العربات الفارهه ولابسي غالي الملابس وآكلي طيب الطعام , فأنا أجزم أنهم ليس متصوفه وأمرهم لله

عوض مختار
22-01-09, 09:25 AM
http://www.youtube.com/watch?v=0Q5eqR_51x8

عوض مختار
22-01-09, 09:42 AM
سلامات ...رجل مازال يقول إنه من أولياء الله ...كلامو كلو متناقض وناقص ...عموما فى راى هذا نوع من فنون الشعوذة .عملت فى قرية الشق الشيخ البشير المكاشفى مدرسا ....والناس هناك معظمهم عاملين فقرا ...أحدهم صديق لى ...وصريح معى ...حكى لى الكثير والغريب جدا ..من الغش والدجل ...وكان يسلم له ركوعا ...فى خاتمة المطاف ...قال لهم والله تانى اليقول لى أبوى الخليفة ألحق حد أمو ...وترك الشفلانة إلى الأبد ...وآخر من أبناء الشيخ البشير كان ورعا تقايا أوابا ...يرفض رفض باتا ان تقبل يده ...كان يزورنا فى المدرسة ...وحين يحين وقت الصلاة نطلب منه أن يصلى بنا ...يرفض بشدّة وتحت إلحاحنا ...يقول بصلى بيكم لكن ما بتحمل مسؤوليتها ...كان بالفعل رجل دين ...فى كل تصرفاته ..وهو عبد الباقى الشيخ البشير ....رجل نموذج للصلاح والدين دون شعوذة ولا دجل
عوض مختار

عاصم الشيخ
22-01-09, 12:04 PM
فرح الاماسي سلامات
حضرت لهذا الرجل قبل 4 او 5 سنوات حديث في قناة النيل الازرق , وبامانة لم احب سمته ولا شكله ولا حديثه. الرجل كان ساحرا وصار انصار سنة , وهذه لا باس بها , لكن حديثه عن الطريقة التي تعلم بها السحر لا علاقة لها بالصوفية من قريب او بعيد بل هو يحاول ان يزج باسم التجانية زجا للنيل منها . هذا ما احسسته من حديثه ولست في موضع دفاع عن احد.
محاولة الطعن في الشيخ البرعي احد اكثر الشخصيات الدينية المحبوبة في السودان غير مقبولة بالنسبة لي شخصيا, واعتبر البرعي احد الذين اجتهدوا في توصيل الرسالة الاسلامية بسلاسة وقبول .
اكبر مشاكل هؤلاء - الملتحون - انهم يسيئون الظن بالعباد وينصبون انفسهم موجهين لافعال الناس ولا يحسنون افعالهم . اذا ساء فعل المرء ساءت ظنونه, وارجعي للبوست بتاع احلام بتاع اغتصاب الاطفال , هذه الظاهرة ارتبطت بهؤلاء.
ابوتوتا كلامك صاح , كثيرون يسترزقون من وراء ادعاء الشياخة والتصوف.
اكرر انا لست في موضع دفاع عن الصوفية ولست صوفيا ولي عليهم كثير من الملاحظات , ولكني ضد الهجوم غير المؤسس والطعن وصف العباد بالكفر.
لكم ودي

محمد ساتي
15-05-12, 02:18 PM
مرفوع لعناية ...........

أحمد محمد
15-05-12, 02:48 PM
اللهم لاتولي امرنا لمثل هولاء الدجالين

عاصم الشيخ
15-05-12, 02:49 PM
بالمناسبة يا ود ساتي الراجل ده السنة الفاتت حصلت لي بسببه قصة طريفة جدا ..

في برنامج مشهور في اذاعة وتلفزيون عجمان يسمى (البث المباشر) يقدمه رجل خفيف الظل اسمه عبد الله راشد خصيف وشهرته ابو راشد .. يعالج قضايا مختلفة ولا يركز على موضوع بعينه ..
استضاف ابو راشد في احدى حلقاته الساحر حامد الذي واصل في تناقضاته التي ذكرها عوض اعلاه .. وادعى انه يعالج كل الامراض وان له القدرة على جلب المال والثروات .. ترك مقدم البرنامج له الباب مفتوحا فمارس كذبه .. وفي اليوم التالي عندما سئل عنه من بعض المتصلين المستنكرين اجابهم ابو راشد بخفة دمه المعهودة .. : الريال (طلع رحلة على باريس ).. بمعنى ان الشرطة اعتقلته بحمد الله ..

ارسلت رسالة نصية للبرنامج .. ( يا ابو راشد باستضافتك للدجال بالامس روجت للدجل والجدل وشوهت سمعة السودانيين ) .. اتصل بي على الهواء مباشرة وهو غاضب من كلامي .. وتناقشت معه .. وانا لا اعلم ان المتصل هو الاذاعة وان حديثي يبث على الهواء ..

عبدالحفيظ أبوسن
15-05-12, 03:26 PM
تعرف يا عاصم أول البارحة كنت داير أكتب بوست بعنوان
كوستي تبيح الدجل والوهم
عضم البوست وسداته عن عربات لافه في الميادين بكوستي وتستعمل مكبرات الصوت
واحدات شركات ماليزية وغيرها تبيع ادوية وزيوت وغيرها وتعالج كل شيئ ,,
وبعضها عربات وبرضو بمكبرات صوت تبيع كل شيئ حجبات وبخرات وادوية بلدية وتعالج اي مرض
علي مرأي و مسمع وتحت بصر الجميع
والعربيتين الناس مكابسه فيها
تجدهم في اماكن الزحمة وعلي خط السكة حديد قرب الطلمبات

عاصم الشيخ
15-05-12, 03:33 PM
تعرف يا عاصم أول البارحة كنت داير أكتب بوست بعنوان
كوستي تبيح الدجل والوهم
عضم البوست وسداته عن عربات لافه في الميادين بكوستي وتستعمل مكبرات الصوت
واحدات شركات ماليزية وغيرها تبيع ادوية وزيوت وغيرها وتعالج كل شيئ ,,
وبعضها عربات وبرضو بمكبرات صوت تبيع كل شيئ حجبات وبخرات وادوية بلدية وتعالج اي مرض
علي مرأي و مسمع وتحت بصر الجميع
والعربيتين الناس مكابسه فيها
تجدهم في اماكن الزحمة وعلي خط السكة حديد قرب الطلمبات
عمك تتذكر اول بوست لي في كوستي سيتي ؟؟.. راح مع الحاجات الراحت في الفترة الطش فيها المنتدى ..

كان اسمه (ظاهرة غريبة) .. بتكلم عن الناس الشايلة مكرفوناتها وتتكلم في ميدان الحرية وفي الاخر يقولوا ليك عندنا دواء بعالج اي شئ .. والزول الفي ميدان الحرية خاتي ليه صور الجهاز التناسلي للرجل والمراة وما عارف شنو وعامل فيها دكتور للحاجات دي .. واي زول جايب ليه رخوة هو بعالجو وبخليه تمام ..

عبدالحفيظ أبوسن
15-05-12, 03:51 PM
آي بتذكر ليك بوست زي ده
هسه بقي دجل ووهم
حاجات مغلفة تغليف راقي ويبيعوا فيها شباب صغار لابسين بناطلين وقمصان وبتكلمون كلاما يبدو علميا ولا يعني شيئا ,, يخدعون به البسطاء ,, وشئ دراسات واحصائيات وموقع إلكتروني
يعني خداع ودجل تقليدي وعالمي
زمان بتذكر زمن نميري بعملوا كشات للدجالين البقعدوا جمب القضيب ويبيعوا دوا المحبة
هسه مرات تلقاهم قاعدين جمب المستشفي

محمد ساتي
15-05-12, 04:55 PM
بالمناسبة يا ود ساتي الراجل ده السنة الفاتت حصلت لي بسببه قصة طريفة جدا ..


ارسلت رسالة نصية للبرنامج .. ( يا ابو راشد باستضافتك للدجال بالامس روجت للدجل والجدل وشوهت سمعة السودانيين ) .. اتصل بي على الهواء مباشرة وهو غاضب من كلامي .. وتناقشت معه .. وانا لا اعلم ان المتصل هو الاذاعة وان حديثي يبث على الهواء ..

عاصم اشد ما اغاظني في هذا الموضوع هو الصاق دجله وشعوذته بالصوفية

عاصم الشيخ
15-05-12, 05:15 PM
عاصم اشد ما اغاظني في هذا الموضوع هو الصاق دجله وشعوذته بالصوفية
ااي .. هو عامل فيها تاب من السحر وبقى انصار سنة عشان كدة بحاول يلصق كذبه بالصوفية وللاسف هناك من يستمع اليه .. انا شخصيا شاهدته عبر قناة النيل الازرق قبل اكثر من عشرة سنين ثم شاهدته في اليوتيوب ثم شاهدته العام الماضي في اذاعة وتلفزيون عجمان .. لكن الحمد لله هنا سفروه التوج طوالي .. وبرضو ناسنا يقولوا ليك نحن ارض الاسلام ونحن حماة الاسلام .. هنا الناس بتحمي الاسلام من سكات ..

فرح الاماسي
15-05-12, 05:43 PM
بالمناسبة يا ود ساتي الراجل ده السنة الفاتت حصلت لي بسببه قصة طريفة جدا ..

في برنامج مشهور في اذاعة وتلفزيون عجمان يسمى (البث المباشر) يقدمه رجل خفيف الظل اسمه عبد الله راشد خصيف وشهرته ابو راشد .. يعالج قضايا مختلفة ولا يركز على موضوع بعينه ..
استضاف ابو راشد في احدى حلقاته الساحر حامد الذي واصل في تناقضاته التي ذكرها عوض اعلاه .. وادعى انه يعالج كل الامراض وان له القدرة على جلب المال والثروات .. ترك مقدم البرنامج له الباب مفتوحا فمارس كذبه .. وفي اليوم التالي عندما سئل عنه من بعض المتصلين المستنكرين اجابهم ابو راشد بخفة دمه المعهودة .. : الريال (طلع رحلة على باريس ).. بمعنى ان الشرطة اعتقلته بحمد الله ..

ارسلت رسالة نصية للبرنامج .. ( يا ابو راشد باستضافتك للدجال بالامس روجت للدجل والجدل وشوهت سمعة السودانيين ) .. اتصل بي على الهواء مباشرة وهو غاضب من كلامي .. وتناقشت معه .. وانا لا اعلم ان المتصل هو الاذاعة وان حديثي يبث على الهواء ..


والله يا عاصم يال اخوي السودانين هم الوسخوا سمعتهم وقللوا من قيمتهم بعمايلهم البعملوا فيها دي

امس القريب دا شرطة الشارقة تقبض علي سودانيين وسودانيات يمارسون الدجل والنصب علي زوجة مسئول كبير وتم القبض عليهم ...


زوجي يذهب الي صلاة الفجر في المسجد بجوارنا يوميا .. في يوم بعد الصلاة ناداهو امام المسجد ( هندي )وشخص اخر وقال ليهو انت سوداني ؟ اجابه ايوة سوداني .. قال ليهو الامام هنا في الحي دا في سودانيين ومصريين ما تخطلط بهم ولا تجالسهم انهم دجالون ومجرمين .. هذا اردت ان انصحك لوجه الله ..

شفتو الدنيا دي كيف ؟

بعد كان يحلفوا بامانة المغترب السوداني بقي مجرم ودجال

غير القصص البحكوها المواطنيين وبجمعوا طوالي يقولو ليك السودانييين كانه كل السودانيين كعبيين مع انه في سودانيين قمة الاخلاق والاحترام ..

الشر يعم والخير يخص )

محمد المصطفي
15-05-12, 06:21 PM
عاصم اشد ما اغاظني في هذا الموضوع هو الصاق دجله وشعوذته بالصوفية

هذا الرجل ليس من الصوفية بل من الد أعداء الصوفية يظهر ذلك من خلال محاضراتة التي يلقيها كلها كذب !!
التصوف منهج لتهذيب النفوس وميدان لمحاربة امراض القلوب .. وقاعدة التصوف والصوفية قولهم
ان رأيتم الرجل يسير علي الماء او يطير في الهواء وعمله مخالف للشرع فأعلموا انه شيطان
فما أكثر الشياطين في هذا الزمن!!!

عاشق كوستي
15-05-12, 08:14 PM
والله ياو ود ساتي الرجل دا بقول انه كان صوفي وصوفي كبير كمان دا يعني شنو انه فعلا في الصوفية في ناس دجالين واعتقد انهم اقلية وهم الشوهو الصوفية ولكن اوليا الله لا خوف عليهم ولا هم يحزنون .
اختنا فرح الاماسي
‏ مواضيع زمان ساخنة
موضوع رائع وتحليل اروع ‏
‏ اس المشكلة طيبه اهلنا
‏ لايفرقون بين الولى والساحر
ود ساتي ..............‏‎

ابو حازم
15-05-12, 11:57 PM
انا ماصوفي ... تومي الباشمهندس حسين محمد علي هو الصوفي شديد .. تلميذ شيخ عبالله التاج ... وبقي مقدم ... انا ماعارف لكن قلبي ما إنشرح لي الصوفية دي ... امكن لأني كنت ( رآسطا ) زمان وإمكن لأأني درست زي ما ذكرت ليكم سابقا علي يد شيخ ( سني ) غير صوفي وهو الشيخ حسن قسم السيد عثمان سرور ... وكان دفعة عبد الله التاج وكلهم قرو علي يد ( شيخ الطاهر ) جزآه الله خيرا وذكر لنا انه عرضت عليه شياخة الصوفية ولكنه رفضها واختار الدعوة فقط بدون منهاج صوفي ... او إمكن لأنو ( حتت يا شيخي فلان ) اوة حتت التبرك بالأولية والصالحين وقبور المشايخ في المساجد أو حتي امكن ( لست المختار لهذا الشرف ) كلها اسباب لكن المهم فيها اني مازول صوفي (خير أو شر ) لا اكرههم أبدا ولا احبهم جدا ( يعجبني بساطتهم وفطرتهم ونقاء ما يظهر منهم .. وأختلف معهم في أشياء .. ( كنت لما ازور عبدالله التاج وبعد إصرار كبير منو كنت بجلس معاهو راس بي راس في عنقريبو .. وكان تومي حسين يأشر لي بي رآسو ( انزل معانا في الأرض ) كان عبد الله التاج بقول لي تومي خليه ده سيدنا كلنا ويلتفت يقول لي شنو لسه ما عايز تجينا ؟؟؟ كنت برد بلطف ( انا لسه ما بقيت انسان نضيف وما شايف نفسي مؤهل للانضمام أليكم ) كان ردي دايما كده لكن هل كان مجاملة ؟؟؟ هل هي حقيقة ما بداخلي ؟؟؟ انا الان وبعد كل هذا اقول وبكامل ارادتي العقلية ( لن أكون صوفيا ) إمكن يجي يوم واستمع ليي دروس التوحيد والفقه والسيرة والمعاملات او أهل الدعوة والخروج ولكني سأخذ منهم مايعجبني .. أو سأستمر هكذا ( ولا بايعتُ بعد محمدٍ رجلا ) صلي الله عليه وسلم

من ناحية تانية ور جوعا لي موضوع ( الساحر آدم حامد ) وبغض النظر عن انو صوفي أو سني او وهابي او متسلق .. عايز اقول وبي حيادية انو شخص لو ما كان صوفي ؟؟؟ بيعرف كتير عن الصوفية ... ( وبعض ) الكلام الذكرو عن الصوفية يستدعي الوقوف عنده مثلاٍ ( اقطاب لأرض وأوتاد الأرض وحتي مسألة البخرات والتمسح بالأضرحة ... كلام ( الساحر حامد ادم فيه شئ من الواقعية ... ونحن لا نعلم كثيرا عن خفايا قمم الصوفية ... الكبار ( قد لا يكون هناك شئ مريب بشأنهم ولكن ايضا قد يكون ما لا نعرفه ... عموما انا أري انها افضل من الشيعة الف مرة ..

سأواصل :
عذرا لأخواني الذين يختلفون معي

عاشق كوستي
16-05-12, 12:06 AM
انا ماصوفي ... تومي الباشمهندس حسين محمد علي هو الصوفي شديد .. تلميذ شيخ عبالله التاج ... وبقي مقدم ... انا ماعارف لكن قلبي ما إنشرح لي الصوفية دي ... امكن لأني كنت ( رآسطا ) زمان وإمكن لأأني درست زي ما ذكرت ليكم سابقا علي يد شيخ ( سني ) غير صوفي وهو الشيخ حسن قسم السيد عثمان سرور ... وكان دفعة عبد الله التاج وكلهم قرو علي يد ( شيخ الطاهر ) جزآه الله خيرا وذكر لنا انه عرضت عليه شياخة الصوفية ولكنه رفضها واختار الدعوة فقط بدون منهاج صوفي ... او إمكن لأنو ( حتت يا شيخي فلان ) اوة حتت التبرك بالأولية والصالحين وقبور المشايخ في المساجد أو حتي امكن ( لست المختار لهذا الشرف ) كلها اسباب لكن المهم فيها اني مازول صوفي (خير أو شر ) لا اكرههم أبدا ولا احبهم جدا ( يعجبني بساطتهم وفطرتهم ونقاء ما يظهر منهم .. وأختلف معهم في أشياء .. ( كنت لما ازور عبدالله التاج وبعد إصرار كبير منو كنت بجلس معاهو راس بي راس في عنقريبو .. وكان تومي حسين يأشر لي بي رآسو ( انزل معانا في الأرض ) كان عبد الله التاج بقول لي تومي خليه ده سيدنا كلنا ويلتفت يقول لي شنو لسه ما عايز تجينا ؟؟؟ كنت برد بلطف ( انا لسه ما بقيت انسان نضيف وما شايف نفسي مؤهل للانضمام أليكم ) كان ردي دايما كده لكن هل كان مجاملة ؟؟؟ هل هي حقيقة ما بداخلي ؟؟؟ انا الان وبعد كل هذا اقول وبكامل ارادتي العقلية ( لن أكون صوفيا ) إمكن يجي يوم واستمع ليي دروس التوحيد والفقه والسيرة والمعاملات او أهل الدعوة والخروج ولكني سأخذ منهم مايعجبني .. أو سأستمر هكذا ( ولا بايعتُ بعد محمدٍ رجلا ) صلي الله عليه وسلم

من ناحية تانية ور جوعا لي موضوع ( الساحر آدم حامد ) وبغض النظر عن انو صوفي أو سني او وهابي او متسلق .. عايز اقول وبي حيادية انو شخص لو ما كان صوفي ؟؟؟ بيعرف كتير عن الصوفية ... ( وبعض ) الكلام الذكرو عن الصوفية يستدعي الوقوف عنده مثلاٍ ( اقطاب لأرض وأوتاد الأرض وحتي مسألة البخرات والتمسح بالأضرحة ... كلام ( الساحر حامد ادم فيه شئ من الواقعية ... ونحن لا نعلم كثيرا عن خفايا قمم الصوفية ... الكبار ( قد لا يكون هناك شئ مريب بشأنهم ولكن ايضا قد يكون ما لا نعرفه ... عموما انا أري انها افضل من الشيعة الف مرة ..

سأواصل :
عذرا لأخواني الذين يختلفون معي
أخي ابا حازم ‏
سرد ممتع ‏
واصل سرد تجاربك‎

عبدالحفيظ أبوسن
16-05-12, 06:46 AM
للصوفية فضل لا ينكر في نشر الاسلام ,, اسلام الحب والتكافل وقبول الآخر
وصلت لمناطق عجز عنها الآخرين في الصحاري والوهاد ,, فتحت الخلاوي ودرست القراءة والكتابة وحفظت القرآن
يدين السودان للصوفية بفضله في نشر الاسلام

محمد ساتي
16-05-12, 07:05 PM
اوافقك الرأي كما التجار عهم من نشر الإسلام في شرق آسيا

كذلك نشر الصوفية الإسلام في مناطق بعيدة وبل رسخوه في تلك المناطق حتى جبال النوبة للصوفية قصب السبق في نشر الإسلام هناك

ابو حازم واصل سردك الجميل

كذلك درست لدى متصوفين ولكن قلبي مال كثيراً لجماعة التبليغ والدعوة إلى الله .

محمد ساتي
16-05-12, 07:06 PM
هذا الرجل ليس من الصوفية بل من الد أعداء الصوفية يظهر ذلك من خلال محاضراتة التي يلقيها كلها كذب !!
التصوف منهج لتهذيب النفوس وميدان لمحاربة امراض القلوب .. وقاعدة التصوف والصوفية قولهم
ان رأيتم الرجل يسير علي الماء او يطير في الهواء وعمله مخالف للشرع فأعلموا انه شيطان
فما أكثر الشياطين في هذا الزمن!!!

ود المصطفى دوماً في المكان والزمان

شكرا ليك

الصوفية تحتاج لمن يعرضها للآخرين بصورة أفضل

محمد الحسن عبد القيوم
16-05-12, 07:26 PM
باسم الله بداءا والصلاة والسلام علي سيدنا محمد
يجب اولا ان نوقف هذا التهكم البغيض
ثانيا مثل هؤلاء الناس يبحثون عن طريق سريع للشهرة والمال والجاه ولا يهمة باب اذا بوليتم فاستتروا
لكن عموما في بعض الافعال تذهب بالانسان الي الشرك
ولم نسمع اولا عن البرعي يرحمة الله انة كان يعلم الغيب ويمنح الثروة ويكثر من الاموال
بل رجل خير يزوج الايامي ويساعد الفقراء ولم يجلس في قصور ولا بل في زريبتة
هل كان السيد الحسن ابو جلابية والتوم ودبانقا عمر وبرير والمكاشفي ابوعمر والشيخ عبد المحمود والصابونابي
وغيرهم دجالين حاشاء لله
هذا الشخص سلك الطريق الخطاء ونسبة للتجاني ابو العباس ومنح نفسة ما منحها من اسماء قوس وقطب وقوس قزح
ياخ طالما انت تسعي لنشر الفضيلة ومحاربة الدجل لما سلكت هذا الطريق ادخليني انك ضليت
وهنا كتاب لاياتية الباطل من يدية
هل ذهبت لكل من سحرت ولماذا لم تفعل وانت تعلم من اتي كاهنا او عرافا فقد كفر بما انزل علي محمد (ص)
وعاصم قالكم الرتجل مشي باريس

محمد ساتي
16-05-12, 07:34 PM
وعاصم قالكم الرتجل مشي باريس

ابو خالد يا صديق الصبا

ان شاء الله مشية ما منها رجعها

الرجل اساء للاحياء والاموت واساء لنا كشعب سوداني كما تفضل عاصم

محمد الحسن عبد القيوم
16-05-12, 07:38 PM
ابو خالد يا صديق الصبا

ان شاء الله مشية ما منها رجعها

الرجل اساء للاحياء والاموت واساء لنا كشعب سوداني كما تفضل عاصم

دا انسان متهور لم يتهكم فقط علي الصوفية كفكر
اصعب واسواء شئ
ما صار الناس حولنا يصفوننا به الان خاصة في السعودية
دا روج لانحراف شعب بالكذب

ذي فتاوي وافادات الترابي
حينما اختلف وقصو ليهو قال قلت للبشير اذهب القصر وساذهب كوبر